2015年12月12日星期六

甜蜜蜜新生咖啡店 Teresa New Life Coffee Shop:蜜蜜支持

雖然唔喺經常幫襯社企,但都衷心支持佢哋,尤其依家做飲食本身都唔容易,個人覺得,就算作為社企都唔可以單以做慈善嘅心態去營運,所以,見好多社企搞嘅餐廳都好低調,當然晌營運上唔喺一個好策略,就好似依個晏晝嚟到嘅甜蜜蜜生活咖啡店,其實,都開咗好多年,仲要打着紀念鄧麗君嘅旗號,但好多人都唔知有佢個存在。唔一定要求賺好多,至少要有盈利先可以長期維持。
小弟唔喺咩君迷,但都好尊敬依位藝人,當然,如果你喺君迷,牆上有好多佢晌唔同年代嘅照片,另一邊又有佢嘅往史、唱片、書籍、紀念品,靠窗嘅大銀幕更不停播放佢嘅音樂片段,唱出不少名曲,都好讓人緬懷。
唔知喺咪社企關係,整間店嘅枱椅安排都唔似一般商業咁用到盡啲地方,感覺顯得闊落。
散點餐牌以外,更有午餐、下午茶餐、晚餐供應。
而下午茶餐有8款選擇,定價$35-$48,包一杯即磨咖啡或$20以下飲品。晌出面櫃位點餐、俾錢,再拎個號碼牌返埋位,到時就有店員送餐上嚟。
bowl雜菌湯有機意粉 $35
老婆食素,故揀依一個意粉,奶白色嘅湯其實喺忌廉湯,不過奶味偏重,而意粉份量頗多,質感無過腍,配上菇菌及翠玉瓜,但整體有少少街坊茶記嘅水平,唔好太大期望。
bowl茄蓉煙鴨胸飛碟 $35
一客有兩件飛碟,作為下午茶都算足夠。其實,飛碟搵機整,都無乜難度可言,但勝在唔少料,而且,落咗幾多茄蓉,酸香醒胃。
bowl低糖有機豆漿
老婆一向講求健康,既揀豆漿,仲要低糖。要得低糖,就預喺淡口啲,然而,豆味亦唔算強,所以,唔啱我,好淡味。
bowl即磨咖啡
本身散叫杯即磨咖啡要$25杯,依家心理上加多$10就有多樣嘢食,感覺好划算咁,哈哈!咖啡自行加糖加奶,細心位啲奶喺熱嘅,亦睇到佢哋都有用心。而且,砂糖用採用公平貿易嘅產品,讚!
講咗咁耐,咪淨喺想住佢喺鄧麗君主題餐廳,而佢作為一間社企,目的喺幫助精神病康復者重建新生,有機會都不妨支持吓。
出門口時,仲見佢哋搞埋咖啡拉花班,又有得包場,而且,睇落場費唔高,算喺為餐廳增值。
雖然,以鄧麗君作為餐廳嘅主題喺其賣點,不過,始終唔喺好多人喺佢嘅粉絲,嚟幫襯嘅人都只喺當佢喺間普通嘅咖啡茶室,故還原基本,都喺要做好啲食物先夠長遠。

個人評分
味道:6/10
環境:7/10
服務:8/10
抵食:7/10
平均每人消費:HK$35

餐廳資料:
甜蜜蜜新生咖啡店 Teresa New Life Coffee Shop
尖沙咀港鐵尖東站地面35號舖
2723 6634

沒有留言:

發佈留言