2015年12月22日星期二

天糧烘焙 La Vie:好友狂嚐曲(47)

今年中秋節時,晌屋企附近個商場消費滿指定金額獲贈一個「明愛天糧包餅店」嘅雙黃白蓮蓉,喺第一次試佢哋嘅出品。當時嘅食評文末喺咁講:「佢哋唔做門市,將來再試,只有隨緣!」,估唔到食友咁有我心,幫我續一續依份緣,就趁聖誕,送小弟一盒「明愛天糧包餅店」出嘅「聖誕小屋曲奇禮盒」。
有關「明愛天糧」依間社企嘅背景今次就唔多講,因為上一次食評都有詳細介紹。而食友所送嘅曲奇禮盒,內有6款口味,全部獨立包裝,以下就逐一同大家分享:
bowl薑餅人曲奇
傳統薑餅人造型,篤多兩隻眼仔,加個笑,就更可愛喇。薑味較為輕盈,可惜唔喺好夠脆。
bowl杏仁曲奇
曲奇喺普通牛油曲奇底,撈埋大大細細嘅杏仁碎,入口比較香脆、鬆脆,質素不俗。
bowl紅莓曲奇
睇表面已見落咗好多紅莓乾,曲奇同樣以牛油曲奇做底,咬落唔單只有香脆嘅口感,咬到紅莓仲有少少酸酸甜甜嘅味道,以及煙煙韌韌嘅口感。
bowl黑糖杏仁朱古力曲奇
朱古力味幾香濃,仲有好多杏仁片,不過,黑糖味被朱古力冚一冚,所以唔明顯,但仍覺得佢唔錯。
bowl麥片合桃提子曲奇
禮盒有兩款加入麥片做嘅曲奇,但兩者做法大不同。依一款喺將麥片黐滿底面,而曲奇本身口感有少少鬆散,合桃唔多,所以食落唔太覺得有。
bowl麥片杏仁朱古力曲奇
而依款麥片同上面嗰隻唔同,麥片混和粉糰做成曲奇,裡面仲有杏仁粒同朱古力粒,又香又脆口,比起麥片合桃提子曲奇好食好多。
對比兩次明愛天糧嘅產品,小弟就覺得上次嘅月餅稍勝一籌,晌度都再次多謝食友嘅關照。

個人評分
味道:7 /10
環境:- /10
服務:- /10
抵食:- /10
平均每人消費:HK$0(好友送贈)

餐廳資料:
天糧烘焙 La Vie
新界葵涌荔枝嶺路31號地下低層(非門市)
3187 5800

沒有留言:

發佈留言