天然齋 Green Veggie：仁見人愛月餅系列（二）

今年前後收到3款伍仁類嘅月餅，咁多年嚟都未試過，之前分享過奇華餅家嘅「迷你金絲果仁月」，加入蜜餞橙皮絲，都頗有驚喜。食友所贈嚟自「天然齋」嘅「傳統鹹伍仁月餅」又唔知會喺點呢？

主打賣齋菜嘅天然齋，所推出嘅月餅當然都喺素月餅，據食友講共有4款口味：特濃黑芝麻、清香椰絲蓉、傳統鹹伍仁及紅豆甜瓜仁。不過，睇番個包裝（無店家嘅名字）、袋背（生產商為中山市花城酒店），以及餅面（無印上店家或月餅口味嘅名字），似乎啲月餅喺攞貨居多，並非自家生產。

個鹹伍仁月外皮比較厚身，餡料中嘅果仁似乎唔喺咁密咁填滿，但口感依然好有咬口，而且，出奇不意咁有朕朕香茅味，雖然唔知成份喺點，但我倆公婆都食得到有少少香茅味滲出嚟，估唔到加咗之後個感覺清新咗，真有趣。

其實，姑勿論味道如何，都好多謝食友一番心意，讓小弟今個中秋又多試到一款素月餅。

個人評分
味道：6/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
天然齋 Green Veggie
灣仔謝斐道254-272號杜誌台11-12號地舖
2338 6179