夏宮 Summer Palace：宮敬不如從命

早前分享過奇華餅家嘅「鴛鴦奶皇」，喺今年食嘅第一個月餅，中秋佳節，月餅嘅嘢邊會一次過食得晒，所以食啲又寫啲，而第二個食到嘅港島香格里拉酒店中菜館夏宮嘅出品，依份厚禮喺公司客送嘅，故此，就自然喺酒店級高檔貨色。既然喺客送嘅，當然恭敬不如從命，一到下午茶時間，同事就自動波切嚟一齊分享。

不愧喺五星級酒店貨色，外盒採用香檳金，包裝已經顯得寧舍高雅；而內裡8個「迷你蛋黃白蓮蓉月餅」加以橙紅色紙盒再以獨立包裝處理，甚具東方色彩，咪睇佢啲盒仔一高一低唔整齊，原來刻意設計，方便抽出嚟。

月餅印上「夏宮」二字，線紋清晰，一刀切落去，回刀已見到鹹蛋黃嘅黃油，打開一睇，直頭流晒油，而且，餅皮夠薄。入口，白蓮蓉軟滑清香，就算喺白蓮蓉，甜膩都在所難免，不過，呷啖茶，又一小啖月餅，感覺會喺不一樣。

多謝個客，等我哋有多日嘅蛋黃白蓮蓉月餅下午茶，乘機鬆一鬆，抖一抖！

個人評分

味道：8/10
環境：- /10
服務：- /10
抵食：- /10
平均每人消費：HK$0（客人送贈）

餐廳資料：
夏宮 Summer Palace
金鐘法院道太古廣場二座港島香格里拉酒店5樓
2820 8552