煤氣烹飪中心 Towngas Cooking Centre：晌煤氣學整扒，一掃霉氣！

早前參加遊戲，中咗張煤氣烹飪中心（www.towngascooking.com）嘅禮券，烹飪中心嘅課程都幾豐富，幾多選擇。小弟都算喺個食肉獸，所以，最後揀咗個「Cook for Love on Valentine's Tuesday-Menu 2-香煎黑椒肉眼扒」實習班，課程費用$400，感覺都幾貴，但又可以帶一位朋友同行，變相$200一個人，又喺實習班，有得煮又有得食，仲有兩道菜示範，划算到極。

個廚房都唔細，印象中好似有9-10個爐頭，爐頭設計得比一般廚房矮，原來喺因為可以俾啲親子班用，另一邊就仲有個大廚房，不過，因為上緊堂就唔方便參觀。

田園雜菜湯 

先喺示範菜式，因為煲湯需時，所以，課堂一開始就先煲湯，由於唔喺需要好高技巧嘅烹飪班，所以，個湯都非常易做，都喺洗洗切切，跟導師咁按步就班應該返到屋企自再整，失敗機會喺零。

香煎黑椒肉眼扒伴薯蓉 

輪到今堂嘅戲肉，當然大家都更投入。今堂嘅導師Kaley都幾好，講咗唔少扒類嘅資訊，如牛柳、西冷、肉眼、T骨嘅分別，因為當中真喺有第一次入廚嘅人。件扒除咗清洗之外，由醃到煎，導師示範完一次就輪到我哋落手落腳做；此外，講明喺伴薯蓉，亦要親力親為自己搞，不過，由於薯仔有中心職員一早烚好，又有薯蓉夾，我哋都只喺剝皮，壓蓉，調味，拌勻而已。

長話短說，雖然小弟單拖，但一樣可以晌短時間內搞掂煎牛扒、搓薯蓉。而中心提供嘅份量真喺唔嘢少，兩大件肉眼，每件相信超過10安士，所以，今餐我就認真豐富咯。 

晌依道學煮嘢有樣嘢幾特別，就喺煮好之後會晌隔離個「飯廳」度食。一大張餐枱，鋪好枱布，擺好餐具，連埋之前煮好嘅湯，及後上嘅雪糕，有前有後，更備有啡茶招呼，成套晚餐，又幾盞鬼嘅煮飯仔學堂！ 

卒之搞好可以開餐，自己評自己，或者有啲唔客觀，但睇樣都煎得有板有眼。件肉眼肉質唔錯，頗有肉味，只喺嫌筋位多；我啲薯蓉亦調得幼滑，但重手咗落香草，搶咗少少薯味。

雲呢嗱雪糕伴無花果黑醋濃汁

最初初以為個雪糕會有鮮無花果做伴碟，原來喺支黑醋叫「無花果黑醋濃汁」，亦喺個甜品嘅主角，因為喺Jamie Oliver嘅產品。其實雪糕淋上黑醋都唔喺第一次食，所以，唔會有咩驚喜，但支黑醋又的確幾醇香。

一個人食晒成碟超過廿安士嘅扒，真喺飽到上心口，所以，薯蓉食少少，剩番嗰啲打包攞走唔好嘥。導師話，啲扒煎成就最好即食，新鮮煎好即食大家都明啦，但窩心在如果你怕晌度食唔晒，又或唔想晌度食，兩件扒喺可以拎走返屋企先煎嘅，真喺好別出心裁嘅烹飪班。

個人評分
好玩指數：9/10
抵玩指數：8/10
實用指數：8/10

餐廳資料：
煤氣烹飪中心 Towngas Cooking Centre

銅鑼灣波斯富街99號利舞臺廣場9A

2576 1535