2015年3月4日星期三

發現・美好 GuRu GuRu:好友狂嚐曲(32)

之前都曾經講過,自從寫開依個曲奇系列,從食友、朋友收收埋埋唔少曲奇小禮物,間接認識咗唔少城中小店或曲奇品牌,就好似今次同大家分享嘅曲奇,品牌「Dari-K」(www.dari-k.com)就喺嚟自日本京都,空運直送,晌網購店GuRu GuRu可找到佢嘅蹤跡。
事後再上上GuRu GuRu嘅官網(http://www.guruguru.com.hk),原來喺一間日本零食・雜貨網購店,以引入不同日本食品及生活品牌為經營路線,希望將不為人知嘅好嘢帶俾客人。初時仲以為GuRu喺取其音「咕嚕咕嚕」肚餓到打鼓,睇完其網頁先知喺日文嚟,意思解「美食」及「氹氹轉」,哈哈!
雖然近十年前到過京都一趟,不過,都只喺短留一天,腦海中就只有嵐山、五条通古街、清水寺、祗園……等三幾個景點嘅印象,食店、食物嘅品牌就更不用提。打開包裝餅,有張紙卡有一段有關於Dari-K品牌嘅介紹,不過,全日文,一啲都唔曉,事後睇番GuRu個網頁介紹,Dari-K嘅「Dari」原來喺印尼語中指「由~」嘅意思,而「K」喺指印尼主要可可豆出產地Sulawesi島,因為島嘅形狀有點扭曲,睇起嚟似個「K」字,當地人稱為「K島」,此外,「K」亦有京都(Kyoto)嘅意思,所以,整個品牌有蘊含「透過來自Sulawesi島及京都的可可豆來改變世界」嘅意味,真喺寓意深長。
bowlDari-K半熟可可曲奇 $159
官網就譯為半熟可可曲奇,即喺未熟?半熟有點難明,反而盒底標籤用上Soft Cookie,我就較偏向用上軟心曲奇或就咁軟曲奇,口感就正正好似美式曲奇嗰一類。 
深啡色包裝,配以可可豆圖案,可謂沉實古雅,每盒共有6塊曲奇,分別有朱古力、抹茶及咖啡3款口味,均以獨立包裝,確保衛生。而每一塊曲奇,除餅面加有大量經烘焙過嘅可可豆碎外,內裡包着濃郁朱古力軟心。所以,官網有教人放入微波爐叮15秒,等曲奇內嘅朱古力軟心變成半溶,風味更獨特。
朱古力味
朱古力味曲奇加埋朱古力軟心及可可豆碎,絕對喺濃郁變得更濃郁,朱古力迷嘅心水之選。
抹茶味
抹茶味清雅幽香,配以可可豆碎,濃郁中有份抹茶清幽,的確幾得意。
咖啡味
咖啡味配上可可豆碎,咖啡味依然突出。
bowlDari-K可可棒 $139
黑白包裝,型格有個性,每盒共有4條可可棒,同樣每條均以獨立包裝。雖然叫做棒,其實質感似蛋糕多啲,有少少似班尼士咁,較挺身,口感實在,其朱古力味極之香濃,從成份標籤中更見到加有杏仁粉、榛子粉,所以,風味特別。
好多謝朋友嘅瑰贈,讓小弟跟同事可以分享到咁好味嘅茶點!因為喺京都直送,所以價錢有點不便宜,不過,日本嘢以質素見稱。

個人評分
味道:8/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
發現・美好 GuRu GuRu
火炭禾盛街11號中建電訊大廈11樓06-10室
9357 6181

沒有留言:

發佈留言