2015年4月1日星期三

奇樂香辣雞煲 K Lok Spicy Chicken Hot Pot:奇開得勝

跟朋友約飯局,被問及有無食雞煲好介紹,其實小弟對雞煲沒有太大偏好,試過嘅餐廳都唔多,不過,記憶所及,荃灣二坡坊嘅常滿雞煲及尖沙咀山林道嘅奇樂香辣雞煲都覺得上好,當然,城中好味嘅雞煲又豈止兩間,但剛啱晌雜誌見過奇樂有新嘢出,所以,就選定奇樂再訪。
大家7:00pm準時到達,又好似上次咁,早段人客唔多,不過,去到8:00pm就已經爆晒棚咁滯,打工族加班都已經喺習慣事。
 7:00pm到達時都唔算多人!
8:00pm已差唔多。
上次食過嘅冬瓜粥水雞煲原來已經「落架」,唔打緊,反正嚟都喺試雜誌介紹以嘉美雞入饌嗰新煲「和味沙哇雞煲」,能唔能夠旗開得勝,取得好成績,試過先知。然後,問問店長有咩靚貨揀手嘢火鍋料,另按再大家喜好加啲減啲,先點一輪,唔夠食至再點過。
雞煲落單15分鐘後就上枱,一煲香氣,原來個煲唔好熱住食,因為會卸走啲香氣。
個雞煲幾辣,辣得有少少麻,但唔喺四川麻辣嗰類,只喺辣勁夠而叫條脷都有啲發麻。雞件肉質嫩滑,十分惹味。不過,感覺又唔喺好算泰式,原來,另一重點放晌一陣個湯底度。 如果覺得啲雞太辣,可以等加咗湯先再食,仍不失香味,但辣度減半。
今次再嚟另一搞作喺玩配對,究竟喺乜嘢配乜嘢呢?就喺餐酒配雞煲,本來小弟唔好酒,對個配對興趣唔太,但同行老友好想試,做兄弟嘅梗喺捨命奉陪啦!
店方話有兩款酒幾襯依款雞煲,講明小弟唔好酒,揀酒重任擺晌老友身上,兩款中揀嚟德國嘅白酒(German Pieroth Blue Nahe $338)。我就唔多識評酒,純粹個人感覺。入口有陣陣果香味,清淡微甜,口感幾圓潤,酒精度8-10%,易入口,酒中滲出嘅甜可中和一下雞件嘅辣味,感覺又真喺幾夾。之後再邊食海鮮類火鍋料,都一樣襯到。
除咗白酒餸雞煲,打鞭爐頗燥熱,所以,加多渣洛神花茶($48)及其他飲品嚟解解燥兼去油膩。
食完雞煲,喺放湯時候,個湯就帶泰式風味多啲,酸酸辣辣,有層次。不過,個人建議,之後加水好過再加湯,因為越滾越蒸發,個湯變得太濃太鹹,淨加水就平衡番個味道。
火鍋料隨即上枱,先嚟一份牛肉三重奏($428),應該可以滿足到一眾牛魔王,因為一份有齊牛肉粒(上層)、特級手切肥牛(中層)及安格斯肥牛(下層),而且,每類牛肉份量也不少,比起散叫划算。
bowl牛肉粒,厚切丁方,都幾大粒吓,需要灼多少少時間,質感較咬口;
bowl特級手切肥牛,我哋一致公認3款牛肉之中最好食,油花分佈平均,肉味重富油香,卻唔會好油膩,輕灼後夠晒軟腍;
bowl安格斯肥牛,雖然喺有「安格斯」之名,入口亦都腍滑,但油香較少。
跟手就喺其他火鍋料。因為喺閒日,又嚟得早,師傅有時間砌好所點嘅火鍋料一盤過靚靚仔仔拎嚟,個店員話如果客多就唔會咁做,因為做唔「切」。
bowl手打墨魚丸 $88
一客有8粒,白雪雪嘅墨魚丸真材實料,墨魚味濃郁,咬落爽口。
bowl脆鯇魚腩 $58
脆鯇魚片食得多啲,脆鯇魚腩就較少晌打鞭爐度食,鯇魚腩挺新鮮,不過,魚腩較厚,有啲「韌」,失卻個「脆」度。
bowl白鱔片 $88
反而啲白鱔片幾好食,長長一片,入口有份韌勁。
bowl水魷魚 $68
一客份量感覺有啲偏少,但魷魚卻嗻非常爽口。
bowl雙拼餃 $138
雙拼揀咗奇樂水餃皇(散叫$108 / 8粒)及黑松露帶子餃(散叫$108 / 6粒),但雙拼就每樣有3粒,所以,除勻貴過散叫,但就可以一次過試晒兩款。
原來奇樂水餃皇裡面喺蝦肉、鯪魚肉及豬肉,加埋少少木耳絲及花生粒,又真喺幾得意。
黑松露帶子餃果然好堅,裡面有好多帶子肉,入口好爽,最重要黑松露味幽香濃郁,好值得試吓。
bowl珊瑚蚌 $88
一份珊瑚蚌有唔少,爽就爽嘞,不過,切得太大件,淥咗一炷成匙羹咁大件。
又遇着店家推廣緊一週年大酬賓,以個人消費計滿$350(加一前),雞煲有半價優惠(優惠去到5月尾),就喺友人要咗支白酒,所以砌得夠數,雖然只喺慳百零蛟,但就喺夠要多一、兩份火鍋料啦。另一個優惠,惠顧酒類(啤酒除外)送桶蠔3隻,上次已經試過佢啲桶蠔,隻隻碩大無比,真喺好得。
前菜(麻辣青瓜)收$10,都預咗,而醬料費收$15位。雖然,都知道好多火鍋店都會收依個費用,不過,老老實實吖,食咁多次雞煲都真喺好少沾啲醬料,因為雞煲本身個湯汁都帶味,如果可以俾啲客揀要定唔要就最好咯,餐廳可能因此少咗啲收入,但印象上就俾人覺得好好多。
今次所試個雞煲都挺有特色,火鍋料亦夠新鮮有質素,但大家一致認為襯海鮮多過肉類。故此,點咗個牛三味有點嘥,隨意點少少肉,一、兩款就可以喇。如果唔喺有支酒,又試咗個牛三味,個人平均清費應該跟上次差唔多,$250-$300左右一個人!

個人評分
味道:8/10
環境:8/10
服務:8/10
抵食:7/10
平均每人消費:HK$420

餐廳資料:
奇樂香辣雞煲 K Lok Spicy Chicken Hot Pot
尖沙咀山林道29-31號廣利樓地下4號鋪
23928433

沒有留言:

發佈留言