2016年8月6日星期六

至尊滿屋日本料理 Supreme Manya Japanese Restaurant:抛尊引玉.大嘆放題

日本嘢久唔久都有食吓,其實,都幾鍾意同啲朋友一齊食放題,因為一個固定價錢任食有數圍,但比起食自助餐又平一截,食物選擇亦唔少,想食乜就點乜,各有所好,唯一喺漏單、時間緊嘅負面問題。但睇番近一年嘅食評,原來好耐無食過放題,對上一次已經喺舊年年尾嘅事,所以,拋出食放題嘅提議,實行大擦一場。
為咗減少漏單、時間緊嘅問題,食早啲喺不二法門,所以訂6:00pm,預早睇定有咩食,分頭剔點菜紙增加效率,就算限食到8:00pm,兩粒鐘食餐飯都差唔多,再者,越早客越少,漏單嘅問題相對都細啲。
6:00pm嘅入座情況
餐廳佔商廈全層,地方都幾大,早到關係,只有一排座位被安排入座,不過,7:00pm已經滿晒座,離開時,門口仲堆滿客,多人到不得了。
7:00pm嘅入座情況
一如所有放題,點菜紙分門別類放晌枱面,以小型檔案簿釘住啲點菜紙,個人覺得分得太多張,而且,好容易有漏夾嘅問題。
大部分食物由點菜紙落單,小部份食物如甜品及汽水、果汁、啤酒或熱茶,可到專櫃自取,而甜品及飲品兩者嘅選擇亦算得上多。
有一系列OKF果汁(其實喺韓國牌子嘢),有多款口味,我哋先後試咗芒果、菠蘿、提子、桃,又幾好飲喎,裡面仲有啲纖幼嘅果肉啜吓。個人最心水喺桃味,味道較為清甜,卻帶有濃郁桃香味。
此外,更每位客人奉送一杯Movenpick雪糕一杯,4款口味供選擇。
bowl刺身
除咗日本玉子刺身外(你無睇錯,佢真喺寫「日本玉子」,稱得刺身,即喺魚生,有啲刺身已用牛肉、馬肉,但玉子,即喺雞蛋,但佢又唔喺俾隻生蛋你,仲可唔可以叫魚生呢?),其餘10款海鮮都叫齊晒,樣樣兩件,包括:三文魚、油甘魚、劍魚腩、甜蝦、深海大赤蝦、鮑魚片、馬刀貝、赤貝、鮮帶子及北海道角螺,裝成一大碗兩人份,睇落啲刺身色澤新鮮,非常吸引。試勻10款,同老婆都覺得整體啲刺身都有水準,尤其三文魚、劍魚腩、甜蝦、鮑魚片、馬刀貝同北海道角螺,鮮甜出;反而,深海大赤蝦口感太膠,鮮帶子亦無夠爽口,顯得有少少失色。
bowl壽司
壽司類都有好多選擇,無論一般嘅壽司、空運活魚壽司、火炙壽司,都睇得見晌配搭上花咗唔少心思,不過,怕太易飽肚,又只得我倆公婆,所以,只選擇試試幾款創作壽司。
bowl創作壽司
4款中試了其中的3款:磯の雪魚籽醬帶子、黃金膽中花之戀及豆紙香茅三文魚沙律,配搭十分新穎,但味道普通。雪魚籽醬配帶子,集鹹鮮香;加入海膽嘅花之戀,驚喜無預期大,夾起嚟散晒,食得有啲狼狽;反而豆紙香茅三文魚沙律幾得意,睇張豆紙個樣好膠咁,入口軟軟哋,其實無乜味,而件壽司香茅味欠奉。
bowl小食
豆腐及枝豆喺老婆心水,所以,胡麻冷豆腐及味付海帶枝豆各點一客,再加一份酸薑過過口癮,份冷豆腐真喺好滑,芝麻醬又香濃。
bowl沙律
沙律類唔喺啲大大路嘅柚子沙律、中華沙律之類,5款沙律中有好幾款都挺特別,想就梗想試晒啦,不過,兩個人食得幾多吖。結果,揀咗黑松露胡麻海鮮沙律及牛油果香草鮮蝦沙律,難得兩款都無迤做,沙律菜底好新鮮爽脆,而前者黑松露搭胡麻幾OK喎,濃香盡出,而後者香草味好突出,鮮蝦亦爽彈,只恨佢牛油果少得可憐。
bowl手卷、軍艦、卷物
平時去食日本嘢,依幾類食物當然都會點啦,不過,去到放題,咁飽肚嘢就通常都放棄。雖然如此,其實睇番佢哋嘅選擇,睇落又似乎唔錯嘅,不過,無理由為樖樹放棄個森林嘛。
bowl炸物
香口嘢當然啱啦,不過,6款炸物裡,如黃金炸雞、吉列炸帶子、酥炸黑輪卷……等等,唔算好吸引到小弟,所以,亦都無點。
bowl天婦羅
無食炸物,天婦羅就更加唔可以錯過,當中幾款天婦羅野菜,就更啱老婆,溫室南瓜天婦羅、秋葵天婦羅、蕃薯天婦羅都喺佢嘅偏愛,南瓜、蕃薯都粉甜,秋葵爽口;虎蝦天婦羅亦都不俗,全部入口都唔油,粉漿夠薄。
bowl燒物
基本上,燒物我哋都叫得唔少,不過,樣樣都喺逐串逐串嚟,結果發現佢哋喺儲單出菜,未夠有霸氣咁一碟過嚟晒啲燒物。兩張點菜紙,共有12款選擇。
燒雞翼、鹽燒海蝦、燒冬菇串、燒牛餅串屬普通之選,唔喺話唔好食,只喺普普通通啫,當然,對雞翼、海蝦……等等有情意結就另計,而燒牛餅串似燒到乾晒水嘅牛丸咁,不過,沾啲泰式酸辣醬又幾OK喎。
燒廣島蠔、鹽燒多春魚、燒有機鮮菠蘿、燒鰻魚串、燒有機日本蕃薯仔屬美味之選,廣島蠔大隻厚肉,加埋啲芝士、洋蔥粒一齊焗,幾好味;多春魚勁多春,外皮幾香脆;燒菠蘿一向都好食,燒乾少少水份,就更清甜;而鰻魚串搽上照燒汁去燒,香濃惹味;蕃薯仔一口一粒,好粉好甜。
燒紐西蘭香草羊鞍、鹽燒牛舌屬個人喜好之選,好唔好食在乎個人口味,羊鞍燒得焦香,既有香草味,又有點點羊羶香,肉質軟腍富肉汁;牛舌煙韌,帶股獨有嘅牛舌燥味。
bowl主食
依一類包括啲拉麵、烏冬之類,壽司都無點試,超飽肚嘅拉麵、烏冬就更加唔會嗌啦。不過,佢哋反而有兩款湯品喺我哋都有興趣,尤其老婆就最鍾意飲湯。自家製立魚湯,同點菜紙個樣好唔一樣,不過,總算幾清幾香,味道不過不失;反而個南瓜湯掂喎,好濃南瓜味之餘,口感順滑。
bowl和風料理、一品料理
兩款料理就猶如廣東式小炒或小菜咁,若非人少,一定會點一客鐵板雪花牛柳粒、雪花牛肉鍋及龍蝦海鮮粥嚟試試,擔心太大份,尤其個粥,標明2-4人,真喺一客頂幾份刺身啦,小弟仲想留少少肚食甜點,食甜點總會令人開心啲!
bowlMovenpick雪糕
品牌始終喺唔牌,質素有一定保證。老婆揀朱古力,軟滑香濃,內裡仲有朱古力碎片;小弟揀意式奶凍,好重奶香味之餘,拌入紅桑莓醬,帶點酸甜味,好食。
bowl甜品
一口氣搞攞晒咁多種類甜點,有朱古力餅、朱古力撻、馬卡龍、綠茶奶凍、木糠布甸、意士多啤梨奶凍,質素唔會有咩好大驚喜,但都算中等偏上,尤其啲馬卡龍,比預期中好,外層脆得嚟有點煙韌,甜得唔會太過份,唔甜就唔喺馬卡龍啦,最麻麻喺啲朱力餅,朱古力味雖濃,但入口好乾。
順帶一提,7:30pm前離座或9:30pm後入座有85折,就算8:00pm前離座亦都有9拆,依啲小小著數就到就盡量用啦,算喺變相唔收加一嘛。
頭輪相對客少(都喺初段嚟講),印像中都無咩漏單,喺有啲串燒拖到好尾先放嚟。而食物質素以咁嘅價位,又有咁多選擇,稱得為上算、抵食,此外,店員嘅招呼唔錯,收碟勤快亦有禮,整體服務都幾到位,7:00pm先叫埋單,但可以繼續點、繼續食,到7:15pm提你7:30pm喺截單時間,再到7:30pm又提你有咩想食可以把握時間落埋單。雖然,未至於抛嚿磚,引塊玉返嚟,但「至尊滿屋」的確喺間食得過嘅放題店。

個人評分
味道:8/10
環境:7/10
服務:8/10
抵食:8/10
平均每人消費:HK$248

餐廳資料:
至尊滿屋日本料理 Supreme Manya Japanese Restaurant
旺角彌敦道628號瓊華中心7樓全層
3622 2688 / 3622 2323

沒有留言:

發佈留言