2015年10月4日星期日

悠蔬食 Leisurely Veggie:絕不粗蔬

曾經跟朋友嚟過一次,知道佢哋唔單只做健康嘅素食,更以創意、心思嚟做菜,試過覺得有水準,味道又唔會好似齋菜咁寡,絕不粗疏,所以,當其時已打算帶老婆嚟食番餐當喺佢生日飯。
有質素就即喺有質素,星期日嘅午市無咗寫字樓客,都一樣有咁多人幫襯,不過,又未至爆到要訂枱,目測見,是日最旺時段都有去到九乘滿!
上次嚟喺食晚餐,今次配合番我哋行程,完咗聚會就過嚟食晏。午餐當然無晚餐咁豐富,但相對價錢很划算,$88-$108就已包前菜、餐湯、主菜,加錢可再配飲品同甜品。
bowl是日精選慢磨果汁 +$20
老婆一向注重健康,所以,介紹佢試依度嘅慢磨果汁,餐牌本身都有4款指定而用多種生果打成嘅慢磨果汁,賣$42一杯,而晌午餐可加$20配嘅是日精選,就喺晌菠蘿,蘋果,雪梨,火龍果當中任揀兩款打成。我杯喺菠蘿混火龍果,清甜蜜香,而老婆嗰杯則金以雪梨混火龍果,滋潤清爽。因為姨仔都有部慢磨果汁機,所以,都唔使再向佢介紹咩叫做慢磨果汁,有咩特點,有咩好處。
bowl日式麻醬冷豆腐
前菜共有兩款,唔使揀,午餐兩款都包。細細份碗嘅前菜,賣相簡單精緻,冷豆腐好嫩滑,麻醬芝麻味香。
bowl藜麥蔬果沙律拌鮮香芒醬
沙律菜唔喺用油醋或沙律油,而喺淋上芒果醬,味道濃香啲,又加入咗好多藜麥,健康有咬口。
bowl意大利雜菜湯
餐湯有一西一中嘅選擇,我哋兩個就自然想兩款都試晒啦,先嚟西湯,睇佢個樣好清,估唔到咁濃味,酸香醒胃,好好飲。
bowl冬菇蓮藕眉豆湯
而個中湯入口好溫潤,撈一撈,好足料。因為依度喺素菜館,個湯當然無肉,但估唔到咁鮮甜。老婆有時晌屋企都會煲素湯,都放唔少料,但味道就總喺差咗少許,真喺未捉到竅門喺邊。
bowl香酥菇扒配上海菜飯 +$10
主食5揀1,但部份要加錢。件香酥菇扒都幾大件,炸得酥香,但食落一啲都唔油,口感有啲煙煙韌韌,菇味卻唔算好重;菜飯唔止有菜,仲有菌粒,口感豐富,飯粒亦非常軟熟 。
bowl葡汁香芋鮮蔬焗五穀飯 +$10
個焗飯又真喺幾好味,尤其個葡汁,濃香滑溜,所以,個飯絕對唔會太清淡;五榖飯無想像中咁穀物樣,都喺怕客人唔太慣,穀物份量唔佔太重,而芋頭粉香,仲有西蘭花,甘筍,好健康嘅焗飯。
bowl柚子乳酪蛋糕 +$15
既然賀佢生日,配埋個甜品先完滿,不過,佢話飽晒,所以,就點一客嚟試試。午餐唔包甜品,需加錢。個柚子芝士蛋糕比預期中細,餅底亦過厚,芝士部分亦太硬,估計可能雪櫃溫度太低,雪得太硬,而柚子味只喺源於後加嘅柚子蜜,以個人嘅標準,個蛋糕唔多合格。
老婆對成餐飯都好滿意,唔單喺因為素食夠健康,更因為餸菜嘅味道做得恰到好處,又富有特色。不過,最後嘅芝士餅就失望啲,顯得有少少百密一「蔬」。

個人評分
味道:8/10
環境:8/10
服務:8/10
抵食:9/10
平均每人消費:HK$125

餐廳資料:
悠蔬食 Leisurely Veggie
銅鑼灣渣甸街50號渣甸中心25樓
3565 6393

沒有留言:

發佈留言