2016年2月6日星期六

奇華餅家 Kee Wah Bakery:熊福齊天

早前晌雜誌見過奇華餅家依個「熊貓賀年禮盒」($108),造型既得意,紅噹噹又夠應節,所以,今年我哋屋企連全盒都唔使預備,一於用佢嚟當埋全盒,反正,都無乜人嚟拜年,都喺當自己晌屋企嘅過年零食啫,哈哈。
賀年禮盒面嘅熊貓着上唐裝,笑臉迎人,手揸寫上福字揮春,仲唔喺「熊」福,加上今天猴年,晌邊度都見到「齊天大聖」,個標題非「洪福齊天」莫屬啦!
打開盒內共有5款賀年零食:熊貓曲奇(4件)、炒米餅(4件)、炸油角(4件)、手製南棗合桃糕(5件)及手製南瓜籽脆糖(5件),各有特色,全部獨立包裝,乾淨衛生。其中曲奇、合桃糕、脆糖都曾試過,的話好食,所以,百試不厭。
bowl熊貓曲奇
超萌嘅熊貓造型喺其賣點,曲奇質感非常鬆化,牛油曲奇夾朱古力曲奇,前者香,後者濃,平衡好食。
bowl炒米餅
細細時經常食嘅賀年嘢,入口先脆後鬆化,又好有杏仁及花生香,嗒落仲有粒粒杏仁及花生粒,絕無欺場。
bowl炸油角
細個年年幫姑媽摺油角,我摺油角都好有一手架,不過,越嚟越少食炸油角喇。啲油角都頗香脆,外皮酥香,內裡填滿花生粒及白芝麻,又唔太甜,實在不俗。
bowl手製南棗合桃糕
南棗合桃糕煙糯卻唔黏牙,南棗味濃,又混有好多合桃,甜中帶苦,又夠咬口;此外,南棗、合桃都喺有益嘅食材,尤其對女生而言,更加啱食,所以,老婆超鍾意。
bowl手製南瓜籽脆糖
單單就喺南瓜籽配麥芽糖嘅組合,就已經做出酥脆香甜嘅脆糖,甜而不膩,南瓜籽有降血脂之效,又喺屬於健康食材,不過,始終喺甜嘢,適可而止啦。
過年除咗糖果,又點少得啲糕點!早前晌奇華嘅工作坊試過佢哋全新推出嘅「紅棗糖年糕」($85),覺得幾好食,所以,趁過年都煎番一底俾老婆試,順便作為是日早餐。其包裝好有過年意景,盒面印有小孩拜年彩繪,熱鬧高興,仲寫住「步步糕陞」。
年糕色澤較深,成份好簡單,就只有紅棗蓉、木薯澱粉、片糖同埋糯米粉,更重要喺無咩添加嘛!況且,紅棗營養豐富,可補氣血,可講喺女生恩物,所以,又喺好啱老婆食。沾蛋漿煎喺最基本,唔怕疊起時黐埋一嚿嚿。
無添加,又無乜化學嘢或調味劑
bowl紅棗糖年糕
年糕食起嚟棗味馥郁突出,唔知喺咪加咗木薯澱粉,黏糯煙韌中帶有少少「爽」嘅感覺,上次晌工作坊食嘅時候都唔覺,總之,同樣好味,配啖熱茶,就喺我哋大年初一嘅早餐。
今年收到朋友及親友嘅糕點唔算多,但加埋老婆自家製嘅蘿蔔糕,都夠晒過年依幾日食!

個人評分
味道:8/10
環境:7/10
服務:8/10
抵食:8/10
平均每人消費:HK$50

餐廳資料:
奇華餅家 Kee Wah Bakery
荔枝角青山道666號
2743 7727

沒有留言:

發佈留言