2015年3月17日星期二

牛気 Nabe Urawa:氣舊圖新

都有一段日子無嚟食涮涮鍋喇,近日有朋友搵到間好嘢,位置便利,質素中上,覺得間餐廳做得有棄舊圖新之感,吹雞一聲,欣然赴會。地點,就晌旺角雅蘭嘅牛氣,初時仲以為晌雅蘭裡面,兜咗個圈,先知門口開晌山東街喎。
餐廳原來都幾大,鋪位好深,一室木啡,柔和舒服,卡位佔多數,而卡位背做得偏高少少,唔使同隔離枱你眼望我眼。
90分鐘限時任食,價錢就以揀咩肉類 / 海鮮套餐計,由最平嘅嚴選美國牛肩肉$158,到最貴嘅極上澳洲和牛牛肩肉$378,一共5個級別,當然,質素就一分錢一分貨喇。每一款套餐唔會得一款肉嘅,只喺越貴嘅就提供嘅肉類任食更多。如想食得更抵,午市每位減$40(11:30am-6:00pm,最後入座4:30pm),一喺就宵夜時段,每位減$30(10:00pm-2:00am,最後入座0:30am)。
鍋底亦喺一間涮涮鍋好唔好嘅重點,牛氣嘅鍋底共有7款,北海道昆布、蕃茄龍蝦湯、博多豬骨湯、昆布辛口地獄湯、韓式辛味泡菜湯、三文魚味噌湯及壽喜燒甜醬油湯,款款都各有特色。我哋揀咗壽喜燒甜醬油湯,不過,原來個鍋嚟到仲要搞一輪,用啲油脂爆香,加大蔥炒,又棉花糖作為壽喜燒嘅甜味,最後倒入混咗醬油嘅壽喜燒湯底,個人略嫌「花臣」多多。
如大多數涮涮鍋,點選好指定肉類或海鮮類套餐後,其他嘅配料就可以晌餐廳正中央嘅食物區任攞。有啲咩食?憑印象加相片輔助,盡量寫啦,大概有:油麥菜、生菜、墨汁墨魚丸、豆卜、大蔥、銀芽、金菇、蝦滑、台灣香腸、餃子、三文魚包心丸、翠玉瓜、炸芋頭、白蘿蔔、蟹柳、蕃茄、冬瓜、芋絲、豆腐、葛絲、粟米、鮮冬菇、韓式年糕、鱈魚豆腐、雲耳仔、龍蝦丸、蓮藕片、板燒魚蛋、南瓜、芝士腸、竹輪、娃娃菜、蟹柳、手打烏冬、通粉、薯粉、拉麵。
一櫃罐裝飲品,選擇唔算好多,都有多款汽水、啤酒,健康少少,又可以沖杯玄米茶或凍頂烏龍。
此外,較特別仲有三數款壽司「小食」,大可襯湯底未滾起時,頂一頂肚之選。
當有啲朋友食緊魚生、壽司,甚或乳酪雪糕,小弟就喜歡以沙律嚟開胃。一盤雜沙律菜,加幾款配料及3款醬汁,唔可以跟自助餐嘅規模比,但有點醒胃蔬菜落吓肚就夠喇!
湯底滾起,喺時候起動「涮涮鍋」。不過,都順帶一講佢個「混醬」架步,有日式醬油、酸汁、辣椒蘿蔔蓉、炸蒜、長蔥、辣椒、七味粉、胡麻醬,小弟就特吃愛炸蒜、長蔥配胡麻醬!
bowl極上澳洲和牛牛肩肉
和牛牛肩肉油花分佈平均,如雪花段綿密細膩,放入湯中輕輕一灼,再放入口,滿口脂香,又不失肉味。因為片片透薄,唔覺唔覺都多食幾塊。
bowl嚴選美國牛肩肉
同樣都喺牛肩肉,不過就嚟自花旗國,油花無咁犀利,所以,入口脂香無咁重,但肉味絕不遜色。故此,想嘆油脂重嘅,就揀極上澳洲和牛牛肩肉,怕油脂太多,可以揀嚴選美國牛肩肉,正所謂各有所好。
bowl特級美國豚腩肉
為免要灼得耐,豚腩肉切得薄到透光,脂肪唔太多,所以多食幾片豚腩肉都唔使擔心,而且,啲豚腩肉估唔到幾嫩滑,配壽喜燒甜醬油湯,效果唔錯喎。
bowl精選巴西雞腿肉
精選嘅雞腿肉,雖然喺雪藏貨,但意外咁灼過後都滑而不嚡,啖啖肉,滑滑嫩嫩,沾炸蒜搭胡麻醬,非常惹味。
bowl海鮮拼盤
大海蝦、紐西蘭青口、日本帆立貝、廣島蠔及魷魚,海鮮質素不俗,尤其帆立貝鮮甜彈牙,廣島蠔碩大肥美,魷魚亦好爽口,大海蝦及青口不俗,所以,整體海鮮用料不賴,食完再添。
其他火鍋料,有好味嘅,亦有普普通通,口味嘅嘢各有不同,晌度唔多講,等大家當喺尋吓寶,但個人取向就多揀天然食物及蔬菜類,始終之前已涮咗唔少肉。
自助食物區旁,發現有盤日式咖喱,正猶豫試唔試之際,身旁嘅店員極力推介,所以,滔一小碗試試。咖喱味頗香,帶些甜,配珍珠米的確唔錯,不過,唔知喺咪好少客人食,個咖喱熱住變得有啲杰,口感就差咗少少。
見佢啲拉麵細細個捲得幾靚,色澤又金黃,少試一個,不過,可能又喺放得耐而少人食,好似抽乾咗咁,煮好耐都唔散唔腍,之後入口口感差少少,所以,建議店家唔好擺太多出嚟,又或可以用啲透明膠蓋冚實,盡量保持番個質素。
通常涮涮鍋都有供應乳酪雪糕俾大家涼快吓,牛氣都唔少得,共有兩款口味,原味及綠茶。此外,仲有5款的的骰骰,賣相精緻嘅甜品,小弟一向喺甜品迷,睇過我嘅自助餐食評就知啦,尾聲一碟甜品拼盤喺走唔甩,所以,晌度所有嘅甜品當然要試勻晒啦!兩款和菓子香蕉冰卷及紅豆麻糬唔錯,口感煙韌;椰汁黑糯米及法式焦糖燉蛋不過不失,但個芒果布甸真喺唔得,口感古古怪怪。 
食涮涮鍋一向有限時,多得好姊妹嘅攻略,加上大家分工合作,互相協調,讓大家可以唔停涮,唔停食。

個人評分
味道:8/10
環境:8/10
服務:8/10
抵食:7/10
平均每人消費:HK$416

餐廳資料:
牛気 Nabe Urawa
旺角彌敦道625及639號雅蘭中心1樓118號舖
2866 8876

沒有留言:

發佈留言