而裝修極有古典味，木製枱櫈，古典天花燈，加上侍應都喺外國人，食客都以外國人偏多，外語橫飛，氣氛輕鬆自在，真讓人有少少錯覺以為身處外地。
順帶一提，枱上嘅餐巾、餐具都做到一絲不苟，尤其套餐具，精緻而好有手感。枱上成組醬料架，俾你隨意運用。侍應亦好有禮貌、勤快，適時換上新碟。唯一挑剔喺上菜太快，轉眼上齊晒前菜、青口及主菜，可以慢番啲就更好。
餐枱紙就喺主餐牌，不過，由於燈光比較昏暗，餐枱紙又用上稍淺嘅淺啡色，所以，對某啲客人可能睇得辛苦啲，故可以改善一下。此外，燈光實在極暗，影相實在唔容易，小弟有唔少相都鬆郁懞，請見諒。而主餐牌食物嘅分類為頭盤、伴菜、招牌青口鍋、Frites素食之選、Frites健康之選及主菜。
此外，還有一個酒餐牌，因為同朋友都唔好酒，兼且成大本印有不同餐酒、烈酒，多款比利時啤酒……，就無特別影低相留記錄，但裡面有一個小食及無酒精雞尾酒餐牌，小食以炸嘢及濃味嘢居多，非常適合餸啤酒，唔怪之得放晌酒餐牌內。
至於啲無酒精雞尾酒，我哋就較有興趣。共有5款選擇，每款都喺賣$55，再點就$15一杯，但每杯一品脫份量， 已經好夠一餐飲用。
Friars Sweetheart $55
以小紅莓汁、蘋果汁、蜜糖溝成，無論色澤、味道都幾似利賓納，但甜得嚟無咁死。
Coco Colada $55
簡單以菠蘿汁及椰子忌廉做，朋友講唔錯，因為菠蘿及椰子味都幾平衡，酸酸甜甜。
頭盤有12款之多，不過，已包括湯、沙律在其中，有好幾款都想試，不過，最終點咗個蟹肉塔，因為從餐牌見，食材應幾清新及頗有特色。
Crab Tian $130
做成塔形，三層色彩，賣相真喺好清新。除咗蟹肉，仲有塊根芹、蠶豆、牛油果、蕃茄粒，而當中塊根芹查實小弟都唔知喺乜，喺事後上網查番先大概知咩嚟，就喺中層白色溝埋蛋黃醬嘅一啲莖菜，口感喺爽爽脆脆，再者，超多蟹肉，配埋其他食材，塗晌脆麵包片上一齊食，不單清新開胃，更喺口感豐富。
上文講過，青口喺依度嘅招牌菜，所以，主餐牌中正中間一欄專登劃出為青口菜式，共有6款口味，有傳統，亦有新派，相信梗有一款啱你口味，分為半公斤（$235）及一公斤（$385）份量供選擇，此外，並配有炸薯條及烘牛油麵包作佐食，所以，整體份量一啲都唔輕。
Hoegaarden $235
我哋點嘅喺半公斤份量，一樣有成鍋，雖然無認真數過，但大概都有15、16隻，夠兩三個人共享。單睇青口外型好大隻，肉質肥厚，鮮甜嫩口，唔會好似啲平價貨入口又韌又膠，感覺好唔同，據侍仲應介紹話每年9-12月喺青口當造期，體形最大，更話有雌雄之分，前者肉身橙色，後者奶白，果然又真喺咁喎。
我哋選依一款口味喺以比利時知名啤酒Hoegaarden代替白酒，並加入芫荽、茴香、檸檬青等材料去煮，其實，食青口時個啤酒味就唔算話好突出，但按侍應教我哋，學比利時人咁用青口殼當匙羹用嚟飲湯，個湯頭嘅啤酒味就突出好多，清香而不濁，以麵包沾湯同食，既有牛油香，又有點啤酒味，好過癮；唔想又喺薯條配茄醬，附上嘅自家製蛋黃醬用嚟配薯條，一樣夾同別有一番滋味。
食過一道頭盤及一道青口鍋，夾埋啲薯條、麵包，都好頂得肚。主菜類，我哋亦喺選一款，主菜都有好多選擇，好多款都心郁郁想試，如意大利飯、烤雞、豬手、牛扒……，但最終揀羊扒，多謝朋友知我心水，羊扒亦喺小弟喜愛嘅肉類之一，因為羊羶唔喺人人都接受到，難得友人都OK，就梗喺試吓啲羊啦！
Provence Lamb Cutlets $295
嘩！啲主菜真喺無諗過咁大份，一客足有5大件紐西蘭羊扒，而且，件件都有番咁上下厚身，睇餐牌嘅描述，羊扒喺以法國嘅普羅斯旺香草所醃，雖然，唔知點為止喺普羅斯旺香草，薰衣草？但總之好香，而且，羊扒質感嫩腍富肉汁，羊羶味屬中等強度，喜歡食羊嘅朋友一定合晒胃口；此外，初頭睇餐牌時，以為啲薯仔及沙律菜好似一般歐陸菜咁伴伴碟放晌邊，原來唔喺，大堆頭鋪晒晌羊扒之下，薯仔採用里昂式炒法（Lyonnaise Potato），當然小弟本身唔識依樣嘢，事後晌網上查查，喺將薯仔切片，加入牛油、香芹炒軟，食落惹味感強；而沙律（Swiss Chard Salad）喺以瑞士甜菜（網上搵到其他譯名如莙薘菜、迦茉菜）撈上油醋做成，味道酸酸甜甜。一客羊扒，份量真喺足4個人食。
臨尾嘅甜點環節，7款甜品都頗為吸引，最終揀咗Apple Tarte Tatin，覺得佢最特別，而且點一客就夠晒我哋食。
Apple Tarte Tatin $100
因為即叫即做，烘焗需時，所以，有心試就預早落定單。依道甜品好有趣，上枱時一個小煎鑊中放咗一大件酥皮，有侍應堂前做埋個後期製作，煎鑊一翻就出現蘋果撻真身，一片一片蘋果扇形排列整齊，放上雲呢嗱雪糕球，再淋上蘋果酒糖漿就正式做出成品。一客豈止兩個人食，3-4個人共嚐都OK喎！底層嘅酥皮好薄，蘋果片口薄均一又切得工整，焗腍之後寧舍香，仲有啲啲玉桂味，配合雪糕，冰火交融嘅感覺，添上蘋果酒糖漿，真喺甜蜜滿瀉。
食到清晒碟就知大家都覺得佢好好味，值得推介嘅手工甜點！
總結一句，環境好，招呼又好，定價感覺好似偏貴，但計番個份量，其實絕對抵食，最緊要喺既有特色，又好食吖嘛，好滿足嘅一餐比利時菜。
個人評分
味道：9/10
環境：8/10服務：9/10
抵食：8/10
平均每人消費：HK$320
餐廳資料：
FRITES Belgium on Tap
中環威靈頓街198號The Wellington 1樓
2217 6671
中環威靈頓街198號The Wellington 1樓
2217 6671
沒有留言:
發佈留言