2016年2月15日星期一

Otto Restaurant:蝦蝦笑.迎開年

過年前,跟家人、親友好多團年飯要食,所以,跟相熟食友嘅聚舊,就留待過年後食番餐開年飯。雖然喺開年,但卻喺食西餐,打破啲慣性嘛。選址Otto Restaurant,貪其夠靜局。
餐廳分兩層,我哋被安排上層用餐。其實上下層地方都唔大,但裝修高雅,燈光柔和,環境甚有氣氛,而店員都刻意將客人分隔開少少,減低彼此嘅騷擾。
菜式有散點,亦有套餐選擇,睇落套餐較為划算多啲。而套餐包咗餐前小食、餐湯、前菜、主菜、甜品及餐飲,收費取決於主菜嘅選擇。由於稍後時間會轉餐牌,所以,部份菜式有所變動已轉為新嘢。
bowl鮮拆蟹肉他他杯沙律
以雞尾酒杯盛載嘅餐前小食,一啲都唔小食樣,更喺華麗登場。店員溫馨提醒,因為喺鮮蟹拆肉,雖然可能性低,但都怕有點點蟹殼碎。蟹肉入口果然好鮮味,伴有黑魚籽及三文魚籽,鹹鮮十足,味道更富層次。原來夾雜晌沙律菜中嘅喺食用花,既美觀,又可食用。
bowl活龍蝦石鍋濃湯
賣相好特別,以紙包形式,店員話之前唔喺咁,依家少少改頭換面,但味道不變。一剪開個「紙袋」,龍蝦味一湧而出,由於用咗韓式石鍋,更耐熱,影多陣相都唔怕攤涼咗。滔一小口,口感順滑,味道超濃郁,有些微甘苦,而大大件波士頓龍蝦肉,咁先食得過癮。
bowl波士頓龍蝦酥盒
龍蝦湯都意猶未盡,再嚟多個又喺以龍蝦做嘅前菜,搵酥皮做成脆盒,放入龍蝦蘑菇忌廉汁,蝦肉好鮮,圍邊嘅酥皮好鬆脆,不過「盒底」唔知何故頗韌。
bowl青檸雪葩
試咗幾道菜之後,又喺時候清清味蕾,賣相清爽嘅青檸雪葩,除咗伴有士多啤梨及青蘋果做裝飾,最有驚喜喺雪葩之下加入青蘋果粒及乳酪,好有畫龍點晴之效,清新好食!
稍稍抖一抖之後,就喺主菜進場,未食之前,店員為我哋奉上餐刀盒,有重有輕,選好一把自己心水,慢慢享用各款主菜。值得一提,就喺佢哋個出菜,每個類別嘅菜式都會一次奉上,服務夠專業。
bowl香煎鵝肝意大利飯 $388
咩都唔使講,單睇件鵝肝嘅尺寸已值回票價啦,厚切超大件,煎得或面都非常甘香,入口油潤粉嫩,飯粒煙韌極有咬口,好滿意!
bowl海龍王紙包深海鱸魚 $448
再一道紙包菜式,但今次用嘅喺高溫玻璃紙,頗特別。雪白嘅深海鱸魚有4大件,入口非常嫩滑,肉質細緻鮮味;而下面墊有唔少鮮露筍、本菇、意大利黃瓜……等等,浸晌魚湯中,味道鮮甜。當然,別錯過窩內魚湯,否則就走寶喇。其中一位友人喺魚痴,真喺食得佢「魚」痴如醉。
bowl堡雲蘇紐西蘭羊鞍 $488
羊鞍就最啱我啦,咪睇佢好似好生,已經唙4-5乘熟,切落又唔會有血水滲,所以,肉質細嫩,少少羊羶,突出到羊肉嘅個性;加上以堡雲蘇處理,讓羊鞍嘅邊位因黐滿麵包糠而入口更香脆。伴菜有唔少鮮露筍及迷你甘筍,店員話個黑松露燒汁喺沾伴菜食,話怕燒汁搶咗啲羊味,但錯有錯著,沾羊鞍都唔錯喎,仲有,一小兜喺蘑菇薯蓉,本身已幼滑好食,最神來之筆喺晌上面加一抹蛋黃醬,添幾分酸香,令食味更有變化及層次。
bowl西班牙黑毛豬 $498
店方建議5-7乘熟最好,雖然豬肉,就大膽啲揀5乘啦,其實記得以前曾晌Metal Steak試過一款西班牙黑毛豬鞍扒,可以食得好生,最好就喺3乘,所以,今次5乘應該唔算膽粗粗啦。黑毛豬已裁成細件,方便我哋共享,色澤嬌嫩,外層香脆,入口肉汁仍然豐盈,肉質比想像中更嫩滑,簡單沾少少海鹽,更帶出肉味。同樣,伴有黑松露燒汁及蘑菇薯蓉。
bowl鮮奶咖啡
雖然無拉花,但入口還算醇香,只喺跟奶泡唔夠均勻,欠缺柔和口感。
bowl熱檸茶
友人嘅熱檸茶,喺立頓茶包沖泡,整壺上,飲罷清清油膩,再為甜品進發。
甜品以拼盤形式送上,大堆頭,包括藍莓芝士餅、玫瑰蘋果酥、天鵝泡芙及朱古力蛋糕,賣相得幾靚,但水準中規中矩。藍莓芝士餅其實幾好食,不過,改用撻底做有點怪;玫瑰蘋果酥好有蘋果香,但又喺酥皮出問題,唔酥脆;天鵝泡芙不過不失而已;而朱古力蛋糕普通之餘,無乜朱古力味。
雖然,部份菜式仍有瑕疵,尤其有用酥皮做嘅菜式,但整晚裡,晌嘻嘻哈哈笑聲中渡過,好不高興快樂,言談間知道大家都好忙,下次再聚又可能幾個月後,希望,下次可以更齊腳!

個人評分
味道:7/10
環境:8/10
服務:9/10
抵食:7/10
平均每人消費:HK$500

餐廳資料:
Otto Restaurant
銅鑼灣駱克道487-489號駱克駅16-17樓
2893 8617

沒有留言:

發佈留言