2015年4月30日星期四

香港地 Hong Kong Day:噓韓問暖

表姨甥女搵到份新工,話過請佢食番餐,太高檔嘅嘢佢唔喺好慣,佢就最鍾意啲茶記,所以想起「香港地」,因為佢走嘅雖然喺茶餐廳路線,但以環境、服務、食物秤起嚟就有菜館嘅水準,仲記得舊年年尾嚟食過嘅 茄汁西蘭花炒蝦球,絕對媲美菜館水平,絕無迤做。
估唔到今晚咁多人,所以,被安排坐到最入嘅卡位,仲好啦,靜靜哋方便傾偈。餐廳環境乾淨企理,比一般茶記闊落。
本來介紹啲小菜俾表姨甥女試,不過,後生女都喺哈日、哈韓,啱啱做緊個「韓風料理」推廣,再者,小弟都喜歡試新嘢,所以,揀咗一個鐵板珍珠飯,一個鮮人蔘雞。雖然whatsapp拉近咗人之間嘅溝通,不過,點都唔及得面對面嘅噓寒問暖嚟得親切。
bowl鐵板美國牛肩肉紅米珍珠飯 $58
鐵板送到嚟仲感受到股熱力,望落去粉嫩嘅牛肩肉非常吸引,配上兩款醬汁:韓式辣醬及甜醬油。飯面煎咗隻荷包蛋,篤穿之後讓蛋黃流下,再將下面嘅泡菜跟飯撈勻嚟食。
飯粒口感綿綿當中又有啲咬口感,蛋漿及泡菜拌勻,味道唔錯,而牛肩肉嚟到時仲喺紅噹噹,近乎利用鐵板熱力逼熟,所以,半生半熟狀態,嫩滑而富肉香。鐵板嘅功能猶如韓式石頭窩,不過,別期望有飯焦嘞,哈哈。
bowl鮮人蔘燉鮮雞 $72
人蔘燉鮮雞咪望落去細細盅,份量可不少,內裡足有半隻雞,再配埋韓式炒年糕及泡菜。除燉鮮雞,另有一款清燉鮮豬肉丸,同樣賣$72,只限晚市供應。
燉湯湯色清澈,入口味道先苦後甘,撈兩撈發現湯內有條半人蔘,足有一隻手指咁粗,毫無欺場;雞肉已經燉到好腍,咪以為個菜得湯同雞,原來底下仲有啲米飯,有少少似糯米咁,黏黏糯糯帶點膠質。
bowl韓式泡菜
泡菜色澤鮮紅,辛辣度無咁犀利,口感爽脆。
bowl韓式炒年糕
咦,個炒年糕炒得幾好喎,年糕軟軟腍腍,一咬極煙韌,仲伴有大豆芽、五花腩,個醬濃香惹味,一大碟嘅份量,真喺配埋個鮮人蔘燉鮮雞,唔飽都幾難,所以,建議兩個人點一份食穩陣啲,一個人食怕食唔晒嘥嘢啫。
bowl凍檸蜜(+$13)、凍奶茶(+$11)
因為以上兩款韓食都喺散點菜式,無套餐,不過,加配飲品都會平少少。小弟杯凍檸蜜穩穩陣陣咁;而表姨甥女杯凍奶茶,佢話相當唔錯,始終佢張餐紙墊都有寫,奶茶喺佢哋嘅「至尊3寶」之一。
上次嚟試過佢啲傳統中式糖水「湯圓生磨腰果露」,認真高水準,跟餐會比正價平$5(加配優惠),所以,推介表姨甥女試番一客唔好走寶。佢原先都打算跟我上次要湯圓生磨腰果露,可惜賣晒,但湯圓生磨合桃露佢都啱。
bowl湯圓生磨合桃露(+20)
一客有5粒迷你芝麻湯圓,粒粒細得的的骰骰,皮薄煙韌,麻蓉香甜;而合桃露口感非常滑溜、少甜,最正喺合桃味夠晒香濃自然,加$20一碗,真喺超抵食。出去有啲質素嘅糖水鋪,要碗乜露物露都唔止咁嘅價錢,仲要加埋湯圓喎。
bowl柚子芒果布丁(+20)
小弟本來都唔喺要依款布丁,而喺想試香港地鴛鴦布丁,無獨有偶,都喺賣晒,可見佢哋啲甜品似乎幾受歡迎。我杯布丁如果多番幾片薄荷葉,有就更加靚仔晒。最底下喺芒果布丁,上一層喺柚子啫喱,杯面就喺西米及鮮芒果粒,食落清爽怡人,啫喱嘅柚子味十分突出,如果啲西米加少少稀釋咗嘅柚子蜜就更完美!
表姨甥女多謝我話有餐好嘢食,大家仲傾談咗唔少飲食嘅事情。如果你將香港地跟一般茶記比,可能會嫌貴咗啲,但跟去啲中菜館比,一定平一截啦,仲要無茶芥、無加一就食到相當水準嘅菜式,所以,見佢咁多人幫襯真喺唔會事必無因嘅。

個人評分
味道:8/10
環境:8/10
服務:7/10
抵食:8/10
平均每人消費:HK$97

餐廳資料:
香港地 Hong Kong Day
大角咀海泓道1號奧海城三期UG65號鋪
2758 5228

沒有留言:

發佈留言