2015年4月23日星期四

鳴橋燒肉料理 Naru Kyou Yakiniku:棄暗投鳴

早前晌尖沙咀食咗餐好和味嘅日式烤肉,今晚再續「烤肉」之夜,同個死佬朋友嚟到油麻地嘅鳴橋燒肉料理,貪佢近近哋,而且,全包放題,即喺任飲任食,連加一都唔使兩舊水,仲有可以晌Table Map訂枱儲分,又可以下載優惠券賺多一客特大刺身蝦嚟試試,諗落划算嘛。
離油麻地地鐵幾分鐘腳程,好方便,位置屬於黐住旺角,所以,幾旺場,仲越夜越多人,訂咗枱始終穩陣啲,離開時仲見唔少人晌門外等位添。門口大大個餐牌,有咩食一目了然。
室內環境唔喺好大,坐滿人之時真喺幾逼,裝修亦都好簡單,反而餐廳尾落幾級嘅用餐區闊落少少。
基本收費,$178一位(星期五、六、日、假期及其前夕,另加$10),任飲任食兩個鐘,我哋咁戰鬥格,夠晒啦。當中,已包咗超過60多款嘢食,有肉類、野菜、和食、甜品、炸物、刺身、海鮮及飲品。
另外,又可以加$40升級為皇牌放題,有多6款嘢食可以任點,就喺牛肋肉、花虎蝦、帆立貝、刺身帶子、馬刀貝及意大利芝士蛋糕,想享受多啲,定慳番啲,悉隨尊便。此外,仲有一張點菜紙寫住付款項目,有兩款特別食物,同埋啲啤酒、清酒、紅酒、白酒、香檳之類,小心啲剔,咪亂剔剔鬼錯。
bowl三文魚頭湯
燒烤需時,所以,不如點個湯潤一潤。湯品有味噌湯及三文魚頭湯,揀後者心理上覺得多料啲,睇落跟味噌湯無咩分別,只喺入口多一陣三文魚嘅味道,唔錯!唔錯!
bowl蟹籽沙律
慣常自助餐、放題嘅作戰攻略之一,就喺食啲沙律作為前菜,開開腸胃等陣可以食多啲。甘筍絲、白蘿蔔絲、青瓜絲拌點胡麻汁,蟹籽落手重,食落清清爽爽。
bowl特大刺身赤蝦
跟住一人送上一隻特大刺身赤蝦,果然特大,有成隻手掌咁大。如果食完想再食,就要付款點選,屬於「付款項目」,不過,都只喺$10隻。質素唔算話超高,肉質未夠爽,但味道仍覺鮮甜,賣你$10一隻仲想點!
除咗有啲醬油之外,枱上仲有七味粉及日本鹽,作為補充式調味,基本上今晚都好少用到。
bowl飲品
食烤肉真喺唔少得飲汽水,除可樂、忌廉、橙汁唔在講,仲有檸檬+C,及新加嘅C&C蘋果汽水;咁熱氣,最得小弟歡心都喺自家製五花茶,一小渣奉上,唔使嗌多幾次咁麻煩。此外,亦關顧到唔方便飲凍嘢嘅人,熱飲包括柚子茶同綠茶。
bowl肉類
好快第一份肉類上枱,我哋點咗鹽燒牛舌、汁燒牛肋肉、秘製牛柳肉、七味豚背肋、七味豚拖羅、香草雞翼、鹽燒雞太腿、法式香草羊架。擺盤賣相方面俾人感覺麻麻,除因為啲肉切得薄身,擺起嚟唔夠立體之外,亦無好好分隔出唔同嘅肉類,感覺有種隨意嘅堆砌感。
反而,汁燒牛肋肉及法式香草羊架分碟上,觀感好啲。
雖然賣相欠奉,但啲肉嘅質素又唔差喎,牛舌煙韌有咬口,牛肋肉肉質細緻,牛柳肉又好腍滑,豚拖羅富油香,羊架亦羶香軟腍;唯一唔喺太鐘意喺啲雞翼起單骨,反正雞翼又唔喺大隻,就無謂仲斬開兩截。而香草醃得稍為重手咗啲,稍稍搶咗肉味。
bowl海鮮類
因為升咗級,可以點虎蝦,帆立貝,仲加埋法式香草龍脷柳,小墨魚,牛油蒜蓉青口。虎蝦跟帆立貝確喺幾有睇頭,睇落都覺得有啲質素。
味道比預期好,尤其龍脷柳,唔會好似羊架落得過多香草。虎蝦爽甜彈牙,帆立貝好有肉地,小墨魚爽口好味。
燒咗幾轉,張牛油紙已經黑晒,侍應都好醒目幫手換紙。再燒多幾轉肉期間,點咗啲炸物同刺身攝吓時間。
bowl炸物類
天婦羅有蝦、野菌、南瓜、地瓜(即喺蕃薯),樣樣剔不如點個雜錦一碟過。
天婦羅做得不過不失,南瓜同蕃薯都夠粉甜,喺炸漿厚啲啲啫。
bowl刺身類
總共有7款刺身,因為老友喺刺身粉絲,所以,無懸念就一次過點晒。
整體刺身唔算高質,亦唔差,但升級嘅帶子則頗有水準,鮮甜味美。其後,仲留少少刺身拌飯,DIY刺身飯也。
bowl野菜類、芝士麻吉
最後燒乜好?咪野菜囉,選擇得翠玉瓜、野菌、南瓜、粟米,唔使多諗又喺點晒。還要加多件芝士麻吉,究竟喺乜,個店員竟然賣我關子,話好好食,值得試!
因為佢唔喺明火嘅烤爐,所以粟米較難燒,要耐心啲慢慢燒。南瓜依然粉甜,野菌爽爽哋。而芝士麻吉就似喺芝士加炸魚片頭,燒香之後,芝士又溶溶漏漏,確喺幾好食喎。
bowl一口日式御飯
臨尾貪得意,點咗一客「一口日式御飯」,叫得一口應該唔會多,可能成晚都未發市,點知嚟到有啲「賴嘢」嘅感覺,何止一口,直頭成碗,小弟一向唔嘥嘢,加埋啲刺身,一於刺身飯,照樣成碗頂晒佢。其實啲珍珠米幾軟糯,口感唔錯,加埋之前點嘅刺身,正架!
bowl甜品
老友唔太啱,我就當然喜歡啦,所以,升級嘅意大利芝士蛋糕、雪米糍、綠茶雪糕及胡麻雪糕全部一網打盡,樣樣一客。意大利芝士蛋糕來貨嘢,不過不失,欠一點咖啡酒香;雪米糍喺芋頭味,啱晒我,而兩款雪糕都好好食,質感軟滑,綠茶及芝麻都十足。
最後30分鐘,就喺鯉魚旗出場,最後落單嘅溫馨提示,表示你要快啲點最後一輪嘢食嘞!
題外話,之前翻餐牌時見到佢哋仲提供定食($48-$88),定價實惠,所以,嚟到唔食烤肉亦有其他選擇。
雖然肉類嘅揀選欠缺一啲富油花帶油香質素嘅肉類,但以咁嘅價錢,選擇又唔算少,任食任飲,想慳慳哋過吓燒肉癮,都喺個好唔錯嘅地方。

個人評分
味道:7/10
環境:7/10
服務:7/10
抵食:8/10
平均每人消費:HK$240

餐廳資料:
鳴橋燒肉料理 Naru Kyou Yakiniku
旺角砵蘭街104號
2613 8830

沒有留言:

發佈留言