灑家燒味小廚 Master Kitchen：耍家燒味

雖然早前入嚟屯門三聖食海鮮喺有老友揸車，不過，有咗西鐵，小弟由美孚往返屯門真喺超方便，所以，屯門站上蓋嘅大型商場V City，就成為偶爾路經嘅地方。其實，嚟V City食嘢的確有好多選擇！

每個人都有其長處，小弟就無乜嘢耍家，「為食」唔知算唔算？灑家，個名改得夠抵死，又睇吓你啲嘢食有幾耍家！

除咗一張大餐牌列咗湯麵、撈麵、生滾粥、點心，另外，仲有幾張額外餐牌喺啲小菜及炒粉麵。

如果一家人夜晚嚟，小菜套餐就啱晒喇。

人少少食餐晏，簡簡單單點啲點心、加個粥粉麵就可以嘞，但店長推介佢哋啲燒味，就改改燒味配粥粉麵啦。

燒味拼盤 $128

有叉燒、燒鵝、燒肉及油雞，燒味果然做得有水準，尤其燒肉，外皮燒得卜卜脆，肉質鬆化，又無醃得過鹹嘅情況；而燒鵝喺我覺得另一好食嘅燒味，皮脆油香。

南乳炆豬手 $48

一客有4大件豬手，炆得好腍，充滿南乳香，就連墊底嘅菜心都吸收點點南乳味，感覺都好食多少少，至於豬手嘅皮下嘅脂肪，入口唔覺肥，外皮好有咬口。

及第粥 $43

粥底睇落都好綿，米花爆開晒，食落真喺綿滑有米香，只喺略嫌配料少咗啲。

干炒牛河 $60

已有段時間無食乾牛河，友人極之喜歡依道炒粉麵，當然，小弟本身亦鍾意。個牛河算炒得乾身唔太油，食完唔會見碟底剩下好多油，而上色夠均勻，牛肉亦腍滑，質素不俗。

因為V City食肆唔少，相對上，粥粉麵唔算好特別嘅菜式種類，但喺燒味、粉麵、生滾粥始終喺我哋港式產品，又啱晒我哋口味，喺好多人嘅味道回憶，兼老少咸宜，故見到仍有唔少捧場客。

個人評分

味道：7/10
環境：7/10
服務：7/10
抵食：7/10
平均每人消費：HK$75

餐廳資料：
灑家燒味小廚 Master Kitchen
屯門屯門鄉事會路83號V City商場1樓L1-2號舖
2338 1398