Little Vegas：有目共賭

因為Little Vegas曾經上過10大排行榜，都有留意過依間樓上店，不過，就一直未有衝動去試。最近睇過一位相熟食友嘅食評，讚佢唔錯，部份菜式有驚喜，所以，扚起心肝走過嚟試試。百樂中心內有好多餐廳，真喺好多人，地下大堂等電梯已大排長龍，而一出電梯，又見Little Vegas門外企咗唔少人等位，好彩小弟有訂枱，如果唔喺，侍應話最快要等成粒鐘。

餐廳雖話佔咗全層，呈L形，其實唔喺好大，大概50-60個座位左右，裝修簡約，地下、牆身、枱面有唔少美國街頭式噴畫，而枱上、窗台旁又放有唔少賭城拉斯維加斯嘅相關紀念品，都喺展現出美式風情。

餐牌，亦都模仿成美國報紙咁，打開頭兩版就喺嘢飲，手調咖啡、朱古力、茶類、特飲及沙冰，但卻無賣美式經典飲品嘅奶昔。之後，仲有餐湯、沙律、小食、比薩、招牌嘅全日早餐、意式雲吞、意粉、主菜及甜品，但又會搵唔到漢堡、熱狗等美式嘢。而且，食材又加入咗各國元素，例如：熱帶水果、泰式香料、意國黑醋、喇沙湯底……，再者，份量又唔似一向美式餐廳般大大份，所以，只可以形容佢環境大賣濃厚美國風，食物就集各家之大成。

熱帶水果茶 $48壺

之前睇過人介紹依度嘅水果茶，就番表姨甥嘅口味，我哋都點一壺，足夠兩個人享用。壺內有火龍果、藍莓、青檸、士多啤梨、橙及檸檬，茶味清幽，幾香甜，飲落幾舒暢，果然幾好飲。一路熱住，飲到尾都有一定嘅熱度，而最別緻仲有個茶壺托，喺由5個心形組成。

烤意式黑醋茄子 $68

小食類都較多喺燥熱嘢，但一眼就睇上依個茄子。所謂「意式」，喺加有芝士嚟焗啲茄子，此外，仲放咗少少蕃茄粒，焗好再淋上黑醋。味道上，絕對深得我心，一來，芝士跟蕃茄粒嘅配搭，濃香中帶點清新，二來，啲黑醋睇個樣已望到夠杰身，又陳又醇香。不過，啲茄子有部份比較切得大嚿，所以，有啲未焗透嘅情況出配，口感有點點硬硬實實咁。

泰式冬蔭蝦幼意粉 $98

店家有6款必食推介，依個泰式冬蔭蝦幼意粉喺其中之一。個意粉好有泰式風味，忌廉汁底夾雜一朕朕冬蔭功香味，有啲椰汁香，又有點辣勁，複雜有層次，味道認真唔錯。意粉煮得有咬口，蝦仔又鮮爽又有蝦味，配菜有點紅椒、露筍仔、翡翠苗，真喺估唔到好夾冬蔭功跟意粉又幾夾跍，不愧為店家推介。

黑松露野菌長通粉 $98

個長通粉同樣煮得啱啱好，夠咬口，而野菌好似只食到啲冬菇，而個味道主要靠啲黑松露醬提味，雖然，幾馥郁芳香，略嫌只得冬菇顯得有點單調，但整體味道依然唔錯。

期間發生段小插曲，就喺個長通粉嚟錯咗個香腸拿破崙長通粉，但二話不說，好快換過一客，無話有咩不快事發生。所以，俾人感覺服務好好，此外，我哋兩個人被安排坐晌餐廳尾嘅長枱，後來有客到，同樣安排到我哋依邊張長枱，但中間隔開咗一張枱，少咗份騷擾，算安排得幾好！

講開Las Vegas，就即時想起「賭」，但只賣食物嘅Little Vegas，無論食物嘅質素，抑或服務嘅水平，都稱心滿意，怪唔之得雖然喺樓上小店，門口都仍然有咁多人等位，佢哋嘅表現，可算喺有目共睹！

個人評分
味道：8/10
環境：8/10
服務：9/10
抵食：7/10
平均每人消費：HK$175

餐廳資料：
Little Vegas
銅鑼灣耀華街3號百樂中心25樓
2622 2369