2015年9月21日星期一

金功夫點心火鍋 Kung Fu Deluxe Dim Sum Hot Pot:分金同味

同一班相熟食友好耐無聚,所以,搞個飯局聚一聚之餘,又試吓新餐廳,揀嚟金功夫據講因為有大明星喺股東之一,有機會見到明星,不過,娛樂圈嘅嘢小弟真喺零距離,跟港劇絕晒緣咁滯,但講到食,就啱晒我啦,打邊爐就好似一大窩嘢跟老友分甘同味,食得特別開心。
餐廳位處堡壘街,雖然好少嚟北角區,但之前都到過「素食.份子」,所以,對依度都好有印象。據朋友介紹,因為店家由集團經營,強大後盾,可以入到靚貨。環境設計頗有特色,兩隻飛龍在天,有氣派,又以竹竿做成天花,充滿中國色彩之餘,又甚玩味。
上班日子總有人要遲啲嚟,叫住啲冷盤食住先,邊食邊等,而店內嘅餐前小食不乏特色。
bowl藥膳醉乳鴿 $58
錯過咗老友點嘅冰鎮豬手($58),但有機會試試個醉乳鴿,入口酒香而帶點藥材味,乳鴿肉質細嫩,味道不俗。
bowl酥炸魷魚鬚 $68
炸得甘香可口,蘸點醋,可去走油膩感,再者,粉漿唔算好厚,外層酥酥脆脆。
bowl川汁貓耳皮蛋 $48
貓耳即喺雲耳,撒上大量芝麻,淋上微辣帶麻嘅川汁,爽脆惹味;而皮蛋採用金黃皮蛋,晶瑩剔透,的確少見,然而,跟食一般常見嘅皮蛋又唔會太大分別。
我哋人多,點夠兩個窩,顧及唔同人嘅口味,點一款貴氣嘅翅鍋,另一款就較平實嘅粥鍋。

bowl翅群白玉滑雞鍋 $198
雖然魚翅唔啱我,但呷一啖湯底都好香甜,雞件亦都嫩滑,底下嘅冬瓜清甜,未烚嘢食,個湯鍋本身都好正。
bowl潮式米水鍋 $248 
咪以為個粥鍋就會相對清啲,原來粥水內有條大鮮魚,令個鍋底鮮甜,有點驚喜,個鍋亦可棄魚選蟹。雖然話喺鍋底,但亦可以當粥咗先食,仲伴上油炸鬼、洋蔥和生菜絲。
跟住就進入烚吓烚吓嘅打邊爐時段,所以,順便介紹醬料,有沙嗲醬、蒜蓉、紅椒、辣醬、蔥花、金蒜粒、麻醬等,任由客人自由組合,茶芥及醬油費$15位已包,所以,心態上唔「混醬」吓好似好蝕底。 
火鍋配料分為海產類、招牌牛肉、肉類、丸類、餃子類、蔬菜及麵類,亦有一啲特色推介,以及另備多款海鮮刺身。
bowl頂級雪花肥牛 $188 / 例、$268 / 大
牛肉類點咗兩款,頂級雪花肥牛要一客大份嘅,每片切成長形,方便涮幾涮啱啱好一啖吞晒。單喺賣相油花分佈平均,色澤鮮紅,已然感到質素上乘,一片入口,滋味無窮,皆因肉味濃,質感柔軟,油香豐足,真喺吸引得一片接一片。
bowl邊抓位 $268 / 例、$328 / 大
邊抓位印象都喺第一次試,一份例牌都唔少,有一大碟,色澤同樣鮮紅,但就無咁多油脂。烚過後,牛肉一樣腍滑,但食落多一分咬口。
bowl水魷魚 $68
海產類揀咗幾款試試,水魷淥咗好耐都唔會點縮水,食落好彈牙好爽。
bowl養顏花膠筒 $78
一客有唔少件,花膠筒最啱女生們,小弟都烚番件,入口柔韌得嚟有咬口,而花膠筒本身無乜味,所以沾少少自製混醬就覺得鮮味啲。
bowl日本蟹棒 $58
唔喺溝粉嘅貨色,所以,放入鍋底中烚得耐,會好易散,故此,輕涮一下就食得。
眾所周知,依家打邊爐,家家店都各出奇謀,樣樣都期望做到人無我有,人有我優。喺點菜紙上,以及牆上嘅電子壁報,都有介紹幾款「特色推介」,喺一般火鍋配料嘅升級版,如墨魚丸加鵝肝,肉餃加入黑松露醬……等等,睇落都已經好吸引。
bowl黑松露餃 $98
外觀同一般嘅乜餃物餃無咩分別,都喺啲豬肉、蝦肉包成,不過,除咗自家包製,餃面無撲粉,食落細滑之外,肉餡加入黑松露醬,肉餡咬落既鬆化彈牙,亦散發出陣陣幽香,香氣撲鼻,令人回味。
bowl鵝肝墨魚丸 $88
好簡單,就喺手打爽彈嘅墨魚丸內,釀入鵝肝粒,自家手打故然入口彈牙,不過,鵝肝咁樣烚一烚,烚熟咗咁,好似缺少咗份豐腴感。
bowl嘩鬼蝦條 $68
同意食友嘅見解,酥炸成為小食,總好過放湯烚用嚟打邊爐,因為油條部份涮過之後變腍,失去油條香脆嘅特性。
bowl玉簪蝦丸 $88
唔止個名改得靚,賣相都好睇,以手打蝦丸為基礎,插入金華火腿條、甘筍條、露筍條同西芹條,令口感多添幾分爽脆,味道多添幾分層次,再者,蝦丸的確爽彈蝦味足。
bowl蟹粉福袋 $22隻 / 兩隻起
外形討好包得漲卜卜嘅福袋,其實喺蟹肉、蟹粉、豬肉所做成,始終蟹粉佔得唔多,所以,算唔上味道好突出,不過,始終用料豐富,又富湯汁,食味不俗。
bowl脆炸響鈴 $48
試咗唔少特色嘢,都揀啲大家心水,響鈴喺其中之一,店員解釋由於喺新鮮即炸,所以,需久候一點。響鈴放入湯中輕灼,既酥脆,又帶少許湯汁,好味。
bowl炸魚皮 $48
同為自家製作,唔用來貨,所以,食得出有水準,一咬卜卜脆,又甘香,放湯灼又得,當小食淨食都得。
bowl唐生菜 $32、娃娃菜 $32
打邊爐點蔬菜喺最唔划算,因為,啲蔬菜本身平,又無乜功夫要做,但賣嘅價錢又唔平,都喺鋪租、人工嘅反映,但成餐飯無菜落肚又唔得嘅。
bowl竹蔗茅根水 $28 
講到打邊爐,唔喺飲汽水,就喺飲涼茶。竹蔗茅根就夠清熱下火,自家製,竹蔗、茅根、馬蹄、紅蘿蔔,真材實料無欺場,冰涼清甜度,順喉解渴。
bowl椰汁西米糕 $26
真喺估佢唔到食火鍋有泰式甜品供應,皆因同集團有泰國餐廳。糕內有西米、栗粒,口感豐富,又有濃濃椰汁香味。
bowl雪沙香芒卷 $24
即喺香芒糯米糍,外皮煙糯有咬口,裡面捲住大大件芒果肉,鮮甜好味,又撒滿椰絲,椰香處處。
其實,店內仲有刺身及好多海鮮產品,但因為消費高,而其他火鍋料都好夠滿足我哋喇!
烚吓烚吓,邊烚邊傾,邊傾邊食,同老友們暢所欲言,渡過一個愉快晚上,兼且收到唔少小禮物,真喺多謝各位成日分甘同味嘅好食友。

個人評分
味道:8/10
環境:7/10
服務:8/10
抵食:9/10
平均每人消費:HK$270

餐廳資料:
金功夫點心火鍋 Kung Fu Deluxe Dim Sum Hot Pot
北角堡壘街6-8號華康大廈地下B舖
2802 2888

沒有留言:

發佈留言