2015年12月27日星期日

灣畔軒 Seashore Cuisine:搵食唔使轉灣抹角

老婆完咗一個學期,真正可以抖吓,趁著假期,同佢走咗入嚟梅窩行吓,仲計劃晌銀礦灣渡假酒店住番一晚添。本來打算踩吓單車,行吓山,不過,天公不造美,啲長命雨由到步酒店無耐就未停過。戶外活動被逼取消,連帶晚飯也費事行出去周圍搵,結果就晌埋酒店餐廳度食,唔使轉彎抹角,直截了當。
好多人只識叫依度做銀礦灣酒店餐廳,其實佢正名叫「灣畔軒 」(Seashore Cuisine),此外,門口左右兩邊露天位查實又喺兩間餐廳,出門口向左嘅主力為露天茶座喺「海天一色」(Blue Horizon Café),向右嘅喺「聽濤吧」(Bayview Lounge)。當然,因為住咗晌度先知佢哋有別,不過,好多客人都睇為佢哋為一體,只喺當為室內、室外之別。
除因天雨關係,點解會揀晌度食?本身無睇過相關食評,只喺見佢做緊半自助晚餐,都喺$188位(原價$238),住客仲有八折,雖然入去睇過吓自助食物唔算多,但主菜嘅選擇好似又幾唔錯,計過出去食餐好好哋都百幾蚊位(碼頭附近嘅熟食中心、粉麵除外),倒不如晌度食吓、傾吓、上吓網仲好打發時間啦。
補充一下個環境,四正整齊,一室潔白襯少少蘋果綠,無乜花巧裝飾,但感覺卻有少少飯堂格。正值仲喺聖誕及新年期間,仲有些少聖誕佈置,而講到成場最搶眼又好吸引到啲小朋友,就喺間聖誕餅屋。
整間酒店嘅食物,無論「海天一色」或是「聽濤吧」,都可以講話喺由「灣畔軒」製作,依度星期六晚有燒烤自助晚餐,星期日至五則提供歐陸半自助晚餐;其實更有中菜、泰國菜、越南菜及其他西式菜餚供應,真喺包羅萬有。
晚餐套餐
講番個歐陸半自助晚餐,6:30pm食到9:30pm,餐湯、沙律、冷盤、甜品、生果、啡茶自助,主菜方面就6揀1,雖然個餐牌有寫有咩沙律、甜品,但都喺流流哋,但一句款式視乎供應而定,所以,有咩食都喺睇當時現場。
bowl餐湯
餐湯只有一款,就喺白菌忌廉湯,質感麻麻,好杰身,只喺得啲忌廉味;反而,後尾轉咗另一款嘅羅宋湯(倒不如一開始提供兩款湯俾啲客人揀),味道仲好,較濃郁。
白菌忌廉湯
羅宋湯
bowl沙律、冷盤
一張大食物枱擺晒所有沙律、冷盤,前者晌餐牌所列嘅款式就一樣都無,因為嗰啲預製沙律製作需時,較麻煩,現有提供嘅就喺兩盆沙律菜、車厘茄、粟米粒、紅腰豆……等等現成材料,配千島醬及香草油醋,期間亦只轉過青瓜片,可見誠意有限。
冷盤方面,凍雞、露筍仔、芝士蕃茄、海蜇、煙三文魚,後尾仲加咗啲凍肉拼盤、巴馬火腿、鵝肝醬,質素睇落你都知麻麻。
前後兩轉,叫做試過晒所有嘢,依家作個簡評。啲羅馬生菜爽就爽,但似一早整好放入雪櫃好耐咁,有啲啞黃,反而菠菜葉就幾好食;凍雞,你當無酒味嘅醉雞咁食,幾爽嘅,露筍仔及海蜇同樣喺爽口嘢;不過,芝士蕃茄唔得,擺明烘過,但當凍食,啲芝士好似軟膠咁,煙三文魚亦麻麻,雖然砌得靚靚,但又喺雪咗好耐咁,瘀瘀哋色,味道還可以,巴馬火腿都喺同一問題,入口亦唔夠油香。
bowl岩鹽燒日本黑豚肉配黑松露汁 
小弟揀咗一客黑豚肉作為主菜,賣相不俗喎,伴有少少薯角同西蘭花,最為驚喜喺個份量,睇相你就見,件黑豚扒好大件,仲掛住兩支骨,又燒得扒面帶焦脆,簡單岩鹽調味,加上肉質比預期嫩,有種挺實而爽嘅感覺,確喺唔錯。沾一點黑松露汁,可以講喺錦上添花而已。
bowl法式鴨腿配香橙汁 
老婆嘅法式鴨腿又會唔會有高水準嘅表現?鴨腿一樣好大隻,同樣伴薯角跟西蘭花,先講個鴨皮,炸得酥脆可口,而鴨肉未算話好嫩滑,但放心,絕唔會好似柴皮咁,蘸少許香橙汁,更能中和一下油膩感。雖然啲冷盤極為失色,但主菜扳回唔少分。
bowl甜品
好似沙律咁,餐牌中嘅法式燉蛋、意大利芝士蛋糕、朱古力餅统统都唔見,換嚟喺鮮果撻、芒果布甸、咖啡忌廉蛋糕、朱古力慕絲、芝麻糊及後尾擺出嚟嘅朱古力班尼士、美式芝士餅、聖誕雜果蛋糕。講真,質素就好一般,較好嘅喺個慕絲同芝士餅, 前者香濃幼滑,後者芝士味濃郁,最失敗喺件班尼士,乾到呢好似擺咗成日咁。
bowl生果
早段有蘋果及香梨,後尾改出菠蘿,因為喺新鮮貨色,當然食多幾嚿。
bowl啡茶
真喺只有咖啡或紅茶,餐廳有花奶提供,檸檬都無片,頂多可以沖杯唔滑嘅奶茶。咖啡喺即磨機製嘅貨式,唔知喺咪啲豆嘅質素,味道麻麻,索性加多少少花奶變港式咖啡!
兩公婆慢慢食,晌度迤足兩個幾鐘。整體質素真喺唔可以跟出面酒店餐廳比,觀乎用料、製法,都喺慳水慳力之作(感覺大部嘢好似早更同事一早整定晒),唯獨主菜出得吓大場面。順帶一提,服務唔錯,是晚遇到幾個員工都好有禮貌,收拾又快手,我倆都食得挺愉快。

個人評分
味道:7/10
環境:7/10
服務:8/10
抵食:7/10
平均每人消費:HK$170

餐廳資料:
灣畔軒 Seashore Cuisine
大嶼山梅窩銀礦灣酒店
2984 6863

沒有留言:

發佈留言