2016年3月22日星期二

Fish & Chick Plus:一魚再遇

年幾前因為開通咗港島西延線,貪得意過咗去西營盤、堅離地城嗰邊搵吓食,其中一間喺Fish & Chick。最近,聽到好友講佢哋晌觀塘開咗新店,唔使過海自然方便少少我依等九龍人。原來,間店都開咗好幾個月喇。
對比起西環店,觀塘店明顯地方大好多,坐得較為舒服。而裝修一環,都喺以海洋為主題,所以,見到唔少相關擺設。牆身黃色撞藍,幾醒目,顯得有活力!
因為唔喺第一次光顧,所以,店內有咩食?咩喺主打?大致上都心裡有數,不過,店員話依度加插咗啲意粉同一啲特別菜式,咁除咗主打嘅炸魚薯條及烤雞,咁就不如再試試點新嘢。
友人喜歡湯品,所以,就點選咗其中兩款。湯類共有4款選擇,本來想試個清雞湯喺點,不過今晚就無供應,取而代之喺南瓜湯。
bowl南瓜湯 $40
色澤橙紅,落咗忌廉嚟調和,雖然入口個南瓜味唔算得好強勁,但感覺絕對清甜,而且,口感非常滑溜細緻。
bowl粟米蓉湯 $40
一啖落口就知有幾堅,清甜味比個南瓜湯更濃,粟米嘅味道極之突出,質感嘅稀杰度恰到好處,實在好飲。
bowl鮮奶咖啡 $30
小弟揀咗杯鮮奶咖啡,雖然拉花方面就真喺麻麻哋,不過,奶泡都算打得綿密,咖啡又幾芳香,叫做不過不失,結終佢哋主打唔喺賣咖啡,其實叫杯有汽果酒配吓炸魚、烤雞仲好,自覺有少少嗌錯。
特色推薦菜有好幾款,鹹鱈魚蓉、雞肉卷、白酒鮮蜆及炒魷魚仔等幾款,比較有興趣喺個蜆。
bowl白酒汁煮新鮮蜆 $90
嘩,估唔到都幾大份,有好多蜆,而且,吉殼唔多,夠晒足秤呀!雖然啲蜆唔喺好大隻,不過,就好新鮮,睇佢哋無邊隻煮唔開口就知啦;味道好鮮甜,帶少少鹹味,又幾厚肉,而且,個白酒汁煮得頗香,所以,食完啲蜆不妨當湯飲番幾啖,確喺唔錯。如果有啲餐包提供,更可以沾嚟食,記得晌馬交食葡菜有一道檸檬蜆,都喺食完個蜆,啲湯汁用麵包沾嚟食,好正架!
跟住就品嚐主菜嘅時候,就喺炸魚薯條,上之就試咗鯛魚、無鬚鱈魚,今次睇到餐牌上嘅魚類供應,又有唔同種類,仲標明來源地。
bowl大比目魚炸魚薯條 $130
嚟自格陵蘭嘅大比目魚(Halibut),印象應該未接觸過,加上寫明獨家供應,好奇心驅使就揀依一款魚做炸魚柳;魚柳本身會伴有好多薯條,又因為燒雞有伴菜,所以,炸魚柳我哋就無追加伴菜!
大比目魚柳裁得好大件,極為厚身,外觀金黃閃亮,炸得一身如披上金甲冑;一落刀就感受到有幾脆,應聲咔嚓裂開,睇到外層粉漿做得薄,入口極之香脆,魚肉則嫩滑鮮甜而富油香,雖然店家提供一隻亨氏麥醋,但同上次一樣都喺愛佢嘅自家製他他醬,酸咪咪,又唔會咁易整濕個外皮。至於薯條,睇到粗身而不規則,以人手切成,有薯仔味,脆而不油!
烤雞喺另一主打,見有一款黑松露烤雞,可惜是夜無賣,退而求其次就食番原味嘅法式烤雞,反正友人未試過。烤雞有全隻($180送兩款伴菜)或半隻($90送一款伴菜),而伴菜有蘑菇、燴雜菜、薯蓉、青豆、甜粟米和沙律菜可揀,人少少半隻雞就夠晒食喇!
bowl法式烤雞 $90
烤雞焗得金黃,並且散發出陣陣香氣,入口外皮帶點脆,卻唔油膩,肉質既嫩滑,又帶點露絲瑪莉香草味,水準依然。伴菜嘅青豆,睇落平平無奇,亦比晌超市見到嘅細粒啲,但卻喺更有豆味,再者,輕炒過又較香口啲。
bowl橄欖油炒香蒜片辣椒扁意粉 $78
講明意粉喺依間店先有,當然試試其手勢得唔得,意粉有6款選擇($68-$120),可選意大利粉、扁意粉或長通粉。我哋揀個中價嘅橄欖油炒香蒜片辣椒意粉,貪其簡而精。一上枱已聞到超香蒜味,確實,睇樣都見到扁意粉混入唔少蒜片。每炷意粉都充滿蒜香,餐牌顯示1隻「辣椒仔」,其實都帶點辣勁,而意粉口感啱啱好,咬落煙韌!賣相上,如果捲一捲起先落碟,就更好喇!
晚飯尾聲,少不了甜品作結,自家製甜品一共有6款,比起以前晌西環店嘅多,而且,種類都唔同,應該滿足到大部份人嘅喜好。
bowl朱古力軟心蛋糕 $65
友人誤會咗喺心太軟,無流心而感到失望,其實個朱古力軟心蛋糕嘅朱古力味好香濃,味帶苦味,中間軟心就更濃郁軟滑,感覺就喺迷你版半熟蛋糕;再拼埋雲呢嗱雪糕一齊食,一凍一熱,爽呀!
bowl超脆蘋果撻配雲尼拿雪糕 $65
講到超脆,又真喺並非浪得虛名,以酥香嘅酥皮夾薄薄嘅蘋果片,新鮮熱辣即食的確香脆,不過,蘋果片刨得超薄,所以,食落蘋果味唔突出,個人感覺有啲美中不足。如酥皮中間再夾入啲蘋果蓉一同焗,效果唔知又會喺點?
再嚟多次Fish & Chick,唔止英式炸魚保持到高水準,法式烤雞亦都不俗,而新出品嘅白酒煮蜆及蒜片辣椒扁意粉同樣做得出色,朋友亦非常欣賞!

個人評分
味道:8/10
環境:8/10
服務:8/10
抵食:7/10
平均每人消費:HK$230

餐廳資料:
Fish & Chick Plus
觀塘觀塘道414號1亞太中心(OPC)3樓302號舖
2970 0003

沒有留言:

發佈留言