2015年8月13日星期四

Green Waffle Diner:逐綠中原

Green Waffle Diner晌銅鑼灣開咗分店,甚有人氣,有食友早前到訪,話人多到不得了,小弟一向怕同人逼,又唔鍾意等位食飯,所以,揀番中環「老店」,一來佢身處中環舊街市內,貪佢靜局啲,二來小弟於中環工作,行過去都方便啲!
話雖如此,原來都幾旺場,由初段時間較早,人客唔多,坐吓坐吓都坐爆晒。
都幾鍾意佢啲裝修,簡約清爽,貫徹店名,牆上又架設唔少翠綠嘅植物,讓人望落去感覺悠然舒服。另一邊玻璃牆身又有啲得意嘅插畫,都喺環繞啲食物,趣趣緻緻。
雖然話主打窩夫,其實有好多選擇,例如:全日早餐、小煎窩熱食(Skillet)、班戟、窩夫、意粉、沙律、三文治、肉類美食及各式各樣嘅飲品。
晚餐,一般嚟講就最划算,以所揀嘅主菜定價,包沙律 / 餐湯 / 小食、主菜、半份窩夫及餐飲,而餐飲想飲得特別少少,又可以半價轉其他飲品(Smoothie除外)。其實晌門口已睇到佢個晚餐黑板,已意屬依個選擇。
bowlRoasted Pumpkin Salad
我哋點咗兩個晚餐,所以,一客要沙律,另一客要雞翼,比起要湯易分啲。沙律雖然寫燒南瓜沙律,其實喺以沙律菜加燒南瓜、車厘茄及少少巴馬臣芝士,沙律菜簡單以油醋撈過,南瓜粉甜,整體都清新好味。
bowlCrispy Chicken Wing +$10
脆雞翼可以揀燒烤味、辣味(水牛雞翼)或蜜糖蒜味。雞翼外皮帶點脆口,食落滲出微微香蒜及蜜糖甜味,雞翼嘅肉質亦唔錯,無話炸到乾晒。
主菜有3款選擇,包括火腿扒、 龍脷柳同豬肉,最後揀咗前兩者,因為火腿扒做主菜比較少有,所以,好奇想知會煮成點;而既然要咗一份肉,另一份就要魚,順利成章就揀龍脷柳。 

bowlMustard Glazed Gammon Ham Steak with Mash Potato and Veggies $198 
所指嘅火腿扒當然唔喺超市所見嗰種啦,喺靚料好多嘅火腿,見餐牌叫Gammon Ham,小弟就應該第一次接觸,上網摷摷原來喺一種燻豬腿肉。好似金華火腿,巴馬火腿咁,帶較濃嘅鹹香味,質感柔軟,淨食真喺覺得有啲鹹,所以,個人覺得最好切一小件,再夾少少薯蓉,效果就理順好多,況且,啲薯蓉好滑,好有薯味。而初以為道主菜得上面喺火腿扒,下面喺薯蓉,原來中間夾住好多蔬菜,真喺啱晒我,故此,又可以火腿夾埋啲蔬菜同食,平衡番火腿個鹹度。
bowlBaked Lemon Dill Solefillet with Pea Puree and Veggies $178
第二道主菜亦都好好食,因為配菜甚豐富,而且,可以用精彩嚟形容,有薯蓉、炒雜菜、燒粟米、燒蕃茄及青豆蓉,可謂各自各精彩,最得歡心喺粟米同豆蓉,前者入口好清甜,而後者則豆香軟綿。講到件魚柳,亦都不俗,煎得金黃,入口帶微微檸檬清香,又夾雜少少香草味。
bowlHalf a waffle with fresh fruit and ice cream
雖然晚餐只包半客窩夫份量,其實已經唔少嘢。店中嘅窩夫可揀原味、斑蘭、全麥或蕎麥,再隨喜好加唔同配料,雪糕可揀Movenpick或阿波羅(價錢就逐樣計),不過,晚餐嘅窩夫相信喺俾後者嘅阿波羅雪糕。件窩夫做得幾鬆脆,入口散發輕微嘅斑蘭味,配上朱古力雪糕、生果,為晚飯嘅尾聲有個美好嘅作結。
至於另一款蕎麥,口感較粗糙,勝在健康啲,坊間少見自然又想試吓。
bowlCoffee / Tea, Or half priced change selected drinks 
本來小弟就慣性揀杯鮮奶咖啡,不過,店員推介我試吓一款叫Buttered Coconut Coffee,因為加入咗椰子油,所以,屬較健康嘅咖啡。單賣$33,但跟餐可以用半價試到。
咖啡嘅外觀無吸引人嘅奶泡或拉花,換嚟喺面層一抹椰子油,加點牛奶,攪勻,飲落幾得意,醇香嘅咖啡味中,散發出點點椰子香味。
飲食競爭之大唔使多講,就算簡簡單單嘅賣吓窩夫,一樣生意唔易做,所以,「綠」死誰手都喺要睇質素!

個人評分
味道:8/10
環境:8/10
服務:8/10
抵食:8/10
平均每人消費:HK$220

餐廳資料:
Green Waffle Diner
中環嘉咸街35-39號嘉豪大廈地舖
2887 9991

沒有留言:

發佈留言