諾亞半熟蛋糕專門店 Noah Castella：金漆焦牌

啱啱晌The Pudding Nouveau食完晚飯，見隔離開咗間諾亞半熟蛋糕專門店，見之前唔少人分享依間近半年嘅人氣餅店，擇日不如撞日，入去睇個究竟先。

小弟都喺第一次嚟，原來唔止半熟蛋糕，已經出咗咁多款蛋糕，有溶心芝士、鮮乳卷、泡芙及3D蛋糕。

見有幾款新出品，其中一款喺以小弟嘅喜愛食材嚟做：焦糖及咖啡，自不然成為心水之選。遲啲又放大假，要勞煩同事幫手跟手尾，所以，一於拎返公司一齊嘆吓，慰勞吓。

焦糖炭燒咖啡布甸蛋糕 $118

個外盒包裝幾可愛，手挽做成一個貓型，我晌鋪面見佢哋用「忌廉哥」做宣傳，所以，順理成章咁設計。

打開外盒，內裡嘅蛋糕喺以圓膠盒盛載，印有點樣食用個蛋糕，因為，膠盒內嘅蛋糕喺反底樣，即喺上下倒轉，面層所見其實喺蛋糕底，至倒番轉出嚟先睇得番個蛋糕正確嘅「真身」。

蛋糕嘅上半層喺咖啡布甸餡，而下半層為海綿蛋糕，面層淋滿焦糖漿，整體而言，咁嘅組合預期到味道會喺偏甜。海綿蛋糕綿綿微濕，布甸做得挺軟滑，淡淡咖啡香，焦糖味甚為突出。所以，喜歡焦糖嘅焦香，又唔怕甜，依個蛋糕會好啱食，否則，小試無妨！

另外，盒裡已包埋紙碟膠叉，不過，晌公司食就環保少少，用番公司嘅瓷碟，下次再買就叫佢可以唔使俾我。

雖然首次接觸諾亞，又唔喺試其招牌半熟蛋糕，不過，因為個焦糖炭燒咖啡布甸蛋糕喺自己嘅心水選擇，小弟本身又嗜甜，所以，對個蛋糕印象唔錯。雖未知佢會唔會成為諾亞嘅另一金漆招牌作，但喺，可以喺小弟嘅金漆心水！

個人評分
味道：8/10
環境：6/10
服務：7/10
抵食：8/10
平均每人消費：HK$30

餐廳資料：
諾亞半熟蛋糕專門店 Noah Castella
大坑京街17號地舖
2327 2187