2016年8月7日星期日

九記打冷.小菜.粉麵 Nine Kee Chiu Chow Restaurant:歷九嚐新

今日午餐想食得簡單啲,行到漆咸道,偶然發現九記打冷,因為之前經過都仲見圍晒板裝修緊,應該新開無耐,睇門面你都見佢好新簇。雖然身為「架己冷」,但未返過鄉下,除粗口嗰句(聽長輩講得多),其他一句「潮」語都唔識。不過,個人都幾鍾意食潮州菜,尤其滷水嘢。
入到餐廳裡面,果然新開無耐,啲裝修好辣淨,光猛企理。餐廳兩邊喺卡位,中間放有多張圓枱,白色仿磚牆,卻又配上紅黑對襯嘅座椅,唔似傳統茶記,摩登得嚟又有啲扮扮哋咖啡室嘅感覺,少少怪怪哋咁。不過,蠻好嘅喺啲卡位幾好坐,而且,連茶記格局嘅佢一樣有wifi。
九記雖然有炒粉飯麵、潮式河粉麵,打正旗號賣打冷嘢,入到嚟自不然以食潮州嘢為目標。午市客飯有好多選擇,全部都喺潮式嘢,定價$38-$48,以尖沙咀區計,一啲都唔貴,一客餸,配一碗白飯或蕃薯粥。
此外,仲可以以$8嘅價錢,加配兩款食物:滷水蛋、滷水豆腐或紫菜湯 / 豆腐湯,另外,加$7更可以加配冷熱飲品或凍豆漿,挺划算。
bowl鹹菜門鱔 $40
眾多款菜式中,揀咗門鱔,因為一來好耐無食,二來配鹹菜,少少鹹鹹酸酸,夏天食會較開胃啲。門鱔唔喺好多,只有4小嚿,墊底嘅全部都喺鹹菜,門鱔肉質嫩滑,不過要小心食,頗多細骨。而鹹菜留咗唔少菜頭位,入口硬及有渣,處理時可以大刀闊斧唔要,俾客人食落嘅感覺就會好啲。
bowl滷水蛋、滷水豆腐 +$8
啲滷水蛋明顯滷得未夠入味,嗒落滷水味淡而薄,算唔合格;相反,啲滷水豆腐較好,既有豆香,內層又軟滑。
bowl蕃薯粥
可能喺小弟諗多咗,諗住好似海皇啲南瓜肉碎粥咁,有唔少南瓜,查實喺潮州粥混埋少少蕃薯絲而已,叫比起齋潮州粥多少少嘢咁。
雖然未有試過店家嘅滷水鵝或其他滷水食物,只單單試咗一味鹹菜門鱔、滷水蛋及滷水豆腐,食評難以全面,淨以今日所試嘅,總體只可以俾個OK佢,因未有做到一絲不「九」嘅感覺。

個人評分
味道:6/10
環境:7/10
服務:8/10
抵食:7/10
平均每人消費:HK$48

餐廳資料:
九記打冷.小菜.粉麵 Nine Kee Chiu Chow Restaurant
尖沙咀漆咸道南67-71號安年大廈地下
2369 3468

沒有留言:

發佈留言