2016年1月24日星期日

海薈 My Harbour:後薈有期

睇鐵達尼時,覺得啲郵輪好犀利,好似幢漂浮大樓咁,成幢十幾層高嘅大樓晌海中游嚟游去,裡面吃喝玩樂乜都有。人生中都托賴去過唔少地方旅行,不過就從未坐過郵輪,今日同朋友嚟到啟德郵輪碼頭,可惜,都唔喺上船,只喺嚟海薈食餐晏仔,順便遊一遊依個大碼頭。
個碼頭真喺好大,一頭一尾行一次都要10分鐘,天台有個空中花園,原來喺屬於康民處管理,又打理得唔錯,更有多處草地,可惜,是日天公不造美,啲雨落唔停。此外,又無乜商鋪,主要都喺得幾間食肆,感覺個碼頭似有好多先天不足。
遠眺中環景
九龍灣、牛頭角一帶
既來之,則安之。餐廳位於空中花園樓最尾嘅位置,如果搭小巴去到總站落,沿扶手電梯上到頂就喺喇。其實,餐廳佈置幾「骨子」,黑白格仔地磚,拱形天花,帶少許復古味,餐廳尾又有個小舞台,專俾人包場搞活動用。
裝修外,餐廳內亦有好多小擺設,如出面個舞台啦,枱上嘅「燈泡」亦都好得意,望落令食餐飯都會感覺多一點情趣。
餐廳主打原來喺龍蝦,雖然,我哋嚟食晏,都八啩吓佢個散點主餐牌,睇睇咩價位,下次有機會嚟食都可以當個參考。
平日有午餐供應,今日就喺半自助午餐。包是日餐湯、自助沙律吧、自選主菜、精選甜品及餐飲,收費視乎所選主菜,定價為$118-$298 + 10%。
bowl麵包籃
服務上都睇得出花咗唔少心思,就好似麵包一環,都提供咗3款之多,而法包真喺塗滿蒜蓉牛油,側旁更備有小型焗爐,既可烘番熱啲麵包,又可新鮮即做脆口蒜蓉多士。
bowl意大利雜菜湯
是日餐湯就放晌出面,想飲多少就自行滔多少,味道唔算話好突出,酸香平穩,但用料十足。
bowl沙律吧
用料比較大路、普通,沙律菜、雞心豆、菠蘿、青瓜片、紅腰豆及粟米粒,配料有啲芝士粉、煙肉碎及麵包粒,反面醬汁出奇地多,除油醋,仲有微辣蕃茄沙律汁、千島醬及芝麻沙律汁。順帶一提,裝油醋個喺闊口樽,好難控制倒出嚟嘅份量,好易倒過籠。
既然沙律吧嘅材料唔多,就一碟過加晒去,再下點芝麻沙律汁,糝多少少芝士粉及灑點煙肉碎,就成為小弟嘅前菜沙律。因為唔喺好特別,食一次大大份就阿晒喇!雖然啲雞心豆、菠蘿、紅腰豆、粟米粒都喺罐頭貨色,幸而啲沙律菜頗為新鮮爽脆,芝麻沙律汁又幾香口。
bowl生果盤
此外,仲有數款生果供應,是日就見有士多啤梨、火龍果、西瓜及哈蜜瓜,就放晌沙律吧旁,供客人自由取用。
主菜共有6款選擇,包括意大利粉、天使麵、炸英式魚柳、釀雞胸、肉眼扒及波士頓龍蝦,我哋揀選中價位嘅釀雞胸及肉眼扒。
bowl鮮菌黑松露慕絲釀雞胸配紅酒汁 $148
又要再讚多次佢哋啲服務,明知兩道主菜喺與朋友共享,就已經俾家隻細碟我哋用。講番道釀雞胸,雖然擺盤比較簡單,但功夫做足,件雞胸以鮮菌搭黑松露醬捲好再煎香,雞胸肉質算嫩滑,裡面嘅鮮菌黑松露「慕絲」好芳香,沾一點紅酒汁就更滋味。
bowl美國特級肉眼扒配紅酒燒汁 $188
肉眼扒非常足秤,燒得外皮帶脆,更插有一支露絲瑪莉,當然姿勢大過實際,而件扒好有肉味,雖然朋友要七分熟,但入口又唔韌,亦唔多筋位,喺幾有質素嘅一件肉眼扒。兩道主菜嘅配菜亦無「求其」,原個焗新薯頗有薯味,意大利黃瓜、翠玉瓜……等等都烤過。
餐飲方面,意外地唔喺只包一般茶啡,揀啲特色咖啡都可以,所以,小弟就按慣例一杯鮮奶咖啡,朋友就貪有趣要一杯盆栽咖啡。
bowl鮮奶咖啡
無乜花巧嘅一杯鮮奶咖啡而已,單單牛奶、奶泡加濃縮咖啡嘅組合,雖然攪勻之後,口感都喺醇香幼滑,不過,就睇唔出沖咖啡嘅手勢。
bowl盆栽咖啡
其實喺普通嘅咖啡,加入忌廉,再灑上Oreo餅碎做裝飾而成,不過,賣相搶下唔少分。至於味道,朋友話跟飲一般咖啡分別唔太大,只喺多咗啲Oreo朱古力餅食吓。
bowl法式甜品
隨咖啡送到,就順便上埋甜品,不過,餐牌寫下「法式甜品」,加上佢主餐牌一系列嘅甜品都喺好嘢,令小弟有過份嘅期望添。結果,喺小弟諗多咗, 甜品只不過喺每人有兩小件慕絲蛋糕(朱古力、士多啤梨及芒果口味),幸好下層嘅海綿蛋糕好鬆軟,上層嘅慕絲好滑溜,只喺「款式」太普通啫。
補充一句,消費滿$300有兩個鐘泊車回贈,而當日的士單可當$30消費額,所以,如果湊夠4-5人,由九龍灣打的比坐專線小巴划算。
整體而言,其實餐廳環境唔錯,食物(主菜)亦有一定水準,服務都非常妥貼,只喺位置有少許隔涉;同埋,啟德郵輪碼頭個設計真喺麻麻,既然一邊喺海景位,無理由攔實晒架,嘥鬼晒個海景景觀。

個人評分
味道:7/10
環境:8/10
服務:9/10
抵食:6/10
平均每人消費:HK$185

餐廳資料:
海薈 My Harbour
九龍灣承豐道33號啟德郵輪碼頭頂層花園S302號舖
2748 1668

沒有留言:

發佈留言