2016年2月28日星期日

I's Land Cafe:廠出我天地

好鍾意個店名,Island解一個個嘅島嶼,但加多一「'」,就變成我嘅天地。好多人都想闖一番事業,做開飲食嘅當然希望有朝一日有自己嘅店,鋪租高昂喺人都知,但唔少餐廳都晌各區嘅廠廈開花遍地。嚟到I's land,睇見佢嘅環境,就好有依一種感覺。
走進店中,地方偌大,以木系為主調,加上唔少「綠化」裝飾,好有田園色彩,翠綠盎然,再者空間十足,讓人感到好舒服。嚟到食嘢嘅客人,感覺都唔喺匆匆趕趕,更顯悠閒。
講明晌度咁好迤,除咗撳手機,餐廳提供唔少多元雜誌,餐後嘆住杯咖啡,睇睇雜誌,何其優哉游哉!
4頁紙嘅主餐牌以飲品及甜點為主,款式繁多,前者嘅種類有咖啡、茶品、花茶、果汁及沙冰;後者則有乳酪杯、雪糕、窩夫及蛋糕。
主食則以午餐、晚餐形式供應。午餐包括餐湯或沙律、主菜及餐飲,定價$58-$98,餐飲可選啡、茶或是日果汁,任何跟餐飲品可加$15升級至梳打飲品,又或補差價(正價減$20)升級享用其他飲品。
雖然正值午餐時段,見有客人正品嚐英式悠閒下午茶餐,原來依個餐喺近乎全日供應,$210兩人份,睇落好似幾特別,所以,就點兩份午餐,加一份英式悠閒下午茶餐。順帶一提,店方確喺另設有下午茶餐(2:30pm-6:00pm),喺基本嘅一份食物加一杯飲品嗰類下午茶。
bowl羅宋湯
午餐嘅餐湯或沙律,我哋揀晒餐湯,因為一陣個英式下午茶本身有沙律。是日餐湯喺羅宋湯,色澤艷紅,酸酸辣辣,我成日形容佢喺鬼佬嘅酸辣湯,味道雖無驚喜,勝在平穩夠濃郁。
bowl香蔥忌廉汁花枝海蝦天使麵 $88
雖則個賣相平平,但味道唔錯,忌廉汁幾香,而啲天使麵一向好易煮過火,但佢哋都算煮得啱啱好,況且,3大隻海蝦加埋唔少魷魚,都幾鮮甜,仲有啲菇菌,算交足貨。
bowl美國頂級西冷拼薯菜 $98
件牛扒雖然薄薄哋身,但都幾大塊,西冷位主要食佢個肉味,肉味都幾濃郁,肉質極具咬感;伴上厚身薯角、雞脾菇、翠玉瓜,不過,個人唔太鍾意佢哋幾件扒放晌薯角上,啲汁容易整腍啲薯角!
bowl英式悠閒下午茶餐 $210
以開邊嘅雀籠盛載3層鹹甜美食,絕對喺其最大賣點。理論上,食嘅次序應由下而上,沙律、鹹點、再到甜點,不過,我哋都已食過啲午餐嘅主菜,輪到食個下午茶餐其實都變得無所謂,但小弟都依番個由下而上嘅次序去寫。
bowl下層
和風鮮蝦沙律,先試吓個沙律,以玻璃杯盛載,大家都方便食用。沙津菜、車厘茄、火龍果及鮮蝦,用簡單嘅組合,取勝在於食材新鮮。不過,醬汁非胡麻,喺柚子醋配香草,味道清新。
忌廉香草田螺酥盒,的骰小巧,牛油撻皮好脆口,亦滿有牛油香,而酥盒內有洋蔥粒、菇菌粒及主角田螺,味道不俗,要挑剔就喺唔夠熱辣,欠缺一點香氣。
bowl中層
煙三文魚香草多士,雖然煙三文魚好夠油潤,配以香草醬,夾雜煙燻香,味道基本上唔錯,多士亦烘得甘脆;不過,因為下一款亦喺方包類,所以,顯得佢無咩太大特點。配法包或意大利香草包,會否更有個性呢?
扒芝士火腿三文治,其實喺芝腿治烘底,不過,因為應該喺做好先壓烘,所以,芝士變得香軟,奈何款式都喺大路,較難有咩驚喜。
荷蘭忌廉卷,即迷你瑞士卷,做得嬌小的骰,海綿蛋糕清香軟綿,忌廉亦打得軟滑少甜,同樣喺味道唔差,卻難令人有深刻印象。
bowl上層
檸檬芝士餅,餐牌原先註明喺南瓜芝士餅,但店員解釋有部份甜點會因供應不時轉換,但盡量都以同類型嚟代替。件芝士餅質感好柔滑,消化餅底又夠薄,味道檸香清新,芝士味唔太搶,以致兩者都做到平衡共融。
北海道3.6牛乳布甸,牛奶樽嘅牛乳布甸,入口口感細滑溜口,啖啖充滿奶香,好味。
bowl熱鮮奶咖啡 +$16
正價賣$36,跟餐補番差價(即正價減$20)。好鍾意佢墨綠色瓷杯,極配合個環境,色澤油亮。至於杯鮮奶咖啡,沖調得好細緻,濃縮咖啡與奶泡撞得好均勻,拉花形態細膩。
bowl熱泡沫鮮奶朱古力咖啡 +$18
朋友話朱古力咖啡飲得多,但以朱古力夾意大利泡沫咖啡就第一次,面頭厚厚一層泡沫,入口輕柔,下層嘅朱古力咖啡跟平常飲到嘅差唔多。
bowl雜莓沙冰 +$28
朋友所選嘅沙冰,賣相又幾靚喎,雜莓嘅果香味突出,冰涼酸爽,內裡仲混有唔少藍莓粒,不過,朋友話打得唔喺完全,久唔久有啲冰粒,唯美中不足之處。
兩份午餐嘅味道不俗,定價亦合理;至於個英式下午茶,唔差亦唔叫好,原因喺款式上總欠缺一啲亮點,食材亦較為普通,食罷卻未能令人有深刻印象嘅感覺,覺得仍有好多提升嘅空間。論及環境,着實讓人寫意悠閒,招呼亦非常勤快,又唔收加一,確實可令人渡過愉快嘅時光。 

個人評分
味道:6/10
環境:8/10
服務:8/10
抵食:7/10
平均每人消費:HK$115

餐廳資料:
I's Land Cafe
觀塘開源道62號駱駝漆大廈1座6樓A舖
5307 3636

沒有留言:

發佈留言