2015年3月28日星期六

俊達晞茶餐廳小廚:長驅直俊

莫講話青怡花園,地鐵上蓋嘅青衣城都甚少去,今晚長驅直進嚟到跟青衣港鐵站相隔一大段路嘅青怡花園「俊達晞茶餐廳小廚」食晚飯,仲一行12個大漢,都喺友人帶嗆,訂咗張「大枱」,真喺好難得嘅聚會。不過,因為明知喺周六晚會好多人,所以,我哋都訂得早啲去食。
環境唔多講,茶記一間,乾淨企理就算,一張相交待晒。雖然比唔起上大酒樓環境咁舒適,亦唔方便坐太耐,張大枱其實頂多坐10個人,我哋坐夠12個,仲要好幾個身形有番咁上下件頭,真喺食到肩並肩,不過,咁人齊,食得大家都稱心高興。況且,招呼意外咁好,點好?臨尾再講!
7:00pm時情況
8:15pm離開時情況
餐牌方面,晚市主要都喺做小菜,一列是日捱介、湯羹、打冷、小菜就喺晚市嘅選擇,乜乜乜快餐ABC就唔多見有提供;而上述嘅小菜亦喺散叫形式,無包埋例湯、白飯嘅套餐。
等人齊就開餐,茶記嘅特點就喺上菜速度快,一叫上菜,無耐就上齊晒。由於今次唔方便逐碟逐碟慢慢影相,所以,影相角度及距離都唔到我控制,影得唔好或唔清楚請多多包涵。
bowl鹵水拼盤 $60
鹵水有雙拼($60)或三拼($68),如無特別偏好,就不如叫個拼盤,墨魚、大腸、紅腸、豬頭肉……樣樣執啲,個人覺得質素一般般,鹵水唔夠香。
bowl沙薑雞 $148(全隻)
點菜時阿姐話佢哋嘅沙薑雞喺招牌嘢,點一隻試試又睇吓有幾招牌,如果人少可以點半隻,只賣$78,收得咁嘅價就知唔喺鮮雞貨色,不過,做出嚟都唔失色,雞肉幾滑,微微滲出沙薑嘅鹹香味。
bowl腰果西芹肉丁 $60
幾家常嘅小炒菜式,亦較易晌屋企親手做,不過,有時想食就食,無謂諗咁多,腰果炸得好香脆,西芹去晒絲,食落爽脆無渣。
bowl沙嗲粉絲牛肉煲 $55
餐牌上嘅煲仔菜有唔少選擇,而依個煲仔菜嘅沙嗲未夠香濃,否則,索滿汁嘅粉絲就更好食,至於啲牛肉喺滑牛,幾腍幾滑。
bowl椒鹽九肚魚 $62
九肚魚炸得嫩滑,椒鹽味啱啱好,非常香口惹味,餸飯就差少少,餸啤酒就一流啦。
bowl西蘭花花枝片 $68
味道較清嘅西蘭花花枝片,西蘭花口感帶脆,而花枝片軟腍鮮味。
bowl豆腐班腩煲 $62
另一個煲仔菜喺豆腐班腩,有魚有菜,豆腐都挺嫩滑,整體味道跟口感都好平穩。
bowl瑤柱扒豆苗 $78
依家啲豆苗都賣得幾貴,所以,依碟瑤柱扒豆苗都幾大碟,算喺抵食,而且豆苗幾嫩,內裡亦有唔少瑤柱碎,個茨打得唔算太杰,味道不俗。
bowl欖菜炒四季豆 $48 
重口味嘅欖菜,餸飯就特別滋味,炒出嚟嘅四季豆,充滿鹹香。睇起嚟好易煮,但自己煮就總喺差啲,都喺出去食好,夠鑊氣。
bowl海鮮雜菜煲 $68
3個煲仔菜中,以依個味道一般啲,海鮮都喺得啲蝦同魷魚仔。
bowl白飯
白飯一碗,真喺無咩好講,但裝到咁大碗,就知喺街坊生意,童叟無欺,裝大碗啲又何妨!
bowl自擕水果
之前問准老細可唔可以帶啲生果嚟食作為飯後果,講佢服務好唔單止無所謂,仲幫手洗埋、切埋,外出唔喺間間茶記肯咁做,皆因阻鬼住佢做生意,所以,我哋都好識做,食完生果即走,因為出面都有好些人晌度等位。
今晚點嘅都喺啲普普通通、見慣見熟嘅茶記小炒,所以,唔算考驗到大廚嘅功夫,出品嘅質素都平平穩穩。無茶芥,無加一,經濟實惠,俾啲懶煮飯嘅家庭輕輕鬆鬆食番餐!

個人評分
味道:7/10
環境:7/10
服務:8/10
抵食:8/10
平均每人消費:HK$70

餐廳資料:
俊達晞茶餐廳小廚
青衣青綠街7-19 號青怡薈1樓12號舖
2434 3256

沒有留言:

發佈留言