2015年3月15日星期日

下一站...甜品 Next Station ... Dessert:3個新站

港鐵嘅西港島延線卒之通晒車,多咗3個站,以後要過去西營盤至堅尼地城就方便好多。今次嚟Next Station Dessert喺好有目的,都喺為咗佢幾個「新站」,不過,「新站」實際就唔止3個喇。
從佢哋嘅FB專頁,知道有幾款新品推出,如無數錯嘅話,發覺新品原來有5款之多。一如過往,都喺賣相非常吸晴,配搭有心思嘅創作。
是日挨晚先嚟,唔喺食甜品嘅尖峰時段,所以客唔太多,我哋都可以坐得輕鬆啲,唔使擔心磨得耐阻人做生意。不過,今次再嚟,發覺餐牌首頁有段溫馨提示,就喺緊忙時段(8:00m-12:00pm)內,設有最低消費,其實,都只不過喺每位客人要點一款甜品,或一杯飲品,所以,都唔算要求高。好嘞,夠時候分享吓今晚我哋食咗啲咩!
bowl健力士啤酒朱古力慕絲配雲呢嗱吉士 $59
第一站,就喺一打開餐牌首頁所見嘅健力士啤酒朱古力慕絲配雲呢嗱吉士,排得第一位,自有其個人長處。整道甜品好有藝術感,無論主角、配角、點綴……都做得一絲不「久」,真喺唔可以放得太耐,要趁快少少食,因為好似我哋影相搞耐咗,啲雲呢嗱吉士片就軟化塌塌哋,雖然仍充滿蛋香,但口感變腍就差咗少少。
主角健力士啤酒朱古力慕絲,下層喺朱古力脆脆餅底,面層喺鏡面朱古力漿,兩者已為整件慕絲加添了濃濃朱古力香;而中間嘅慕絲,口感幼滑細緻,嗒落滲出輕輕酒香,唔會好似酒心朱古力咁酒味一湧而上,喺慢慢咁滲出嚟,感覺唔錯,都幾得意。第時仲可以變奏吓,推出冧酒、咖啡酒、百利酒……等等唔同口味。
bowl佛手柑吉士配草莓分子啫喱 $58
第二站喺依道賣相色彩繽紛嘅佛手柑吉士配草莓分子啫喱,做出嚟個成品果然跟相片中嘅一模一樣。依個餅都幾花巧,啲佛手柑吉士又唔可以唧定,有單先做,而且又擺上好多裝飾,如蜜餞橙片、紅莓乾、朱古力條、橙味泡沫,不過碟面兩大塊一紅一黃嘅嘢,食完都唔喺好知咩嚟,估計應該喺啲好薄嘅啫喱片。
至於整件餅,底層有脆脆嘅麥餅,最驚喜喺餅內加入咗紅莓乾;而中間粉紅色嘅喺士多啤梨分子啫喱,軟軟綿綿,口感好似棉花糖咁,酸甜得意。而兩層佛手柑吉士,柔滑清新,柑味突出。
bowl朱古力拿破崙配雲呢嗱雪糕 $60
第三站,曾經試過佢哋嘅粟子拿破崙,做得甚具水準,不過,今次試第3款新品,跟一般以酥皮所做嘅拿破崙好唔同,半件千層酥餅都搵唔到,所以,名字喺借用,估計喺以一層疊一層嘅概念嚟命名。雖然喺一層疊一層,但卻唔喺直向,而喺橫向,加埋啲朱古力漿圓點同唂咕粉方格,整個賣相頗有幾何美感。
一層黑朱古力脆片、一層朱古力慕絲,層層相間,前者一咬即脆開,後者滑溜香濃,朱古力迷應該好滿意。其實,脆片與慕絲之間仲有一小抹紅莓果蓉,可以令啲朱古力味平衡番啲,不過,個人覺得啲紅莓果蓉可以仲多番少少,使效果突出啲!此外,與其配雲呢嗱雪糕,不如配埋野莓乳酪雪糕就仲好。
bowl香桃熱情果茶 $32
淨食甜品就較鞋慢慢坐,慢慢迤,所以點啲熱飲襯番啲甜品之餘,又可以邊飲邊傾。朋友揀嘅花茶,都喺以茶包沖調,好處喺兩個人共享都可以,沖泡多一轉都仲可以,茶香幽幽,帶點酸帶點果香,中和一吓甜點帶嚟嘅濃甜,實在最好不過。
bowl鮮奶咖啡 $32
小弟都喺較愛咖啡配甜點,鮮奶咖啡喺首選心水,拉心圖案就一般,但醇香補足,入口細滑綿綿。
一間店嘅食品水準高低當然好重要啦,唔喺間間店可以單靠一兩味老本就可以做過世,所以,久唔久出新產品吸客都同樣重要,尤其是香港人咁貪新鮮。前後試過好幾次佢哋嘅出品,相信Next Station Dessert喺絕對有實力之輩。

個人評分
味道:8/10
環境:8/10
服務:8/10
抵食:8/10
平均每人消費:HK$70

餐廳資料:
下一站...甜品 Next Station ... Dessert
旺角黑布街13號地舖
2668 8355

沒有留言:

發佈留言