大大張餐牌，明確將食物分類，3大類西班牙小食 : 海鮮，肉類，蔬菜，此外，仲有沙律，餐湯，多士，主菜，西班牙海鮮飯及飲品。
蒜片蝦 $70
據知西班牙人喺好鍾意搵蒜頭同橄欖油做菜，依一道蒜片蝦算喺表表者之一。蒜片，辣椒，好惹味嘅組合，蝦肉入口爽彈，充滿蒜香，微微嘅辣無蓋過蝦嘅鮮味。
白酒煮馬尼拉蜆 $118
另一道海鮮小食喺白酒煮蜆，馬尼拉蜆唔細隻，幾有肉地，口感煙韌爽口，而且滲出陣陣白酒及香草香。隨蜆附送嘅兩片烤麥包，既香且脆，淨食還是沾白酒汁，同樣精彩。
西班牙八爪魚配蒜茸橄欖油 $188
又一道蒜頭配橄欖油嘅菜式，八爪魚切得薄薄，浸潤晌蒜片及欖油之中，八爪魚柔中帶韌，一點點蒜香中嚐到八爪魚嘅鮮味。
西班牙海鮮飯配大蝦 $380
如果嚟到西班牙餐廳唔食西班牙海鮮飯，就好似有啲若有所失咁。依份"大鑊飯" 賣相夠晒吸引，飯面鋪滿多種海鮮，有 魷魚、大蜆、青口，大蝦，充滿海洋色彩，尤其大蜆同蝦，特別鮮味，而米粒以海鮮湯熬煮，飯粒軟硬度好對胃口，所以，唔好食都幾難。
最後喺甜品時間，餐牌上一共有8款甜品，香蕉拖肥批喺必試心水！
香蕉拖肥批 $60
標注為店家嘅推介甜品，確實喺不容錯過嘅甜品。加入拖肥做嘅批底，既香且脆，而白嘅 批心其實喺 香蕉忌廉，食落一啲都唔覺肥，反而帶有超香濃嘅蕉味，又軟滑，襯埋下面嘅蕉肉，真喺「蕉」氣勃勃。
心太軟配曲奇雪糕 $75
香蕉拖肥批嘅出色，就更顯得個心太軟更失色，其實佢個賣相唔差，朱古力味又十分香濃，可惜一啲「流心」效果都無。若果唔喺叫「心太軟」，純粹稱為熱烘朱古力蛋糕，嗰份軟綿香濃嘅口感，實在美妙。
食完一頓美味嘅西班牙菜，心想，幾時有機會會踏足依個充滿拉丁風情嘅國度呢！
個人評分
味道：7/10
環境：8/10
服務：7/10
抵食：7/10
平均每人消費：HK$250
環境：8/10
服務：7/10
抵食：7/10
平均每人消費：HK$250
餐廳資料：
JAR Just-a-Restaurant
中環擺花街8號2樓
2543 8000
中環擺花街8號2樓
2543 8000
沒有留言:
發佈留言