2015年6月24日星期三

前家樂餐廳火鍋店 Happy Family Restautant:不樂俗套

以前搵食多集中晌旺角、尖沙咀、銅鑼灣依幾個搵食大區,隨著租金上升,唔少傳統旺區都好貴租,從而有唔少食肆進註一啲二線區域,漸漸變成搵食集中地,就好似天后、大坑、九龍城、大角咀……等等,之前,到過九龍城食人氣嘅韓烤,這晚就造訪大角咀,食嘅喺依然大熱嘅雞煲,再加美味嘅烤魚鍋,雙料滋味,做得不落俗套嘅「前家樂」,一個既玩食字,又有心思嘅店名。
其實熟路嘅話,由奧運站行落大角咀都喺10分鐘步程之內,挺方便,唔怪之得越嚟越多食店加入依邊戰區。啱啱,又遇著店方嘅「周年誌慶」,免收加一,大可讓客人慳番一少筆!
環境格局唔算有咩特別好講,裝修簡簡單單,似西餐廳多啲,但勝在環境光猛,地方企理。牆上貼有雞煲、烤魚嘅大相,突出番店家嘅主打主題。
雖然話主要賣雞煲、烤魚,都唔喺獨沽兩味,醉雞煲、麻辣雞煲、香辣雞蟹煲外,仲有多款火鍋湯底,如四川麻辣、芫茜皮蛋;此外,烤魚鍋可揀桂花或海鯇,湯底更有蕃茄薯仔、雲南酸菜、四川麻辣或香辣蝦膏可揀,實在多元化。
揀好雞煲及魚鍋款式,自然焦點就落在配料紙身上,一大張A4紙,印備晒所有打鞭爐配料,究竟包括啲咩,你睇就好過我講喇。
bowl麻辣雞煲 $138(半隻)/ $228(全隻)
為顧及大部份人嘅需要,我哋揀微辣,加上亦會叫烤魚鍋,所以,雞煲點半隻就夠晒。落單等無耐,雞煲就隨即送上,一陣陣香氣撲鼻,煲面鋪滿芫茜,唔喜歡食芫茜嘅朋友記得落單時叫走芫茜。
滾番起少少就可以食得,雖然唔知用邊雞種,但雞肉嫩滑肥美,既入味,又帶麻香,麻得嚟唔會太痺,由於喺微辣,少少辣而不失惹味,所以,無論雞肉抑或汁醬,都甚具水準。
bowl烤海鯇魚鍋 $178(小邊)/ $238(大邊)
我哋人唔多,同樣要細邊就OK喇,湯底就要蕃茄薯仔,諗住食咗個麻辣雞煲,就搵蕃茄薯仔湯底中和吓。海鯇烤過之後,連同大量配菜,如豆卜、紫洋蔥、蕃茄、薯仔、芫茜一大盆捧嚟,再加蕃茄湯,邊滾邊食。
烤魚鍋第一次食,感覺幾得意,外皮烤燶過,喺唔食,食就食裡面啲肉,好香滑,而且挺鮮甜,更唔會有泥味。個湯頭可以就咁飲,濃郁而酸香醒胃,配料亦好新鮮。
食完雞煲及魚鍋,喺加湯打鞭爐嘅時候,店員知我哋揀咗微辣,就主動問我哋試唔試吓加辣,故此,就俾咗一小碗自家炒製嘅麻辣醬我哋,加湯之餘,再加入麻辣醬,個湯果然即時變得火辣辣,好辣嘅朋友當然會大呼過癮。
bowl加拿大肥牛 $88(小)/$148(大)
店家嘅牛肉類選擇唔多,就只有加拿大肥牛一款,因為嚟得依度主要都喺食雞煲、魚鍋,火鍋配料都只喺「增值」配菜,所以,貴精就不貴多,果然,碟加拿大肥牛真喺唔錯,灼熟後,肉質鮮腍,夠肉味又帶油脂。
bowl日本蠔 $68
一客有成8隻,而且,呎吋都唔細隻,隻隻肥嘟嘟,而且就算灼熟都唔會縮得好犀利,蠔味鮮甜,實在抵食。
bowl芝士竹輪 $48
芝士丸、芝士腸食過無數次,依家進化埋芝士竹輪(獅子狗魚蛋),將芝士藏入竹輪裡面,一咬有爆漿嘅感覺,真喺好味過癮,值得推介。
bowl芝心魚丸 $34
試完個芝士竹輪,再試個芝心魚丸,當然唔會再有咩驚喜,不過,雖然依啲乜丸物丸都喺來貨,但啲芝心丸食落仍有一定質素,魚丸彈牙,芝心軟綿。
bowl脆炸響鈴 $25(小)/$42(大)
響鈴成為打鞭爐不可或缺嘅火鍋配料,不過,正如另一篇雞煲嘅食評提過,小弟鍾意食山根多過響鈴,可惜依度無。響鈴輕灼後,面層辣辣腍腍,內層香香脆脆。
bowl牛栢葉 $25(小)/$42(大)
牛栢葉、竹笙都喺啲味淡靠汁醬提味之食材,先嚟一客牛栢葉,放晌雞煲等佢索滿汁,又爽又辣,刺激呀。
bowl野生竹笙 $25(小)/$42(大)
竹笙本身無乜味,食其爽口,其次,貪佢本身有益健康,多食無妨。
bowl松葉蟹棒 $30(小)/$52(大)
無普通蟹柳咁粉,啲蟹棒食落一絲絲,個人覺得晌雞煲嗰邊淥會冚晒啲味,所以,晌魚鍋嗰邊效果理想啲,再者,魚鍋嗰邊火無咁猛,唔會太易淥散晒啲蟹棒。
bowl蔬菜拼盤 $38
蔬菜拼盤一籃有生菜、白蘿蔔、蓮藕、黑木耳及大蕃茄,據店員講,次次唔同,有咩新鮮蔬菜就執咩菜。
bowl娃娃菜 $20(小)/$34(大)
朋友都喺覺得一客蔬菜拼盤唔多夠,追加一份細嘅娃娃菜,雖然娃娃菜唔喺咩貴價嘢,但小店一樣務求用料新鮮。
bowl紅薯粉 $34
與其又喺米線、公仔麵,就不如要一客紅薯粉作為最後墊飽大家個肚之用,紅薯粉入口煙韌爽滑,配個蕃茄湯底,實在不錯。
bowl飲品
打鞭爐又點可能唔飲住嘢,前前後後又加多寶,又蜂蜜綠茶,汽水$12罐,其他清熱氣飲品都只喺$13-$16,取價都算合理。
雞煲及魚鍋都各有特色,前者食其香惹,後者食其鮮滑,再者,感受到店家揀料用心,招呼又到位,定價唔會太貴,相信小店有更好「前」途,希望小店繼續努力!

個人評分
味道:9/10
環境:7/10
服務:8/10
抵食:9/10
平均每人消費:HK$180

餐廳資料:
前家樂餐廳火鍋店 Happy Family Restautant
大角咀埃華街119號地下
3486 6286

沒有留言:

發佈留言