2015年5月28日星期四

水木日本料理 Mizuki Japanese Restaurant:賞心悅木

晌雜誌睇過水木嘅介紹,以質素上乘又抵食作招徠,頗有吸引力,好嘢就自然想試,這晚,同好友前往,目的就喺細味高質素嘅日本菜。又睇睇喺咪咁高質素、咁抵食先!
水木位處一幢舊商廈之內,上到鋪面,有啲秘竇嘅感覺。
環境以柔和木系裝潢為主,一貫和風風格。顯然,水木喺做日本客居多,而且大部份喺熟客,因為,除日文滿天飛之外,好多客一入嚟就跟師傅打招呼及寒暄。
一入門口左邊有個半開放嘅小個室,而餐廳最尾埋邊有兩個貴賓房,一大一細,前者可以坐到10人,而後者亦可以容納4-6人。
bowl餐前小碟 $98
店家有多款小食,不過,都喺常見嘅款式,所以,不妨問問店員,佢哋經常有啲新款小食,今晚,就有幾款額外新加嘅餐前小食。
梅子沙魚骨,戒咗食魚翅,但食沙魚骨就無妨,小弟都喺第一次食,爽爽脆脆,又有啲韌咁,梅子味頗重,食食吓會覺得頗酸,但就好開胃!
梅水晶,其實喺醋醃海蔘,以柚子醋嚟調味,味道幾清新,而海蔘唔似一般海蔘軟腍腍,反而比較硬身,食落較有嚼勁,未必個個人覺得啱食。
粒貝螺肉,依個螺肉幾好食喎,軟軟腍腍,又有朕芥末味。不過,總感覺幾款細細碟嘅餐前小碟,定價有啲高。
bowl蟹籽冷麵沙律 $120
本來想試個北海道薯仔沙律,但店主話有款新出品,就喺依碗蟹籽冷麵沙律。麵條超煙韌,口感冰冰涼涼,撈咗啲胡麻汁,又加入火腿絲同蟹籽,感覺唔錯。
bowl喜之次一夜干 $380
以前都食過好幾次一夜干,其實一夜干喺北海道對當日捕獲鮮魚嘅一種食物保存處理方法,唔好見佢寫住「魚乾」就以為好似曬鹹魚咁,曬到「乾爭爭」,查實啲鮮魚會以味醂、醬油、鹽、糖……等等醃一醃,再風乾。食之前,再以慢火燒香,所以,魚味濃郁,肉質卻十分嫩滑,外皮又有少少碳火香味。
bowl蒜片牛柳粒 $190
牛柳粒非常腍滑,黐住少少肥膏,入口滿口油香,又帶有濃濃蒜香;而伴菜喺以北海道薯仔做嘅薯蓉,仲以為喺熱嘅添,原來以沙律形式咁食,食落冰冰涼涼,質感好軟滑兼有濃郁薯味。
bowl壽司盛合 $680
晌度食壽司實在要花多少少錢,平均一件要$45-$60,最貴嘅吞拿魚腩或海膽更要過百,因為的確感受到用料精。由近至遠,分別有馬糞海膽、三文魚子、帶子、新鮮牡丹蝦、深海池魚、吞拿魚(赤身)、金目鯛及吞拿魚腩(大拖羅),雖然唔喺試晒,但食咗幾款,已覺得超正,尤其啲馬糞海膽超綿滑,豐腴甘香,而吞拿魚腩富有油香,肉質細緻嫩滑,至於飯粒,搓得緊緻唔鬆散,入口卻喺軟綿黏糯。
bowl赤麵豉湯 $35
麵豉湯就飲得多,赤麵豉湯就較少接觸,飲落較一般麵豉湯仲要濃多啲,睇色澤你都覺得有分別,而湯內仲混有少少昆布及小菇菌。若果怕太濃,平常見開嘅麵豉湯都一樣有供應,同樣賣$35碗。
基本上,店家無刻意供應甜品,因為晌餐牌無甜品一欄,不過,晌枱面上就見到有和櫻屋( Wasakuraya)嘅兩款和風布甸介紹(芝麻及紫芋味)。向店長查詢一下,原來啲和櫻屋布甸都唔喺用嚟賺錢,志在回饋食客,所以定價超平,只賣$20一客,如食夠$600、$700甚至免費送埋俾客人。需知道,和櫻屋嘅布甸,嚴格挑選以全日本食材直接入口,成份天然,又無添加,零售價要成$30、$40,依家近半價,又點可以唔試。
bowl芝麻、紫芋布甸 $20
小弟要嘅喺芝麻布甸,質感超滑溜,與其叫布甸,我覺得似慕絲多啲,而芝麻味唔止濃,仲好香,直頭濃到好似食芝麻糊嘅程度,再者,陶碗盛着布甸,以木碟、木匙奉客,更感雅致。至於,紫芋布甸,即喺我哋慣叫嘅紫薯,黐咗一小口試試,口感無疑一樣咁滑,紫薯味天然粉香,真喺好味。
雖然水木喺一處高消費嘅地方,但果真一分錢一分貨,食材用料的確高質,無欺場嘅感覺,招呼亦好用心,上菜速度又恰好,讓人可以整晚都食得稱心舒服,真喺一頓賞心悅目嘅和風晚宴。

個人評分
味道:9/10
環境:8/10
服務:8/10
抵食:7/10
平均每人消費:HK$580

餐廳資料:
水木日本料理 Mizuki Japanese Restaurant
灣仔譚臣道13-15號萬利中心2樓
2411 0499

沒有留言:

發佈留言