2015年4月28日星期二

御膳 Imperial:載御歸來

朋友搞局,話食私房菜,懶神秘話仲要晌觀塘廠廈裡邊,哈哈,原來喺御膳,即時話佢知小弟曾經到訪過,不過,依然有興趣再訪,因為,佢哋嘅私房菜實在有質素,似乎做出啲成績,有種載譽歸來之勢。今次重臨,門面無晒啲雜誌專訪嘅報導,更有私竇感。
因為有朋友打點,所以,唔使其他人操心,亦一早收到菜單,多款菜式都喺未試過。而去到餐廳,仲一早坐滿客人,真喺唔訂位就無得食。
bowl麻辣鹵水大拼盆
唔使多講,就知喺麻辣夾鹵水嘅組合,拼盤有牛肚,雞絲,豬腸,惹味還惹味,但真喺辣得刺激,而牛肚好爽口,雞絲好綿滑,豬腸唔肥又無乜豬臊味。
bowl蒜蓉粉絲蒸大蟶子皇
第二道上場喺熱辣辣嘅蟶子皇,隻隻都好大隻,斤兩十足, 蟶子既彈牙,又鮮甜,而且蒜味香濃得恰到好處,唔會冚晒啲蟶子鮮味。底下沾滿蒜香及豉油味嘅粉絲,亦唔好錯過。
bowl避風塘炒大肉蟹
依度整肉蟹有好多做法,四川香辣炒、豆豉涼瓜焗、薑蔥上湯炒、麻辣水煮……等等,避風塘炒算得上店家嘅招牌。睇見對蟹鉗,就知隻蟹斤両十足,一整碟鋪滿炸蒜粒,香氣四溢,我哋選上小辣,微辣醒神,蒜香惹味,肉厚味鮮,所以,大家都讚,食到吮晒手指。
bowl花彫雞油蛋白蒸大肉蟹
食完個避風塘炒,再嚟個花彫雞油蛋白蒸,實在滿足晒鍾意食蟹,又想多花款嘅朋友。花彫味唔太重,只喺隱若有微微酒香,可以加重多少少都得,但蟹肉嘅鮮味實在喺度菜嘅亮點,蛋白亦十分滑溜。個人覺得先食個花彫蒸,後食個 避風塘炒,先淡後濃,可能整體效果好啲。
bowl江南百花雞
百花即喺蝦膠,依道菜即喺蝦膠釀雞,雖然我哋被安排享用半隻,但已好夠皮,因為每件雞釀有大大嚿蝦膠,入口爽彈,而且雞件已經去晒骨,入口啖啖肉,淋上個琉璃茨,好美味嘅一道升級版家禽菜式。
bowl富貴金龍
個名就晒貴氣,金龍仲以為喺蟮之類,原來喺原條沙巴龍,起肉之後一邊鹹蛋黄炒,另一邊酥炸,再砌番魚形,賣相一啲都唔「求其」。前者味道鹹鹹香香,後者酥炸配蛋黃醬,外脆內嫩。不過,要挑剔喺鹹蛋黄部份有少少過鹹,而酥炸部份亦未見驚喜,算喺特別得嚟平穩嘅菜式。
bowl白胡椒爆炒南非鮑魚
之前都曾經食過,好欣賞佢個做法,今次再遇,自不然鍾意啦。南非鮑魚個個有近檸檬咁大,哎落爽得嚟帶點咬口,肉質軟腍而煙韌,白胡椒香而不辣,水準無差到。
bowl士多啤梨骨
比起斬成細細粒嘅腓排或肉排,以大條嘅豬肋骨做,當然感覺有份豪氣;肋排炸過,所以一咬會有種焦脆感,而個士多啤梨汁甜而不膩,淡淡甜味,又有少少酸香,頗醒胃嘅菜式。
bowl上湯浸時菜
雖然平凡,但菜心的確清甜好食,濃郁嘅上湯讓菜心更好味,面面再放啲蒜子,炸香,浸透,同樣好味。
bowl招牌御膳炒飯
叫得「招牌」當然喺耍家之作,材料豐富,包括蝦仁、帶子、牛柳粒,鹹蛋蓉、冬菇、蔥花。上次食記得好好味,唔知喺咪今次改用咗珍珠米,雖然食落唔油,但喺口感無咁爽身,仲有點濕潤嘅黏糯感,之不過,始終喺好多料嘅製作,豐富嘅口感,而且飯粒好入味。
bowl菠蘿鳥
最後嘅生果盤,上次嘅「岩石西瓜」之後,今回個菠蘿鳥一樣有驚喜,有好多生果,果盤做得有心思,砌成一隻鸚鵡咁。生果有香甜嘅新鮮菠蘿、士多啤梨、藍莓、奇異果(未熟,有啲酸)、爽脆清甜嘅蜜桃片,實在叫人食得開心。友人打趣問個菠蘿殼會唔會翻用,我諗就唔會喇,因為做下一個都要再切啲新鮮菠蘿,所以都無需要循環再用。
綜觀味道,賣相,份量,$500個價錢真喺食得過。雖然我哋一班人唔好酒,亦撞唔啱有人生日,但依度免開瓶費,免切餅費,好適合一大棚人包場搞活動。

個人評分
味道:9/10
環境:7/10
服務:8/10
抵食:8/10
平均每人消費:HK$500

餐廳資料:
御膳 Imperial
觀塘敬業街65-67號敬運工業大廈12樓F室
3575 9567 / 9029 1530

沒有留言:

發佈留言