2016年8月13日星期六

松 Matsu Japanese Restaurant & Bar:松心所欲

啱啱過去嘅六月尾、七月初,去咗一趟北海道花田半自由行10日遊,當然,食咗唔少海鮮、刺身、蟹腳、壽司……等等美食啦,玩亦玩得開心。行程嘅第二日就喺到訪札幌市嘅二条市場,更晌市場內嘅「どんぶり茶屋」以海鮮丼作為早午餐,至今,仲好懷念其美味。早前,晌報紙見到「松」嘅介紹,仲話喺藝人馬德鐘開,啲藝人為打響名堂,相信會落足料、俾足心機去做,故值搏率高,所以,從心所欲嚟到食餐晏,再嚐嚐海鮮丼嘅滋味。
可能有啲人會覺得位置吊腳,其實由港鐵紅磡站過嚟都只喺10分鐘之內。由於店家定位為餐廳兼酒吧,所以,格局比較摩登有型,一邊嘅玻璃櫃放滿唔少餐酒、日本酒。近門口一排喺4人座,而中間一排喺可以對住師傅做菜嘅吧位,此外,仲有啲廂房,但就無刻意走入去影相。
午餐嘅選擇一個揭頁餐牌、兩頁A4紙印晒出嚟,選擇唔算少,頭頭尾尾共有16款,有平有貴($70-$238)。當然,以刺身類定食就肯定貴啲啦,例如最平嘅角切什錦魚生丼賣$168,而最貴嘅刺身定食則賣$238;其次,7款肉類嘅定食則屬中價級別,定價晌$88-$128之間;相對平啲,就有3款烏冬可供選擇分別賣$70 / $98。
定食包前菜、沙律、麵豉湯及甜品(或咖啡),然而,烏冬定食就只配甜品或咖啡啫。
未講嘢食之前,值得一提喺啲餐具,無論小至裝前菜、沙律、麵豉湯嘅小碗,大至盛海鮮丼嘅石碗,非常精緻,好有手感,連枱墊都喺一塊過嘅木板,沉實而帶光澤,就算最尾隻咖啡杯,俾人感覺都唔普通。
bowl沙律
簡簡單單青瓜薄片、沙律菜及車厘茄,淋上柚子醋,勝在用料新鮮,感覺清新。
bowl前菜
侍應話會不時轉款,今日晏晝就喺醬油漬牛肉粒,肉質挺實有啲似食牛脷,卻較為鬆化啲,然而肉味濃郁。
bowl麵豉湯
呷一口,麵豉嘅味道濃重不濁,內有唔少昆布,如果加多少少豆腐粒就更合心水,不過,整體個麵豉湯確喺唔錯。
特級刺身丼 $218
真喺無揀錯,送到上枱單講賣相基本上已經無得輸咁滯,聽侍應介紹一次有咩刺身已經聽落都興奮,不過,真喺聽完一次都唔記得乜嘢打乜嘢,麻煩慢慢重覆多一遍,唔該!由12點位開始介紹吓:三文魚籽、海膽、中吞拿魚腩(中拖羅)、吞拿魚腩(拖羅)、深海池魚(有兩件)、油甘魚、立魚、鱪魚(店中時令推介,聽都未聽過嘅魚類,初時仲以為喺「柱」魚,真失禮)、銀鱈、帆立貝(帶子)、北寄貝、甜蝦、玉子(中間位),足足有成12款刺身,鋪滿整個飯面,幾強勢,再伴以酸薑片及鮮磨山葵,飯底喺加入少少醋嘅珍珠米,仲內藏醬油漬嘅冬菇絲(好好味嘅)。
想逐件刺身寫真喺非常難,亦都無咁嘅本事,但啲刺身真喺好鮮甜,中拖羅嘅雪花紋理,真喺幾有入口即溶嘅感覺;多款魚鮮,鮮甜以外,就喺清爽嘅魚味;帆立貝及北寄貝,都帶有爽口嘅口感;就連啲玉子都好似寧舍更有蛋香咁,總之各有各精彩,多多少少重拾晌札幌市食海鮮丼嘅感覺,而飯粒拌入少少醋,一口飯接一件刺身,可以更提升到啲刺身嘅鮮味,再者,飯粒黏韌口感極佳。由於部份刺身屬帶有唔少油花嘅級別,試試嗒一塊薑片,再接續食一件刺身,細嚐之後你會發覺效果好不一樣。
bowl三色丼 $188
唔一定想試多花款嘅人,可以考慮吓三色丼,三色分別喺三文魚籽、海膽、香蔥吞拿魚碎伴少少芝麻,因為只有3款刺身,所以,相對地每一款刺身嘅份量都會佔番多啲,但整體而言,刺身嘅份量真不少,一樣鋪滿飯面。不過,特級刺身丼嘅石碗有一個10吋薄餅之大,而三色丼嘅石碗則大概8吋薄餅嘅大細。
三文魚籽外觀鮮橙晶瑩,粒粒飽滿,一咬開,如海水嘅鹹鮮好澎湃咁一湧而出;海膽,雖然無刻意問喺嚟自邊度,但入口口感綿密,好有一份鮮甜豐腴嘅感覺;至於啲香蔥吞拿魚碎,做成免治,將香蔥與芝麻,加入少少山葵,同吞拿魚碎撈勻而食,所產生嘅化學作用,就喺令人滿足嘅美味。
bowl甜品
友人較喜歡甜品,所以,選擇咗櫻花雪糕,其實,賣相上可以再執得靚仔啲,例如個雪糕球做得圓滑啲,加一小片櫻花做裝飾,不過,依個時間相信搵片櫻花可能有啲難,而味道方面,小弟小試一口,感覺只喺中規中矩。
bowl即磨咖啡
小弟就較喜歡呷杯咖啡,咖啡以咖啡機即磨製成(因為見到店內遠處有一小座咖啡機),味道不俗,都夠香醇。但最喺欣賞喺套咖啡杯碟,特別而帶點和風味道。
兩個海鮮丼都好正,服務亦好熨貼,知道我哋喺一齊共享兩個海鮮丼,就拎兩隻小碗俾我哋用;此外,除不時為我哋添上抹茶,每道菜上枱都會介紹,尤其海鮮丼,真喺每一款食材都逐樣介紹,而且,侍應都非常有禮,整餐飯都讓人食得舒服、稱心。食套餐,香港人一般都期望喺包埋甜品及飲品,唯一希望可以「松」善如流,考慮定食可以改為兩者兼得,而唔喺任擇其一啦!

個人評分
味道:9/10
環境:8/10
服務:8/10
抵食:8/10
平均每人消費:HK$225

餐廳資料:
松 Matsu Japanese Restaurant & Bar
尖沙咀柯士甸路3號富好中心地下
3428 5938

沒有留言:

發佈留言