2015年7月5日星期日

Fiat Caffe:慣性投素

對上一次嚟,喺舊年10月嘅事,慶祝老婆生日嘅晏晝飯,嗰次試咗3款菜式,包括:香芒大蝦沙律、意大利脆煙肉煎蛋拌黑菌烤麵包及燴意大利肉丸配米形意粉,今次再嚟食晏,已無咗米形意粉,反而多咗一個早午餐菜牌。
因為上次嘅食評都介紹過個環境,所以,今次就唔多講,擺幾張相俾大家睇睇就一目了然,只喺門口架真車由灰色變咗黃色,更搶眼。我哋今次被安排坐晌入面嘅卡位,感覺私隱度高啲,而且,更加舒服啲。
對照返上次,依家個餐牌精緻咗好多喎,唔喺單單得個菜名,部份菜式更有參考圖片,令到啲菜式份外吸引。類別依次序有頭盤、餐湯、沙律、意式烤麵包及三文治、精選意粉 / 燴飯、精選主菜、手製薄餅、兒童餐、甜品及飲品。
至於個早午餐牌,原以為喺套餐,原來都喺散叫菜式!依家啲人好鍾意就投訴,郁吓就嘈,依樣投訴,嗰樣又投訴,搞到好戾氣,產生好多負能量。我老婆都有此慣性,不過唔喺「投訴」,而喺「投素」,晌餐牌內有唔少標明喺素食菜式,佢偏向茹素,所以,是日午餐一啲肉都無。
bowl無花果乳清乾酪 $118
曾經晌以前銅鑼灣店試過依道菜式,印象特別,加上佢都好鍾意食新鮮無花果。無花果切片,無以前原粒開半咁大啖大啖食咁爽,不過,食落發覺啲無花果做咗焦糖化,一咬有層脆糖,幾特別;乳清芝士(有譯作意大利農村軟芝士)應屬於未完全熟成嘅芝士,口感上,跟平時晌超市買到嘅茅屋芝士好相似,但香得嚟唔會太霸道,有啲沙沙嚡嚡粉粒嘅口感,喺一道宜淡宜濃嘅沙律。此外,除有原粒榛子,仲加咗榛子碎,再配以蜜糖、葡萄黑醋、黑松露油作醬汁調和,沙律菜食落新鮮清爽,味道又富層次。
bowl野菌黑松露雲吞配蕃茄 / 忌廉汁 $108
上次試過意式烤麵包,今次就揀客意式雲吞試試,因為佢喺全素菜。都忘記數一數,一客應該大概7-8件,隻隻都包得幾大隻,不過,餡料唔好期望好多,因為意式雲吞一般都喺扁身啲。然而,雲吞皮厚薄適中,內餡有啲蘑菇、菠菜、黑松露……等等,我哋揀蕃茄汁底,蕃茄味濃郁鮮活。
bowl栗子菠菜南瓜意大利燴飯 $118
無咗米形意粉,就試吓早午餐牌內嘅栗子菠菜南瓜意大利燴飯,因為都喺素菜菜式。其實個飯講出嚟就好簡單,以南瓜汁煮意大利米,加入菠菜碎、栗子粒同巴馬臣芝士,就大功告成,老婆甚欣賞佢個燴飯嘅口感,有煙韌嘅口感,又唔會有生米嘅感覺,每啖飯都充滿南瓜甜味;只喺略嫌栗子細粒,但食得出糖漬過,如果加入番啲栗子碎效果又如何。
bowl榛子鮮奶咖啡 $43
無獨有偶,原來上次又喺飲榛子鮮奶咖啡,唯一唔同上次平啲,只賣$40,哈哈。咖啡採用意大利illy咖啡豆,差極有個譜,至於杯鮮奶咖啡,榛子香味唔會太搶,奶泡撞得均勻,無需落糖,每啖都醇香柔滑。貪得意,飲到尾,個拉花都可以保留返晌度。
bowl甘菊茶 $36
老婆一向都喜歡花茶,尤其唔太濃,又清香嘅,就最啱佢,所以,揀咗一杯甘菊茶,別緻嘅茶具,清香嘅花茶,淡雅幽香,又有紓壓寧神之效。
bowl法式歌劇院蛋糕 $68
以前晌工聯會學整蛋糕,法式歌劇院蛋糕喺認為頗難嘅一款,蛋糕底又要加杏仁粉,又要做咖啡牛油忌廉,又要加朱古力軟心醬,一層疊一層疊成六、七層,Fiat Caffe版嘅法式歌劇院蛋糕明顯簡化咗,層次雖未及正宗嘅咁多,但味道仍然好細緻,咖啡與杏仁味配搭和諧。
由於老婆晌尖沙咀返工,所以,都問問佢哋平日所賣嘅午餐喺點,主要包括沙律或餐湯,一道主菜,加一杯餐飲,定價於$98-$128,加多$30有多一客招牌甜品,另收加一服務費。晌商業區以言,屬中價價位,普羅大眾未必願意花成嚿水食餐晏,但計及環境、服務、食物質素,應該獲一啲中層管理人或喜歡優質嘅朋友青睞。
雖然唔喺素食店,但依家好多餐廳都有提供素食嘅菜式,難得今日挑嘅菜式既好食,又喺素食,所以,老婆佢非常滿意,絕無投「素」。

個人評分
味道:7/10
環境:8/10
服務:8/10
抵食:7/10
平均每人消費:HK$270

餐廳資料:
Fiat Caffe
尖沙咀彌敦道132號美麗華商場B1樓B1018及B1023號舖
2808 4777

沒有留言:

發佈留言