奇華餅家 Kee Wah Bakery：鴛鴦奶皇迎中秋

今年中秋晌九月尾，不過，各大小餅店、老餅家早晌八月已經開始各式各樣嘅宣傳，一如過往，推出五花八門嘅月餅，單喺奶皇月餅，口味已經變化多端，十隻手指所數唔晒。時近，又喺收到月餅嘅時候，有啲商戶賀禮送嘅，有啲朋友俾，亦有啲散裝喺親友醒小弟試試嘅，總之多謝大家。一次食唔得晒咁多，食啲又寫啲，今篇就先分享奇華餅家嘅「鴛鴦奶皇」（$188）。

依家事事講求包裝，啲月餅盒無以前鐵罐咁老套喇，「鴛鴦奶皇」個包裝盒設計精簡，深啡襯米白，簡單線條勾畫出月亮與玉兔，言簡意賅，卻不失優雅。

每盒「鴛鴦奶皇」共有8個迷你奶皇月餅，上下兩層，「迷你朱古力奶皇月」及「迷你蛋黃奶皇月」各4個，每個獨立包裝夠晒衛生，而包裝袋底下印有口味名稱，試邊款揀邊款，絕唔會搞錯。

迷你蛋黃奶皇月

先試個蛋黃奶皇月，盒底印有官方建議放入微波爐加熱20秒，小弟就偏向入焗爐，感覺就總喺香啲。切開，皮薄，蛋黃奶皇餡色澤橙紅，烘焗後散發陣陣蛋香，入口外皮鬆化，奶皇餡軟綿幼滑，更有份奶香味。

迷你朱古力奶皇月

加入咗朱古力去做個蛋黃奶皇餡，所以，餡心黑沉沉，不過，朱古力味都頗香濃，少甜，啱晒口味。

奇華嘅奶皇系列除咗單款口味嘅「朱古力奶皇」、「蛋黃奶皇」，以及孖裝嘅「鴛鴦奶皇」禮盒裝之外，仲有「御金奶皇」、「奶皇迎月」供選擇，唔知邊款合閤下口味。

正所謂人月兩團圓，祝願中秋跟家人、跟朋友，一起快樂！

個人評分
味道：8/10
環境：7/10
服務：7/10
抵食：8/10
平均每人消費：HK$0（朋友送贈）

餐廳資料：
奇華餅家 Kee Wah Bakery
中環港鐵中環站CEN E19號舖
2602 2501