The Hwaduk：以逸待爐．好味韓雞

早前同兩個表姨甥女到訪過銅鑼灣一家韓式炸雞店，大家都好回味該次炸雞體驗，所以，再次相約品嚐同樣位處銅鑼灣嘅另一「雞店」，不過有啲分別喺店家只賣烤雞，佢個名就叫Hwaduk，韓文拼音烤爐嘅意思。

雖然同樣開晌銅鑼灣，但算為核心外圍嘅開平道，又喺樓上鋪，所以，當打開升降機門，無人頭湧湧嘅情況，環境卻喺閒適舒服，地方大啲，餐枱又感覺大啲，而且，枱櫈編排夠闊落。一邊有落地大玻璃窗，雖然唔喺咩靚景，只喺城市樓景，但讓人感覺開揚，亦喺較多人會選嘅位置；另一邊有啲梳化位，想坐得更舒服可以揀嗰邊。

近入口位間咗個小型用餐區，只放兩組枱，雖然私隱度稱唔得高咗，但相對內廳騷擾度一定細好多，遇着隔離枱無人坐，更感靜局。

餐廳最入嘅位置，透高玻璃窗可以睇到廚房內部，最矚目自不然喺嗰個白色而巨大嘅烤爐，採用咗意大利火山岩嚟做，晌餐牌內頁都有介紹。

順便睇睇埋餐牌，比一般同樣賣韓式炸雞烤雞店嘅菜式類別為多，除沙律、烤雞、韓式年糕、韓式煎蛋……外，仲有薄餅、熱鍋，樣樣類別都有三幾款選擇，每道菜附有圖片作參考，餐牌設計亦頗精美。

至於飲品方面，除韓式燒酒、啤酒、汽水外，有一列可配唔同生果嘅果茶、冰茶及特飲，算喺較特別之處。

芒果特飲$48、柚子蘋果特飲$48、藍莓冰茶$44

幾杯凍飲色澤鮮艷，晌炎熱嘅天氣，飲落令人透心涼，舒服爽快。而小弟所揀嘅芒果特飲，芒果味唔喺好強，似芒果梳打之類。

Cheese & Vegetables Salad $88

極為簡單嘅一道沙律，沙律菜、車厘茄再配上水牛芝士及車打芝士，淋啲黑醋就成，雖然唔喺咩花巧嘢，但食材靚就足夠喇，沙律菜入口嗦嗦聲，兩款芝士各有唔同質感同香味，拌點黑醋，酸香醒胃。

BBQ Chicken $178

焗得一碟烤雞香噴噴，外觀吸引，比炸嘅喺無咁油膩，但惹味度不減，只喺餐牌無標明辣度，原來都幾辣吓，食一、兩件當然無問題，不過，食多幾件就嚟料；幸而有啲韓式醃蘿蔔，可以中和一下個辣味感。此外，由於店方無睇膠手套提供，吓吓刀叉食起嚟無咁方便，而且，啲烤雞擺耐咗啲醬汁凝固晒，感覺無咁好！

Clear Seafood Tang $178

賣相當然無餐牌影出嚟咁多海鮮，但都算喺有齊八爪魚、魷魚、大蝦、蜆、青口……等，質素不過不失，但個湯絕對好得，鮮濃好飲；湯內仲有唔少烏冬，浸咗段時間都無話浸腍晒，點依道菜一定夠晒飽肚。

整體而言，食物都有一定嘅水準，辣嘅食物餐最好晌餐牌標明減少誤會，雖然，佢哋話會有同啲客講，但我又真喺聽唔到。除依一點，服務都好到位，店員都禮貌周周！

個人評分
味道：7/10
環境：8/10
服務：7/10
抵食：8/10
平均每人消費：HK$215

餐廳資料：
The Hwaduk
銅鑼灣開平道1號Cubus 21樓
2811 8821