2015年6月9日星期二

川燒 Chuan Shao:望川秋水

「望穿秋水」意思喺形容對遠地親友嘅殷切盼望,小弟就無乜親人晌外地,所以,比較少有依一種感覺。不過,有時約朋友食飯,尤其耐無見嘅朋友,就真喺有少少望穿秋水卒之約到一齊食飯嘅感覺。今晚嚟到川燒,唔使望穿秋水啦,可以開懷一番。
門外放有兩枱4、6人枱,明顯喺為吸煙人士而設,不過,家下大熱天時,相信肯坐嘅人唔多,寧願食少次煙入去涼冷氣啦。
室內環境比想像中大,不過,都喺坐到30人左右,裝修以中國風為主,深色柚木枱櫈,通花紅燈籠,有份古色古香嘅感覺。雖然只喺閒日嘅一夜,但估唔到一樣客似雲來,坐滿八、九乘,有部份枱仲可以翻多一轉客。
牆上嘅黑板,都列有唔少推介菜式,亦有是日有供應嘅海鮮。
「餐牌」亦即喺點菜紙,主要分為6大類:特色小食、新鮮海鮮、風味肉類、健康素菜、飯類、甜品,另加啤酒、汽水……等飲品。菜式上見到讚好標誌表示廚師推介,而火辣辣嘅公仔唔講都明啦,此外,仲有唔少新出品。
海鮮類,一共有廿多款,有一半喺以時價計錢,亦未必一定有貨,但牆上黑板都會寫低是晚時令,好海鮮嘅朋友不妨留意下。
bowl汁燒一品鮑(時價) $55 / 隻
當晚嘅鮑魚定價$55隻,喺南非嚟,都幾大隻,以汁燒烹調,好入味,而鮑魚鮮味亦都唔差。師傅無切成薄片,只輕鎅兩刀,所以,初時食第一啖覺得煙韌還煙韌,但底位有少許實,之後切薄片食就感覺好多。故此,我哋都建設師傅燒好後,先切成薄片奉客,效果好啲之餘,又方便到客人享用。
小弟算歸類為食肉獸,所以,風味肉類嘅菜式就揀得多啲。肉類,一樣選擇多多,近30款。

bowl燒日本黑豚肉露筍卷 $28
以前多數點煙肉荔枝卷,川燒都有供應,不過,唔知露筍卷又如何。日本黑豚肉無煙肉咁肥,露筍爽脆無渣,又加咗孜然粉,的確幾好食。
bowl鹽燒黑豚肉秋葵卷 $20
再追加個黑豚肉秋葵卷,雖然只喺鹽燒,無添加任何香料,但味道同樣唔錯,秋葵軟軟腍腍,滑滑潺潺咁,配黑豚肉效果唔錯。
bowl燒鮮蝦膠腐皮卷 $28
幾得意嘅概念,以腐皮卷捲住啲鮮蝦膠做串燒,蝦膠鮮做算幾彈牙,而腐皮卷脆卜卜,不過,調味要改善吓,之前嘅串燒調味恰到好處,但個鮮蝦膠腐皮卷卻喺過鹹。
bowl燒羊仔架 $56
羊仔架一客有兩大件,算抵食,又燒得甘香吸引,唔點芥辣都一樣好味道,而且,雖然話喺羊仔架,但羊味幾濃,唯一挑剔有部份位置黐住筋位,入口頗韌,但整體仍屬軟腍。
bowl秘製醬燒BB豬肋骨 $128
晌美式餐廳食豬肋骨就試得多,晌串燒店就少啲,川燒嘅豬肋骨一份都幾多,伴青瓜片,而豬肋骨燒得金黃,唧吓檸檬汁,入口焦香得嚟,有點點清新酸香味,食落都唔會覺得太油膩,而且,肉質一啲都唔嚡,頗鬆化添。
bowl竹蔗茅根 $16
飲品方面,有可樂、雪碧、忌廉,本來想要加多寶,卻喺無貨,退而求其次,清熱解渴嘅竹蔗茅根、銀菊露都啱我。
bowl法式燒綿花糖朱古力厚多士 $48
最後嚟個一點甜,曾經晌其他串燒店試過燒綿花糖夾梳打餅,今次貪得意試試夾厚多士,睇睇點「法式」燒綿花糖法,原來,喺配法包,咁個名喺咪應該改為「燒綿花糖朱古力法式多士」呢?件法包烘得香脆,又塗滿牛油,綿花糖溶溶哋唔太過火,淋上朱古力漿,真喺甜蜜滿瀉。最有驚喜喺綿花糖與法包之間,夾有一層薄薄嘅香蕉果肉,讓味道多一層變化,值得一試。
川燒唔單止選擇多,取價亦公道,唔怪得有咁多人幫襯,而且,見有啲客同店員有傾有講,相信喺熟客捧場;再者,不論小食,還是串燒,從餐牌中都見到唔少創意,可謂滴水「川」石(成語原文喺用個「穿」字),比喻只要有恒心,不斷努力,事情一定成功,希望店家「川」(穿)上雲霄。

個人評分
味道:8/10
環境:7/10
服務:9/10
抵食:7/10
平均每人消費:HK$220

餐廳資料:
川燒 Chuan Shao
佐敦渡船角文英街17號地下
2311 1230

沒有留言:

發佈留言