2015年3月24日星期二

Euro Eatery:歐陸奇緣

「緣」依個字本身就好玄,認識食友奇奇,源於一個緣字,因為茫茫人海,能夠相識真喺講份緣;而認識樓上餐廳Euro Eatery,亦都可以講喺源於一個緣字,若非偶然睇到另一食友嘅食評,都不知道有她嘅存在。依家做飲食真喺唔易,各出奇謀不在話下,都仲要面對租金高,人工高,食材價格高……等等,所以,跟奇奇姐一齊嚟支持吓小店。
一到入夜,除咗部份已有名氣嘅餐廳外,上環啲食店都幾靜,尤其上樓鋪,幫襯嘅都喺熟客居多,其實,好多店都喺店主嘅一個夢想,Euro Eatary亦喺一對回流老夫老妻嘅夢想。店內裝修好簡單平實,無咩花巧,牆上掛有幾幅小畫已經喺點綴,整間餐廳地方唔大,廚房及水吧已佔去近半空間,加上餐廳尾三尖八角,唔多見使,座位大概廿個多啲。但因為晚市客少,坐着邊談邊食,倒有幾分寫意。
聽店主講,佢哋無做早市,主打都喺午市、下午茶,或者一啲晚市包場。順便都睇睇佢哋個午市餐牌,套餐A-T成廿款選擇,定價由$58-$108,包田園沙律或是日餐湯,奉送意式咖啡或熱飲,免加一,晌中、上環嚟講,定價屬中等。以一間小店而言,午市其實唔使推出太多選擇,10款以內就足夠,貴精不貴多,又較易控制食材及製作過程。
晚餐跟午餐相若,都喺以3道菜為主,主菜款式跟午餐有部份相同,只喺少咗幾款選擇,定價於$78-$118之內,同樣包田園沙律或是日餐湯,奉送意式咖啡或熱飲,免加一。我哋點兩客晚餐,一份要沙律,另一份要餐湯,雖然各自點一個主菜,不過,所有嘢都喺共享一齊食,大家都可以試多少少。
bowl田園沙律
好簡單嘅沙律菜拼車厘茄,可以配油醋汁、和風醬或千島醬,雖然算唔上有咩特色,但新鮮十足嘅沙律菜,淋上油醋,咬落「索索聲」,爽脆新鮮。
bowl甘筍忌廉湯
是日餐湯睇落有點杰身,滔一口,質感還可以,幼滑得嚟只喺杰咗少少,不過,甘筍味清甜突出。
bowl煙三文魚配玫瑰醬 $88
所有主菜都可以選配飯、意粉或薯菜,依道煙三文魚配玫瑰醬揀薯菜,有甘筍、椰菜花、西蘭花及四季豆,可是薯蓉份量非常多,淋上烤肉汁,味道唔錯;煙三文魚共有4大瓣,捲成花形,味道不過不失,而所配嘅玫瑰醬,真喺一個美麗嘅誤會,因為晌香港一講玫瑰醬,就諗起加有玫瑰花做嘅果醬之類,原來唔喺,晌外國真喺有種以蕃茄混和蛋黃醬做嘅「玫瑰醬」,只喺因為色似先叫玫瑰醬,絕無玫瑰成份,小弟受教了。整道菜,味道只喺不過不失,但賣相個人覺得可以再做好啲,例如薯蓉可以用模具做得靚仔啲,煙三文魚就可以捲得更似玫瑰花,因為同一碟中有兩款醬汁,個玫瑰醬可以考慮以一個小瓷盅盛載放晌碟邊嚟突出佢嘅存在。
bowl煙鴨胸配巴黎汁 $98
無論件煙鴨胸,抑或意粉,都份量十足,雖則配上意粉,同樣加有少少時蔬。煙鴨胸整件煎烤,頗有油香,切成小件,仍有肉汁滲出,鴨胸肉入口軟腍,富煙燻香;配巴黎汁,個樣有點似咖喱,而味道香香辣辣,店主話喺用牛油、芥辣、百里香……等等煮製,咁點解會叫巴黎汁?原來發明者喺晌瑞士一間餐廳Café de Paris所做,就好似瑞士汁喺香港太平館所創,都喺啲美麗嘅誤會。依個煙鴨胸配巴黎汁整體味道幾好,同樣,賣相方面可以執一執,例如意粉以長叉捲完再放上碟,一定好睇好多。
餐飲只包一杯普通啡茶、檸水之類,唔介意嘅話,可以+$6轉熱特飲,例如意大利泡沫咖啡、唔同口味嘅鮮奶咖啡;此外,是日甜品,當晚共有5款味道,當問及有何推介,老闆娘仍大方表示蛋糕只喺來貨,但質素都唔太差,不妨一試,況且,都只喺$20件,一啲都唔貴。
bowl焦糖拿鐵 +$6
咖啡中,小弟都喺鍾意飲鮮奶咖啡(拿鐵),貪其奶泡跟濃縮咖啡夠平衡,原來小店用上Movenpick咖啡豆,拉花就真喺麻麻,不過,醇厚嘅咖啡香就令人蠻滿意,而友人嘅榛子拿鐵亦都不俗。
bowl士多啤梨慕絲餅 $20
比一般高質素嘅凍餅,無疑做得較簡單,一層海綿蛋糕,一層士多啤梨慕絲而已;蛋糕鬆軟,慕絲柔滑,只喺士多啤梨味欠缺鮮活,感覺似喺港式餅店嘅出品,而底下唧上朱古力漿及焦糖漿亦唔太過襯,倒不如切半粒士多啤梨,糝少少糖霜,可能仲簡潔合襯。
bowl意大利咖啡餅 $20
初頭以為類似意大行芝士餅(Tiramisu)嘅一款甜品,其實唔喺,只喺咖啡慕絲蛋糕,一層朱古力海綿蛋糕,一層咖啡慕絲,再灑上唂咕粉,慕絲咖啡味濃香,一樣做得好柔滑,較士多啤梨慕絲餅好食。
無咩靚裝修,食物亦無話帶嚟多大驚喜,但一對老闆夫婦,加一個女侍應,胼手胝足撐起間鋪,可能手腳唔及年輕人快,但笑容、態度卻喺叫人感到親切及誠意。當問及晚市如果客人唔多,會唔會早啲收鋪,老闆娘爽快回應都喺照常十點左右先收,因為有啲附近返工嘅熟客成九點先收工,有時會晌度食埋飯先走,果然,真喺有位熟客大叔九點先嚟,可見老闆倆背地裡都會為客人著想。

個人評分
味道:8/10
環境:7/10
服務:8/10
抵食:8/10
平均每人消費:HK$120

餐廳資料:
Euro Eatery
上環永樂街1-3號世瑛大廈103室
6623 7748

沒有留言:

發佈留言