2016年8月19日星期五

Palette:美味調色板

六折嘅吸引力確喺幾大,雖然,知道都喺啲商業策略,但折咗計番實價,$350一個自助晚餐,仲要喺晌間4星酒店,依個時勢真喺唔多,唯一喺位置被人感覺吊腳,其實識行,港鐵紅磡站行過嚟都只喺10-15分鐘,遲啲有埋港鐵黃埔站、土瓜灣站仲方便。
講咁耐,今晚就喺嚟到新開一年左右Hotel sav嘅Palette大嘆自助晚餐。
店名Palette意思就喺調色板,所以,整間店嘅裝修都環繞番店名嘅主題,就好似餐廳中嘅店名,會不斷轉色;若再留意吓,周圍嘅燈光亦同樣會有所變化。唔知喺咪咁嘅緣故,座椅都用上透明膠椅,令整體有種通透感,只喺感覺無咁好坐。至於服務方面,整晚都幾好,上特色食物、收碟、食物補充都好到位,啲侍應都好有禮貌。
擺放食物嘅區域,其實一出一樓嘅酒店前堂,已經見到。甜品類嘅食物就放晌餐廳門口嘅長枱,似喺有目的咁以甜品嚟吸引酒店客人。而入到餐廳內,左邊一字幾十呎長枱就有海鮮、沙律、冷盤、湯品、麵包、熱盤……等等大部份食物。
此外,近門口右邊則有幾款私房特色菜、即煮意粉檔及香烤切肉。綜合而言,可能基於場地問題,食物嘅選擇唔算好多好多,但類別以言,可謂樣樣都有。故此,今晚都有啲信心可以試勻大部份食物。
私房特色菜
即煮意粉檔
餐廳為想更提升自助餐嘅吸引度,所以,除每位客戶可以揀選一款高檔菜式外(佛跳牆或椰汁燉燕窩),更每位客人奉送一客海鮮爐端燒,並獲贈一杯夏日特飲。
另外,餐廳亦推出「無張添加飲品」推廣($40-$90),任飲汽水、果汁、啤酒及餐酒,不過,自助餐本身已另包一杯餐飲,再者,加送一杯夏日特飲,已經好夠。
bowl沙律、冷盤
又喺小弟慣常食自助餐嘅攻略,就喺先嚟一大份沙律夾少少冷盤。先介紹吓有咩選擇先,沙律方面有4款沙律菜、6款配料、6款醬汁,足夠簡簡單單砌份靚靚仔仔嘅沙律,不過,醬汁嘅擺位真喺有啲問題,晌兩組食物箱嘅中間隙位,隊隻碟埋去時就好難「」啲汁,唔隊埋去呢,啲汁好易瀉去另外啲醬汁度,溝到雜晒就唔好啦。
冷盤方面,有啲的骰嘅味付螺肉、玉子豆腐之類,此外,仲有煙三文、凍切肉腸。當然,小弟會加埋啲巴馬火腿落我碟雜綿沙律度啦!
睇見我份沙律喺咪幾正呢,要齊4款沙律菜做底,淋上低脂意大利油醋及蜜糖芥末汁,再放上幾款配料及多種冷盤食材,咁食法食自助餐先過癮。沙律菜新鮮爽脆,但比較鍾意佢啲烤燈籠椒及雜菌;而巴馬火腿頗油潤,但嫌佢片得細塊及碎咗啲,反正自助餐都喺任人夾,片得靚仔啲會俾客人感覺好唔同。
bowl海鮮爐端燒
食完我嘅「頭盤」,侍應啱啱好送上海鮮爐端燒,初時出去影相見有爐端燒,一隻大船模型擺放多種海鮮,非常吸引,已經喺今晚必食嘅菜式之一。
燒海鮮包括有大虎蝦、新鮮帶子、鮮鮑魚,燒好後再伴上茄子及秋葵,成道主菜咁。虎蝦爽口彈牙,帶子鮮甜爽嫩,鮑魚煙韌咬口,食得出3款食材本身都有質素。
bowl佛跳牆
食自助餐斷估都唔會一個人架,所以,一人點一款,就可以試勻佛跳牆及椰汁燉燕窩。先試試個佛跳牆,有個一套裝好似紫砂茶壺類嘅器皿,先倒點沙飲番啖,精華即喺精華,清潤無比;內裡嘅鮑魚仔、瑤柱粒、冬菇都好好食。
bowl椰汁燉燕窩
睇樣就真喺平平無奇,就好似平常嘅椰汁西米露之類,就算呷一口個椰汁底,亦唔好有期望會有咩驚喜。不過,撈一羹燕窩真喺嚇親,啲燕窩多到呢……仲要唔喺碎燕喎,真喺好堅,咁多燕窩梗喺留番俾老婆食啦。
bowl凍海鮮
海鮮陣容相對弱啲,感覺無咁有睇頭,但其實已經有波士頓龍蝦、日本松葉蟹腳、加拿大翡翠螺、紐西蘭藍青口4款,都算喺精選嘢。其實,有時食物唔一定要好多,最緊要具質素,俾十幾款海鮮你,你亦未必試得晒,但樣樣都普通貨色,就更加無意思。
一碟過海鮮拼盤執齊4款,龍蝦蝦肉好爽甜,松葉蟹腳帶濃濃海水嘅鹹鮮,翡翠螺喺呎碼比較大嘅品種,而咬落爽口,藍青口質素都唔差,唔好好似食擦紙膠咁,亦帶少許鮮甜味。
bowl夏「逸」特色飲品
喺時候清新吓喉頭再繼續,所以,此時先點指定嘅特飲。特飲共3款選擇:夏樹蒼翠、一縷陽光及緋紅夏日,都喺啲雞尾酒式嘅飲品,但為方便大眾,亦可以選擇無酒精版本,而我哋都唔好酒,所以同樣揀上非酒精版本。
夏樹蒼翠,喺以荔枝及奇異果打成嘅半沙冰半果汁嘅飲品,入口非常爽甜,不過,老婆就話有少少偏甜;一縷陽光,喺芒果溝鮮奶嘅組合,啱晒我,因為溝入鮮奶,所以芒果味唔會濃得好誇,但陣陣芒果清香,又有種奶滑綿綿,唔錯。
bowl芝士、乾果
依家好自助餐都有芝士供應,往往都有三幾款,依度就共有4款選擇,包括:巴馬臣(Parmesan)、瑞士葛瑞爾(Gruyere)、布里(Brie)、伊丹(Edam),仲伴有啲合桃、杏脯同鮮提子。
我同老婆都喜歡食芝士,所以,由佢操刀,砌份芝士碟,配點克力架、乾果……等等。幾款芝士都各有唔同,小弟就較喜歡布里芝士,軟軟嘅口感,配麵包就最好。
bowl私房特色菜
近門口位擺咗啲蝦乾粉絲煲、黑醋鎮江骨、桂花茶燻鴨及楊州清燉獅子頭,都喺啲唔同地方嘅特色菜,不過,用到「私房」一詞感覺就有啲被誇大少少。當中,興趣大啲喺個獅子頭,因為可以當燉湯飲,亦無預期中咁肥咁油,頗清甜,個獅子頭好鬆化。
bowl餐湯、麵包籃
湯品中湯代表喺沙參玉竹煲豬骨,西湯就喺忌廉蘑菇湯;而麵包籃反而頗有睇頭,百吉包外,仲有啲麵包圈及德國Pretzel。
因為睇啲忌廉蘑菇湯外觀幾對辦,所以,配兩小件百吉包試試,估唔到真喺幾得喎,質感厚身而滑溜,菌香十足。
bowl熱盤
就放晌食物枱近尾部份,憑相片紀錄應該包括有清蒸海星斑、甫魚薑汁炒芥蘭、印度香辣燴雞、咖喱雜菜(配白飯及油酥餅)、蜜燒豬仔骨、燒菠蘿、燒青瓜、芝士焗海鮮、扒鴨胸配蘋果莎莎、煎魚柳配普羅斯旺菜、意式猶太燴牛肉、炒時蔬、燒薯仔,印象中好似無轉過款。因為選擇的確唔多,所以,就一碟過已經差唔多試得勻。
樣樣少少,志在試吓味道,整體而言,熱盤做得唔錯,最鍾意喺扒鴨胸及燴牛肉,前者配上蘋果莎莎令鴨胸帶點甜酸,好平衡;後者則味道香濃,口感柔嫩。較做得麻麻喺啲香辣燴雞,咖喱香得未夠層次,雞肉稍稍嚡。
bowl即煮意粉、羊架
上文都有講過有即煮意粉檔,行過時見即煮得香氣四溢,所以,都貪過癮點一碟試試。意粉有原味、香辣及香草味,醬汁可選蕃茄汁或忌廉汁,而配料共有10款,例如:火腿、煙肉、蘑菇、洋蔥、燈籠椒……等等,而即煮意粉檔隔離就喺燒羊架。
老婆少肉多菜,所以,除咗火腿、煙肉,咩配料都要,意粉要香辣味,再配蕃茄汁,加多一支羊架,就做成小弟依一碟羊架蕃茄香辣意粉。意粉煮得好有咬口,食落真喺有啲辣辣哋,個蕃茄汁底亦好酸香。至於條羊架,入口好嫩,羊味唔算羶,搽上芥辣就更滋味。
bowl餐飲去到近尾聲,又喺甜品時間,所以,嗌杯熱咖啡襯一襯,老婆則要紅茶,幫幫手消吓滯,紅茶則以整壺咁上。
bowl甜品
先一次過介紹吓有咩選擇,就喺綠茶味朱古力噴泉、葡撻、黑松露朱古力慕絲、檸檬蛋白撻、青檸啫喱、意大利芝士蛋糕、綠茶豆奶布甸、西瓜蛋糕、木糠布甸、朱古力香蕉蛋糕、芒果慕絲奶凍、法式藍莓布甸、窩夫、Haagen Dazs雪糕,陣容不俗。而甜品長枱下面仲有生果拼盤,分別喺西瓜、哈蜜瓜及鮮菠蘿。
綠茶味朱古力噴泉、葡撻
、黑松露朱古力慕絲、檸檬蛋白撻、青檸啫喱
意大利芝士蛋糕、綠茶豆奶布甸
西瓜蛋糕、木糠布甸
朱古力香蕉蛋糕、芒果慕絲奶凍
窩夫
雖然樣樣都想試,但都明白量力而為嘅重要性,任食啫,唔使搏命嘅,故此揀咗當中最心水嘅8款作為我嘅甜品拼盤。試過之後,確喺有水準,黑松露朱古力慕絲最有驚喜,入口松露味真喺湧出嚟,慕絲好柔滑;其次,屬上佳之作仲有檸檬蛋白撻、青檸啫喱,因為前者味道輕盈,檸味清新,撻殼脆口,而後者青檸啫喱酸香醒神,最有心思喺啲分子珠珠,咬爆之後喺蜜糖漿嚟,平衡番青檸嘅酸度。此外,綠茶豆奶布甸、西瓜蛋糕、朱古力香蕉蛋糕幾款都喺出色嘅出品。
bowlHaagen Dazs雪糕
作為最後衝刺,就以HD雪糕作結,雪糕共有4款口味:雲呢嗱、朱古力、士多啤梨及夏日雜莓,全部喺細杯裝。要咗其中3款口味,而HD雪糕唔使多介紹,總之最後嘆杯雪糕真喺好爽。
如果你個預算好有限,唔理好醜,但求有大堆頭過百款嘢食,咁Palette唔喺你杯茶;相反,貴精不貴多,幾百蚊位同屋企人或朋友食餐自助晚餐高興吓,Palette值得考慮!

個人評分
味道:8/10
環境:7/10
服務:8/10
抵食:8/10
平均每人消費:HK$350

餐廳資料:
Palette
紅磡蕪湖街83號逸.酒店1樓
2275 8778

沒有留言:

發佈留言