2016年4月1日星期五

越裸 Le Pho:討人喜越

是夜老婆有飯局,本來諗住「求求其其」食個快餐就算,但後尾改變主意走上幾條街食越南粉,試試新嘢之餘,都發覺應該都好耐無食過越南嘢。「越粿」印象中就開無耐,因為久唔久都經過附近,個鋪位都好似轉過幾手,早前都仲喺吉鋪一個。
入門口就見到開放式廚房,所以,衛唔衛生一眼望落就知。而鋪位好修長,圍住個廚房喺一列吧位,晌餐廳尾得一張四人枱,目測成間餐廳大概15、16個位左右。裝修方面亦都好簡約,更無太多「越南」風情嘅元素,所以,賣嘅就喺賣味道。
小弟揀個角落位,靜局啲,又可以睇到師傅做粉。
相信喺環境嘅限制,所以,食物嘅種類集中晌幾款越南麵食及數款小食,一張A4紙青綠色餐牌就可以睇晒。
先打算食點細份量嘢,三文治連小食類別共有4款,店員推介試試個迷你黑武士,睇嚟幾有特色;另外,米紙卷亦想試試!
bowl迷你越南黑武士三文治 $35
基礎喺越式法包,但不獨喺迷你版,更改用竹碳包。細細件,較易入口,包內夾上燒豬頸肉、越南香腸、肝肉醬、酸甘筍絲、白蘿蔔絲,味道酸爽,卻又帶點辣勁,實在惹味,的確有啲意外驚喜。不過,有需要晌餐牌上加番隻「辣椒公仔」俾佢,唔食得辣嘅人可能覺得幾辣吓。
bowl蟹肉及天婦羅蝦米紙卷 $38
送到嚟發覺跟平時所見嘅好唔同,一身紫紅,原來卷皮混入紅菜頭汁,好有心思,未食都感到健康。卷內嘅炸蝦好香脆,又有唔少蟹肉,配料亦唔少,如生菜、青瓜、越式米粉,所以,口感富層次,卷皮入口煙韌,整體真喺唔錯!
bowl教父越南粉 – 火車頭 $98
店員話喺店中招牌,因為包咗好多材料,而且份量頗大,底下藏咗好多越南粉,竟然夠兩個人食喎!首先,個牛骨湯底好香,濃而不濁,事後始知原來湯底加咗牛骨髓同煲,用料十足,不過,溫提一下,店內只賣牛骨湯底,唔食牛嘅朋友就無福消受。
感覺上,放上嘅香料亦好似較多,但講到餸料,着實唔少,包括生牛肉(美國精選雪花牛肉)、牛尾、牛展、牛筋、牛柏葉……等等,味道做得有水準,充滿肉香,雪花牛肉好嫩滑,牛筋夠嚼勁,啲金邊粉口感都幾幼滑。為咗配合唔同客人嘅需要,以可剔走唔食嘅餸料或配菜。
點個教父越南粉,附送飲品,但送嘅都喺基本嘅檸水、檸茶、支裝汽水。
見餐牌有款Detox Water(排毒水)$35,好神奇咁,問過店員原來喺啲自家製、無添加、全天然嘅健康飲品,好值得一試。
雖然寫「coming soon」,問問店員,可能有局部供應,是晚就有3款,望落感覺都好清新,不過,店方暫時未為佢哋命名。
小弟試咗以無花果、杞子、紅棗為組合嘅排毒水,按店員介紹,有啲健康水用上椰青,而依一款則用梳打水,所以,飲落好爽,又帶有清甜嘅杞子及棗味,當中嘅甜味主要嚟自無花果。如果,餐飲可以加錢轉為健康水,咁就正喇!
由於小店經營,只收現金,星期日休息,所以,有心嚟幫襯就要注意吓。
雖然食物嘅選擇唔多,但在乎貴精不貴多,確喺討人喜悅,而且,記緊飲清個牛骨湯,一滴都唔好嘥,皆因精華所在。

個人評分
味道:8/10
環境:6/10
服務:8/10
抵食:7/10
平均每人消費:HK$85

餐廳資料:
越裸 Le Pho
中環蘇豪擺花街58號地舖
2803 1938

沒有留言:

發佈留言