雖則話以刺身丼為主打，但翻一翻餐牌，食物都有好多選擇，如串燒、定食、卷物、單品、刺身、沙律、前菜、飲品同甜品等等。
既然嚟嘅目的喺刺身丼，重點就落晌揀咩丼身上。最觸目自不然喺二段丼，即以兩層形式登場嘅丼飯。共有兩款恆常供應（極上海鮮二段丼及鮮二段丼）及一款季節限定（松葉蟹二段丼），有平有貴，悉隨尊便。
有二段，咁就自然有普通嘅海鮮丼，十數款選擇，定價$88-$178，正所謂豐儉由人。
若然唔喜歡有所限制，鍾意我選我所想，店家貼心增設「車仔」形式嘅自選丼，令選擇更具彈性。
弘丼 六本木 $188
晌十多款普通嘅海鮮丼中，選上咗「究極版」嘅六本木，足足包括8款海鮮食材（三文魚、海膽、三文魚籽、油甘魚、藍鰭吞拿魚赤身、藍鰭吞拿魚大腩、 蟹鉗 、帆立貝）， 餐牌清楚列明，童叟無欺！
賣相感覺奢華，除各類刺身，仲有點青瓜及甜蛋作伴菜，而每客海鮮丼都奉上味噌汁及漬物（蘿蔔、薑片、牛蒡）。就咁拎起嚟食都幾「拿搞」，所以，店員都會奉上小碟俾你擺起啲刺身再慢慢食。單睇外觀，啲刺身已感到有一定質素，而入口確喺啖啖鮮味，尤其啲赤身、大腩、蟹鉗及帆立貝，真喺鮮味盡出，要油潤有油潤，要爽口有爽口，正呀！
極上海鮮二段丼 $288
二段丼方面，其實都心郁郁想試試個松葉蟹二段丼，不過，好似主要得啲蟹，有又少少嫌麻煩，所以，最後都喺揀極上海鮮二段丼。一份所包括嘅海鮮食材有11款之多（三文魚、北寄貝、藍鰭吞拿大腩、三文魚籽、間八、帆立貝、蟹鉗、海膽、香蔥伴藍鰭、吞拿魚腩蓉、蟹膏），未食先興奮。
賣相可以講得上絕對浮誇，哈哈，但卻又實在誘人。唔單止碗面堆滿海鮮，疊起兩層，仲「機關」重重。
第一層主要喺各款刺身，其實跟上面分享過嘅刺身丼大同異，所以，就唔花太多篇幅再講。但值得再講，樣樣刺身嘅質量都無話迤過就算，好似北寄貝，唔喺平價貨「擦紙膠」嘅貨色；蟹鉗去咗部份殼，食得方便。
下層嘅食法有啲唔同，揭開上層，你會見到中間有隻溫泉蛋，而「餸料」喺香蔥伴藍鰭吞拿魚腩蓉、蟹膏及三文魚籽拌玉子碎，可以撈勻嚟食，不過，個人覺得太雜，都喺先個別食材獨立嚟食，知吓個味道喺點，臨尾先至撈埋一齊試吓個效果，小弟都喺認為分開食好啲！
蜜瓜泡沫 $38
店家有啲幾特色嘅飲品，貪得意又試一試，好似親友揀咗杯「蜜瓜泡沫」，依個系列仲有哈密瓜及士多啤梨味，不過，店員介紹話喺用上北海道夕張蜜瓜，喺咪咁堅呀？個造型幾得意，裡面仲插咗一條蜜瓜雪條，佢話個飲落似似哋打咗汽嘅蜜瓜汁，而個蜜瓜味又的確幾濃。
菠蘿乳酸梳打 $38
小弟就試咗杯乳酸梳打，5款味道中（巨峰、青蘋果、原味、菠蘿、夕張蜜瓜）揀心水嘅菠蘿味，基本上味道喺酸酸哋嘅有汽菠蘿汁，冰冰涼，幾清爽，不過，就算唔上話好特別。
食一趟極上海鮮二段丼真喺被人覺得好似幾富貴咁，所以，就即時諗起「富貴浮雲」個成語，或者第時一想起富貴嘅海鮮丼，就浮現出「弘」依間日本餐廳。老實講，小弟為生活仲有排捱，真喺未可以巴閉到視富貴如浮雲，視金錢如糞土，但總算生活有餘！
個人評分
味道：8/10
環境：8/10
服務：7/10
抵食：6/10
平均每人消費：HK$305
餐廳資料：
弘 CHIRASHI
灣仔灣仔道221A地下
2861 3001
弘 CHIRASHI
灣仔灣仔道221A地下
2861 3001
沒有留言:
發佈留言