山區裡的走走趯趯: 熨烤達人 Mr. Iron：熨手韓燒

2015年8月25日星期二

熨烤達人 Mr. Iron：熨手韓燒

早前睇雜誌見到依家新韓燒店，再加埋睇到食友嘅食評，搞甚麼「熨斗」韓燒，覺得幾得意過癮，但又見到有啲負評，所以，十五十六試唔試好，最後大家都話試，原因都喺貪新鮮。

可能新店關係，又喺位處旺區，交通方便，所以，晌門口見唔少人等位，雖然訂咗位，都要等一陣先有枱，韓燒果然人氣依然。

踏入店內，內裡一如好多韓燒店，型格行先，石屎牆，曲形辛鐵，營造成一個小洞穴咁款；不過，「電油筒」圓櫈外，餐枱就有別常見嘅不銹鋼，改以木枱，添加咗一份暖和感。而抽風系統採用上抽式活動抽風管，效果算OK，至少枱枱坐滿時都唔會煙霧彌漫。

叫得韓燒店，燒烤當然喺主打，以牛肉嘅種類最多，此外，唔少得雞肉、豬肉、海鮮、蔬菜；仲有一啲餐前嘅開胃小食，如沙律、紫青瓜、八爪魚……等等，以及多款香口菜式同飯麵。

我哋先點飲品，邊飲邊等個爐「慶」熱，而飲品選擇唔多，就喺頭上吊住個餐牌度，Cider Special、韓國罐裝果汁，一隻手都數得晒。

Lychee Cider Special、Strawberry Cider Special $43

小弟揀咗款荔枝西打，之前晌元朗一間韓食店都試過依款飲品，貪佢冰涼清爽夠大杯，西打有少少似檸七味，全無酒精成份，溝入少少荔枝糖漿，一邊食熱辣辣燒肉，一邊飲住涼朕朕嘅西打，爽呀！友人嘅士多啤梨西打，賣相有啲「肉酸」，但味道不錯嘅，佢話感覺似飲緊士多啤梨味嘅梳打。

青提汁 $22

另一位友人怕飲唔晒，所以，揀咗細細罐嘅韓國青提汁，依一款果汁依家晌好多韓國菜館都有，味道較為清怡，內裡又少少果肉。

爐邊烤蛋

記得第一次食韓燒嘅爐邊烤蛋，只喺淨蛋嚟，跟住又見識過加入韓式泡菜嘅版本，今次晌熨烤達人，就喺粟米、芝士及泡菜嘅自助版本。由店員淋上濃濃嘅蛋漿，再自行按個人口味加上配料，等到食完啲烤肉，臨尾就有嫩滑烤「三式」蛋食。

脆卜卜大園手攪飯 $68

無論烤蛋又好，烤肉又好，等到有得食都需時，所以，店員推介我哋試試佢話個熱門手攪飯，見有唔少客都點，我哋見幾得意又點一客嚟試試。

雖然話喺「飯」，不過，飯佔嘅比例唔重，配料有蟹子、吞拿魚、青瓜絲、蛋絲、脆米及蛋黃醬，食法喺將所有材料拌勻，再紫菜捲入迷你雪糕筒，再放入配料，好似食手捲咁，但就多咗雪糕筒嘅脆口感，而饀料因為有多種材料，又加有青瓜及蛋黃醬，所以，味道豐富，開胃清爽。相信女生或小孩都喜愛依個手攪飯，之不過，撈出嚟「飯」就好多，但雪糕筒只得兩個，又無得另外再單叫雪糕筒，故此，之前就變成當佢喺淨食嘅前菜「沙律」。