2015年4月11日星期六

咖啡廳 Cafe One:不會重One

對上一次食下午茶自助餐已經喺上年年尾嘅事,唔算隔得好耐,不過,記得曾有段時間都幾迷上食下午茶自助餐,差唔多個個月梗有一次。今日趁過港島區掃墓,順道同老婆嚟銅鑼灣柏寧酒店嘅Café One撐枱腳,嘆番次下午茶自助餐。
自助餐時間由15:00-17:30,兩個半鐘喺相當充裕,不過,我哋掃完墓之後再要辦點事,遲咗十多分鐘。到場所見,算唔上好多人,大概6乘左右滿,大部客人都被安排坐晌入面近食物區,所以,近門口嘅一排排枱櫈都喺「吉位」。
環境方面,其實都幾鍾意,雖然裝修唔算有咩特別,就像一般酒店內嘅自助餐餐廳,不過,座位嘅間隔比較闊落,唔會有太擠逼嘅感覺,木櫈有把手,讓人坐得舒服多一點;面向記利佐治街及告士打道一邊,全部都喺落地大玻璃窗,可以睇睇街景,可惜事前未有特別要求坐晌近窗位!
同樣,食物區嘅空間亦好寬闊,寬闊到好似行商場咁,遇上爆場都唔怕被人逼嚟逼去,搞到水洩不通。
bowl自助果汁
行到身水身汗,今次唔喺相機先食,喺果汁先飲,有橙汁、豆漿及西柚汁,先貫杯橙汁解吓渴,之後再飲吓西柚汁。
bowl沙律吧
陣勢好弱,得翡翠苗、紫椰菜、火箭菜及雜沙律菜,另一邊晌冷盤旁再多幾款預製好嘅沙律,不過,款式唔多特別,名牌亦欠奉,只喺睇喺咩食材估估吓;反而喺醬汁中有兩款較有特色:蜜糖芥末油醋汁及芝士汁。
bowl冷盤
主要都喺啲冷切肉腸,如沙樂美、火雞肉腸……等等,另一盤就喺燒牛肉,所以,款色同樣唔多。將幾款冷盤料加埋落啲沙律度,就成為小弟嘅開胃頭盤,個蜜糖芥末油醋汁又真喺幾好食!
bowl壽司、刺身
雖然好大個食物櫃位提供壽司、刺身,不過,個師傅好似好迤咁,幾次經過見到壽司擺出嚟嘅款式及數量都唔多。平時,我都夠少晌自助餐度食壽司,不過,眼見整體都唔多嘢食,所以,極之難得拎咗一碟壽司,質素?普普通通咁啦!
bowl熱盤類(一)
另一邊嘅熱盤類,有啲中式點心、牛油栗米、蜜糖雞翼、XO醬魷魚鬚、乾燒伊麵、咖喱角、煎釀蓮藕餅……等等,最好味喺啲魷魚鬚同蓮藕餅,前者好惹味,而後者爽脆,仲加多碗足料嘅碗仔翅,味道唔錯喎。
bowlCafé One Bao
此外,熱盤仲有一樣值得要試嘅喺「Café One Bao」,即喺台式嘅刈包,有好幾款口味:越式扎肉、韓式泡菜牛肉、避風塘蝦肉及黑松露雜菌;同師傅講蝦肉拼雜菌,結果就只喺俾咗個黑松露雜菌,其實味道認真唔錯,包身幾軟熟,微微暖,雜菌滿有黑松露香。
bowl西式包點類
晌食物枱嘅一角擺放幾款西式包點,包括手指三文治、美式鬆餅、菠菜酥及士乾,小弟較有興趣喺兩者。個菠菜酥內藏幾多菠菜蓉,酥底做得不俗,充滿牛油香;而士乾塗點忌廉及士多啤梨果醬,已相當唔錯。
bowl熱盤類(二)
再行去另一邊熱盤區,依邊就多數喺啲煎炸或濃味嘢居多,樣樣拎啲就已經一整碟,有煎日式餃子、蔗蝦、炸甜蕃薯 / 芋頭、印度香草烤雞薄餅、天多尼煎魚、醬燒豬肋骨、金菇牛肉卷。以上多幾樣嘢都好好食,尤其啲炸甜蕃薯 / 芋頭、薄餅、煎魚及豬肋骨,香口惹味。
原來仲有個檔口有即煎嘅XO醬蘿蔔糕,啱晒老婆,佢要咗一小碟,小弟就黐一粒試試,雖然即整,但唔夠熱辣,但XO醬夠重手,十分鮮辣惹味。
bowl甜品
都喺時候最後出擊攻甜品,甜品櫃位其實擺晌入門口左邊,特別自成一角,數數埋埋都有十多款,不外乎啫喱、奶凍、慕絲、切餅、軟雪糕……等等,兼有新鮮即做嘅比利時窩夫。款式就唔逐一細數,唯可惜喺到我食甜品嘅時候(將近完場),有部份想試嘅款式無咗。
先嚟一客甜品拼盤,栗子忌廉蛋糕、芒果慕絲蛋糕、德國芝士蛋糕、意式奶凍(已經無咗芒果及雜莓味)、熱情果慕絲蛋糕、碎朱古力味比利時窩夫配生果伴糖漿,雖然款式比較大路,但整體質素算甚具水準。因為剩返而想食嘅款式唔太多,所以,都順手攞多兩件迷你美式鬆餅過過口癮!
見仲有位食得落,就加多一小碗朱古力鴛鴦軟雪糕伴新鮮生果,旁邊仲有唔同味道嘅糖漿俾客人隨意添加。
最搞笑喺去唧軟雪糕時,見隔離有個Haggen-Dazs雪糕櫃,仲以為有咁筍,哈哈,只喺放咗牛油!
bowl鮮奶咖啡
食甜品時,餐飲落單一杯鮮奶咖啡嚟伴甜品,一送上枱,就睇出喺咖啡機出品,雖然無均勻嘅奶泡,更唔會有拉花,不過,依家啲酒店所用嘅咖啡豆都唔會太低質素,故此,咖啡嘅味道都唔會太差。
依家食下午茶自助餐一啲都唔平,要突圍唔喺包羅萬有,款式多多,就喺具吸引嘅主題特色。Cafe One折後要二百鬆啲,不過,食物嘅款式唔太多,亮點亦欠奉,質素只屬中等。雖然話喺食下午茶啫,但話晒都俾成二百幾蚊嘛,故再食下午茶自助餐,應該不會晌度重溫!

個人評分
味道:6/10
環境:8/10
服務:7/10
抵食:6/10
平均每人消費:HK$226

餐廳資料:
咖啡廳 Cafe One
銅鑼灣告士打道310號柏寧酒店1樓
2839 3311

沒有留言:

發佈留言