2015年11月20日星期五

譽江南飯店 Yu Jiang Nan:更勝譽期

朋友間相聚,小弟真喺食乜都無所謂,有提議食京川滬菜,實啱㗎,而且,亦好一段日子無食!最緊要喺唔使我諗去邊度食就最好不過啦,哈哈!選址喺荃灣食廈大輝鴻近頂層嘅譽江南,據講喺間較新嘅餐廳。
餐廳環境幾雅致,雖然都喺中菜館,但就感覺唔會太逼,而且以細枱居多,適合三五知己老友記。
晌翻閱餐牌期間,發現有個4人套餐,好啱我老婆,皆因喺全素,真喺好少見啲非素食餐廳推啲全素套餐,9道菜嘅「素食主意」只賣$398,仲要全包,即喺每人放低一嚿水就走得,超划算。
此外,仲見到佢哋有啲一人午餐,真喺抵到爛,隨時平過上快餐店,分兩個價錢;$38 / $45,包一碗白飯或菜飯,加一客例湯或酸辣湯,講明免茶芥,免加一,可惜依啲機會唔屬於我,只限星期一至五午市供應。
今次同枱嘅朋友都唔喺大食之人,我哋亦無乜點啲貴嘢,所以,今餐食得好經濟。況且,睇過佢啲定價,都頗為實惠!光顧嗰日仲做緊大閘蟹,當然食大閘蟹或其他蟹粉菜就要付出多好多啦,此外,若然食鮑參翅肚,又當別論,故此,晌度食一餐,平有平食,貴有貴食。
先嚟啲前菜,有好多選擇,超過廿款,相信總有三幾款啱你口味。
bowl豆乾馬蘭頭 $48
馬蘭頭刴得夠幼細,菜葉味清新,加入少少豆乾,整體食味不俗,只嫌豆乾落得少。
bowl回味口水雞 $68
碟口水雞正喎,雞肉幾滑溜,皮下脂肪又少,靈魂喺個麻辣汁,夠晒香辣,丁點麻,刺激而唔會嗆喉。
bowl燻小黃魚 $72 / 兩條
煙燻味好濃,一上枱就散發出嚟,不過,佢同燻魚唔同(店家都有燻魚買,$68客),燻魚質感硬身少少,然而燻小黄魚啲肉質仲保持嫩滑,但入口帶濃濃煙燻香味。
bowl京醬肉絲(跟薄餅) $78
依道京醬肉絲,甚有滬菜特色「濃油赤醬」,肉絲炒得相當惹味,搵啲薄餅包住食,無咁油膩之餘,感覺更飽肚。
bowl水煮牛肉 $98
嗜辣嘅老友自不然好想一試水煮菜式,食道水煮牛肉應該滿足到佢,因為真喺好辣,非常刺激,餐廳冷氣都幾夠,但小弟食幾嚿之後都開始冒汗,而啲牛肉都幾腍滑,整體真喺唔錯,如果唔怕辣,汁底下嘅粉皮就更唔好錯過,不過,頂咗幾嚿牛肉我都夠皮,確實好辣。
火爆菜頭 $68
無肉版嘅回鍋肉,椰菜炒得仲帶點爽脆,個汁絕對夠濃香,不過,撈飯就唔多好,因為都幾肥吓。
上素雜菌兩麵黃 $88
雖然喺兩面黃,但覺得做得唔夠脆身,亦唔焦,但配雜菌,食落就讓自己覺得健康啲。
bowl牛肉餡餅 $12 / 件(兩件起)
實在斤兩十足,個個飽滿,實質真喺填滿人肉餡,有肉味,又富肉汁,而外皮煎得甘香脆口,好食。
其實,晌大輝鴻搵食真喺有好多選擇,不過,等搭電梯真喺好煩人嘅事,我最擔心喺安全逃生嘅問題,只望佢幢大廈有足夠防火設施。而今次晌度餐飯,亦比預期中好,雖唔喺有咩太大驚喜,但穩打穩紮,收費又唔算貴。

個人評分
味道:7/10
環境:8/10
服務:8/10
抵食:8/10
平均每人消費:HK$120

餐廳資料:
譽江南飯店 Yu Jiang Nan
荃灣眾安街55號大鴻輝中心21樓B室
2461 1288

沒有留言:

發佈留言