芙蓉果汁專門店：鋤強芙弱

尖沙咀嘅鋪租有幾貴相信唔使多講，地鋪嘅，角位嘅，更不在話下，依間「芙蓉果汁專門店」晌尖沙咀都多年，真喺唔知佢要賣幾多杯果汁先夠頂得住啲租金，當然，會唔會喺老細自己鋪我又唔知。如果喺前者（租鋪），咁就要支持吓小店啦，相反，如果喺後者（自己鋪），難得佢繼續賣果汁而唔喺將個鋪租出去喎，所以，都要支持吓。雖然講唔上咩鋤強扶弱，但都希望依啲小店可以繼續落去。

佢依度主打賣鮮榨果汁，而且，果汁種類非常多，又可以兩溝，$16-$22一杯，比起飲汽水、罐裝飲品，當然貴好多啦，但勝在新鮮健康嘛！

除咗鮮榨果汁，另外仲兼賣兩款即斟「糖水」：芒果西米露同椰汁西米露。如果晌糖水鋪食碗芒果西米露，都要十幾廿蚊喎，依家$9就有一杯，不過，作為嘢飲，大家明白唔會有咩芒果果肉啦。

芒果西米露 $9、蘋果甘筍汁 $16

小弟一向喺慳家，就不期然揀杯抵飲嘅芒果西米露，晌炎炎夏日中，入口涼快，又唔會太冰感，個汁底都算幾夠芒果味，內裡又有粒粒咬口西米，飲完一杯的話可以消消暑；而老婆為人講健康，所以要咗一杯蘋果甘筍汁，甘甘甜甜，清新好味。

今次個食評，講果汁方面落墨唔多，只喺見小店嘅努力，都想寫番篇留個記錄而已！

個人評分
味道：8/10
環境：6/10
服務：7/10
抵食：8/10
平均每人消費：HK$13

餐廳資料：
芙蓉果汁專門店
尖沙咀漆咸道南57-59號金馬倫中心地下5號舖
2739 6238