門外好多有關餐廳嘅剪報及介紹
之前嚟過已知晚餐最划算，五道菜晚市套餐已有齊前菜、手卷、餐湯、主菜及甜品，才$218一份（部份主菜需補錢）， 所以，毫無懸念就喺點晚餐。雖然，唔知幾耐轉一次款，但跟上次晚市比，菜式大部份唔同咗，不過，配搭依然盡見創意，亦加入咗好多秋冬時令及滋補食材。
店員推介新出嘅「秋季限定特色飲品」，套餐本身唔包飲品，不過，加配可享有正價減$10嘅優惠，既然睇落真喺幾滋潤，大家又想試，啱啱有3款，就不如一人一款試勻晒。
無限雙雪 $38（套餐價$28）
以無花果、雪梨、雪耳煲成，老婆話味道清淡而，但感覺潤喉，而無花果清甜無酸味，味道不俗。從餐牌所知，有多重功效，喺健康之選。
桂圓杞子菊花蜂蜜茶 $38（套餐價$28）
睇個名就知晒有咩成份，同樣有多重功效，老友話個蜂蜜茶好清甜滋潤，療效就好難即時感覺到，但飲落絕對好舒服。
香橙甘筍特飲 $38（套餐價$28）
小弟一向鍾意飲生果汁，所以，杯香橙甘筍特飲就由小弟試試，色澤橙紅鮮艷十分搶眼，其實味道唔喺好突出，甘筍味稍為重少少，但其中一個功效「補肝明目」，對我依等亂食嘢周身毒素，又大近視，就應該最受用。
先嚟前菜，一門三傑有穩打穩紮嘅滷水豆腐拌蓮藕、健康有營嘅紅菜頭蘋果合桃沙律及創意滿分嘅日本山藥麵線拌熱情果汁，份量實在唔嘢少，但好味就自然唔使愁清唔晒。
紅菜頭蘋果合桃沙律
啲蘋果粒都染成紅色，差啲認唔到佢出嚟，爽脆嘅蘋果粒，夾軟腍嘅紅菜頭粒，再配搭香脆嘅合桃，令個沙律既健康，又富營養，再者，驕紅嘅外觀實在誘人。
滷水豆腐拌蓮藕
豆腐乾滷得入味，入口挺實有點點咬口，富豆香，又有鹵水嘅醇厚味；而蓮藕片鬆化帶點香甜，估唔到夾豆腐乾都唔錯，加上糝下黑白芝麻，令依道涼拌前菜嘅香味更有層次。
日本山藥麵線拌熱情果汁
睇個名已經引頸以待，未嚟已幻想緊山藥麵線喺點？造型非常清新，以山藥刨成麵線，幼細如絲，像真度十足，入口滑溜之餘，更有點點回甘味；淋上鮮熱情果汁，意外地啲熱情果汁無預期中咁酸，多添一份天然果香新鮮感。
雖然轉咗餐牌，但手卷跟上次嚟食嘅都喺同一款式：露筍素香鬆苜蓿芽手卷及香芒牛油果苜蓿芽手卷，似乎都受客人歡迎所以保留不變。
露筍素香鬆苜蓿芽手卷
上次試過香芒牛油果苜蓿芽手卷，所以今次就試另一款。有機苜蓿芽咬落爽爽脆脆，加埋清爽嘅青瓜、嫩口無渣嘅露筍及鹹香嘅素香鬆，喺一件好清新嘅手卷。
香芒牛油果苜蓿芽手卷
牛油果喺老婆喜愛嘅食材之一，所以，二話不說就揀試依款，軟綿嘅牛油果加上鮮甜嘅芒果及少少素香鬆，味道清甜中滲出微微鹹香，好有個性。
南瓜甘筍栗子雪耳忌廉濃湯
晚餐嘅湯品一定喺一中一西嘅選擇，雖然其中一個喺西湯，但出奇不意加入中式食材「雪耳」，感覺幾破格，加埋時令嘅南瓜及栗子做湯，真喺合時而有特色嘅湯品。個忌廉濃湯，入口唔單止香滑，確實帶有好濃郁嘅南瓜、甘筍香味，湯內粉香嘅栗子粒、爽脆嘅雪耳碎，都平添幾分口感。
竹笙蟲草花百合蓮子燉湯
佢哋做嘅燉湯亦有一手，燉得夠火喉，入口又滋潤，單以材料陣容，已有健康滋補之效。秋冬飲碗燉湯，真喺寧舍滋潤到不得了，尤其依代人為工作都少咗湯水，所以，睇得出店家真喺為客人著想而製作認真，而唔喺「求求其其」整碗例湯應酬吓就算。
主食有5款選擇，分別有珍珠糙米飯、扁意粉、咖喱配印度薄餅、千層闊麵及意大利飯，但部份要額外補錢$10-$20。
和風松露野菌秋葵炒扁意粉（套餐+$10）
雖然話喺和風，但加入黑松露醬，又以野菌為主，賣相、味道均偏向西化。扁意粉入口煙韌有咬口，掛滿松露醬，令每炷意粉都芳香馥郁；秋葵獨特嘅滑潺潺嘅感覺，跟野菌一起，又唔覺古怪喎，總之就喺好食。
紅咖喱野菜猴菇丸配印度薄餅及珍珠糙米飯（套餐+$20）
因為上一次已試過依道菜，見佢晌今次餐牌中仍然有出現，所以，推介俾佢哋試，原因個紅咖喱香辣兼備，又唔會太嗆喉，配薄餅及糙米飯都好食；內裡又有好多野菜，如芋頭、三色椒、露筍、青瓜、西蘭花、椰菜花……等等，而猴菇丸入口煙煙韌韌好得意。
日本南瓜腐皮牛油果焗千層濶麵（套餐+$20）
源於有牛油果，所以，老婆指明要選依個主食，千層濶麵焗得香滑，混有好多芝士，香氣四溢，再者，微微烤焦嘅賣相，就更為吸引。粉香嘅日本南瓜，軟滑嘅牛油果，以及酸香嘅蕃茄醬，本已令個濶麵味道出眾，再加埋腐皮，有啲神來之筆嘅感覺，口感豐富。
最後，都輪到甜品出場，有紅棗桂圓椰汁糕同熱情果乳酪蛋糕，為咗方便共享，我哋就要咗前者兩客，後者一客。
紅棗桂圓椰汁糕
雖然只喺普普通通嘅蒸糕，但一層一層相間，功夫就自然多好多，紅棗味比較突出，桂圓喺預期有啲龍眼肉粒，但又唔喺好覺，椰汁部份就較清，唔喺極濃嘅情況，質感柔韌，其實都幾好味。
熱情果乳酪蛋糕
正如上次嚟食晏所講，佢哋啲芝士蛋糕的確芝士味濃，可是，餅底依然做得太厚。不過，夾熱情果醬，比起上次夾柚子蜜，效果好啲。
再嚟都無令人失望，由前菜、湯品、主菜到尾，大廚都施展出渾身解數，每個出品證明有水準之餘，質素好穩定，都讓人食得稱心滿意。而且，服務又到位，店員殷勤有禮，值得再幫襯嘅小店。
個人評分
味道：9/10
環境：8/10
服務：8/10
抵食：8/10
平均每人消費：HK$290
味道：9/10
環境：8/10
服務：8/10
抵食：8/10
平均每人消費：HK$290
餐廳資料：
悠蔬食 Leisurely Veggie
銅鑼灣渣甸街50號渣甸中心25樓
3565 6393
悠蔬食 Leisurely Veggie
銅鑼灣渣甸街50號渣甸中心25樓
3565 6393
沒有留言:
發佈留言