2015年4月9日星期四

圓山台灣料理 Grand Hill Taiwanese Restaurant:左右逢圓

成日都聽到朋友講話過台灣玩,仲要一年梗會過幾次,而小弟近十年嚟,都只喺去過寶島3次,第一次2007跟團齋去台北,超悶唔好玩;第二次2010自由行去台南高雄墾丁,雖然遇着打風,但玩得好開心;第三次2013自由行到台北跟宜蘭,喺一次寫意開心之旅。對台灣,印象唔錯,今晚嚟到圓山,唔知可唔可以重溫當日台旅之味?
雖然起初人客唔多,但越坐越多人,但大部份喺斯文客,加上座位安排都唔太逼狹,所以,感覺都唔太嘈雜。
圓山主打賣台菜,不過,都加入咗少少新元素:川菜,可謂左右逢源。食物分為涼菜類、台灣小菜、四川菜式、海上鮮、鮑參翅肚、湯羹、主食、甜品等,;亦另外加插一啲特別嘅廚師推介菜式,以及招牌海鮮推廣。茶水每位收$16,另加一服務貴,所以,喺屬中高檔消費嘅餐廳。
bowl前菜
我哋5個人奉上兩小碟前菜,分別喺涼拌青瓜及魚仔花生,兩者均附上菜脯,前者爽脆帶濃濃蒜香,後者魚仔鹹香過過口癮。
bowl台式鴨舌 $78
據經理講鴨舌喺自家製,製作認真。咬落軟腍帶爽,質感具彈性,味道辣中帶麻,卻唔太過火,相當惹味。
如果喜歡台式小食,又夠人多,可以點個「台式四拼」,賣$238,可在指定9款涼菜中任拼4款,彈性大又划算。
bowl彰化鹽水鴨 $78
鹽水鴨第一次接觸,顧名思義就知喺台灣彰化特產,除例牌,仲有半隻($148)及全隻($280),我哋人少少,例牌夠晒啦!
賣相普普通通,睇落好厚肉,入口鹹香,味道跟港式臘鴨勁似,但肉質鬆軟好多,而且,又唔會感覺好肥好膩,橫睇啲鴨件都喺瘦晒身,搵唔到絲亳肥膏。作為冷盤,再冰涼一點就更正嘞,推介一試嘅涼菜。
bowl基隆花枝羹 $178
跟團嗰次去台北,算喺路過基隆,但對此地印象模糊。一窩花枝羹份量十分,大概可到7、8碗份量,而且,一撈起已見材料甚豐。
首先湯羹嘅質感討好,濃杰度啱啱好,內裡仲有好多冬菇絲、冬筍絲、四季豆、芹菜絲同甘筍絲等等配角食材,口感豐富,當然,呈長條形嘅主角花枝丸好有咬口,真喺唔錯。
bowl蠔油長旺 $98
跟住介紹依道較重口味嘅喺豬大腸,大腸已去走大部份肥膏,而且,洗得頗乾淨,所以入口未算好肥,只有少許油膩感,但煮得好腍好軟化。
bowl台式冰梅骨 $128
冰梅骨有啲糖醋骨嘅影子,以前都曾經食過,鍾意佢酸甜開胃嘅感覺。店家採用較大件嘅腩排,食落啖啖肉,炸過再上汁,外層有點焦脆;而個汁調得幾好,濃香酸甜,無話太嗆喉嘅弊病,比用醋所做出嘅酸味較天然。
bowl台式炆海石班 $218
餐廳有一系列嘅海鮮菜式,其中部份更會列入招牌海鮮名菜推廣優惠之中,所以,依道菜原價標為$298,依家就平一截就可以食到。
成條石班超晒骨,食用方便,炸後再加個炆涼瓜淋上面,魚肉挺嫩滑,沾上炆涼瓜嘅茨汁,帶些微微甘味。不過,個人都喺鍾意蒸魚,可嚐盡魚嘅鮮甜味!
bowl台灣炒新竹米粉 $98
尾聲,嚟一客新竹米粉作為主食打底,其實,主食有好多選擇,如常見嘅鹵肉飯、擔仔麵。新竹米粉喺個質感特別,幼細嘅米粉入口煙韌爽口,炒得嚟唔油膩,配以肉絲、甘筍絲、冬菇絲,簡單味美。
卒之去到甜品時間,經理嘅推介喺佢哋嘅秘製糖蕃薯,即撞豆腐花亦話都唔少人會點。
bowl秘製糖蕃薯 $48
蕃薯色澤橙黃,淋上糖漿,睇見都覺得好甜蜜。入口好粉香,真喺蕃薯有蕃薯味,因為時下有時啲蕃薯真喺無乜味,而且,軟綿嘅蕃薯很有蜜香,熱呼呼嘅甜蜜感覺!
bowl即撞豆腐花 $68
原來豆腐花喺以黃豆每日新鮮磨製,即點即撞,以木桶盛上,一桶大概可分到6-7碗,伴糖漿又得,伴黃糖都得,得咗!豆腐花入口滑溜無比,瀡一聲滑過喉嚨,不過,豆味略嫌失色,比較淡薄。
散叫或者覺得有啲貴,又好難預價錢,套餐喺咪划算啲又合你「筆直」呢?所以,餐廳有提供數款套餐,有平有貴。
台式套餐
龍蝦鮑魚套餐
除台菜嘅套餐,川菜套餐同樣有得揀,嗜辣者不妨挑戰吓。如果想左右逢源,又台菜,又川菜,咁就唯有散點番。
四川風味套餐
小弟雖然都喜歡台菜,但絕無食台菜嘅心得,只喺就着個人口味,覺得圓山都做唔錯。此外,服務都好稱心,添水換碟都非常到位。

個人評分
味道:8/10
環境:7/10
服務:8/10
抵食:8/10
平均每人消費:HK$220

餐廳資料:
圓山台灣料理 Grand Hill Taiwanese Restaurant
尖沙咀金巴利道25號長利商業大廈1及2樓
2721 9833

沒有留言:

發佈留言