雅苑座 The Greenery：雅口無言

又喺一年一度嘅公司周年飯，老細加大咗額度，我哋可以揀嘅自助餐範圍又闊咗，雖然自己有少少心水，但最後有同事建議去帝苑酒店嘅雅苑座（The Greenery），晌度食過一次下午茶自助餐，都已經喺好多年前嘅事，所以，都有興趣再訪，睇過究竟。

餐廳嘅正中央喺揀手位，既有空中花園之感，又有歌手即場獻唱。可惜，我哋被安排靠入嘅一邊，唯一勉強稱為嘅「優勢」，就喺近食物區，身旁咫尺，哈哈。

沙律

小弟食自助餐第一樣最鍾意食就喺沙律，因為真喺有助消化，等陣可以食多啲嘢。雅苑座沙律吧嘅陣容唔算好強，三幾盤嘢加少少配料就睇晒，小弟樣樣要少少，再加點生果同少少凍海鮮，就成為一道豐富清怡嘅頭盤。

凍海鮮

缺少生蠔、龍蝦等貴價食材，只有法國麵包蟹、龍蝦仔、凍青口、長蟹腳、凍蝦幾款，明顯比較弱，質素亦屬中規中矩，無咩霉霉爛爛嘅情況，叫做平穩。較多嘅喺啲長蟹腳，唔會太鹹。

凍海鮮

法國麵包蟹、煙三文魚、龍蝦仔

凍青口、長蟹腳、凍蝦

餐湯、麵包、精選小食

食咗兩轉凍嘢，喺時候搵番啲熱嘢暖暖胃，雖然依度無燉湯，但個中式老火湯「淮山杞子螺頭雞湯」，滔半碗小試，果然夠火候，湯色清澈見底，入口卻鮮甜滋潤。

西湯又如何？小弟又滔一小碗「意大利雜菜湯」嚟餸麵包，酸酸哋，幾開胃，較西式嘅忌廉湯輕盈，又有好多蔬菜粒，喺健康之選。

雖然晌自助餐度嚟食麵包，喺被認為唔划算嘅行為，不過，食嘢又唔可以吓吓講「效益」嘅，都要講喜好。麵包籃有5款包，揀咗當中嘅芝麻硬包及新鮮軟包，前者就喺加咗黑白芝麻嘅硬豬，後者有啲似港式嘅細麥包，再配襯幾款芝士，食起上嚟就無咁「寡」。

另外，仲拎咗一件香煎鴨肝黑松露多士及西班牙風乾火腿配哈蜜瓜作為配西湯小食，鴨肝多士好豐腴芳香，但黑松露味有啲欠奉，而火腿頗為油潤甘香，配哈蜜瓜，鹹甜有層次。

蠔皇翡翠扣鮑魚

當侍應安排入座時，特意提我哋枱上有張印有Greenery字樣嘅綠色卡仔，可以去換領鮑魚一客，嘩！限量配給，仲以為咩勁嘢，唓！原來喺五蚊銀大細嘅鮑魚，差啲啞口無言。

老實講，雖然細粒，但啲鮑魚又的確扣得唔錯，軟腍有咬口，一切落去啜晒刀嘅，而且，挺入味，只喺細細粒無乜睇頭啫。

熱盤類

熱盤方面，選擇算喺唔失禮，有美國特級燒牛肉、串燒、烤蔬果、紅燒豬手、冬蔭雞煲、豉椒炒蜆、洋蔥煙肉炒四季豆、印度蝦咖喱、海鮮千層麵、薑蔥炒蟹、酥炸廣島蠔、清蒸海上鮮、北菇螺片扒時蔬、臘味炒飯……等等，記憶加相片，大概有咁多樣。

美國特級燒牛肉

串燒或燒烤菜式

十幾樣點會試得晒，所以，精選揀幾款心水，包括烤蕃茄、南瓜、印度蝦咖喱、酥炸廣島蠔、羊架、串燒大蝦、螺片扒時蔬及燒牛肉，成為小弟嘅熱葷拼盤。整體味道屬中等，以炸蠔、羊架、大蝦個人認為較好食，或許都喺因為香口嘢。

此外，仲有燒味（唔喺得幾碟嘢，直頭成個燒味檔）、刺身、壽司（仲要搞埋火炙），不過，同事就有食，我就無揀，因為有個「自選烚海鮮」想試，加埋仲要留肚戰甜品。

自選烚海鮮

其實晌近門口有個粉麵檔，唔過去睇睇真喺走寶，因為佢賣粉麵之餘，仲賣埋烚海鮮，海鮮料有5樣：大蝦、貴妃蜆、帶子、沙白及花甲，可以配中式鮮魚濃湯或韓式辣湯。

雖然師傅俾漏咗隻帶子我，但其他幾樣海鮮都好鮮甜，配中式鮮魚濃湯，鮮味活靈活現，濃香滋味。

自助餐基本上包一杯餐飲，都喺普普通通嘅茶啡之類，但另提供自斟任飲嘅橙汁及柑桔檸檬汁，唔好期望喺鮮榨貨色，不過，都唔差，尤其後者清清爽爽，邊飲邊食，感覺幾有助消化，否則你又點會見我臨尾仲食到兩碟甜品呢！

甜品

甜品區分兩邊，左邊有啲冰鎮甜品（楊枝金露、咖啡涼粉）、朱古力嘖泉及餅櫃（大概17、18款甜點），右邊喺Haagen-Dazs雪糕、即製班戟同中式糖水，所以，甜品加加埋埋超過廿款，不愧喺帝苑，甜品一環始終都喺個亮點。由於大部份甜點晌餅櫃之內，要勞煩有關師傅提取，唔知喺咪佢覺得小弟一次過拎兩碟甜品太多，還是佢認為我拎咁多會食唔晒，感到佢態度頗差，又無乜禮貌。

甜品拼盤，兩碟夾埋超過10樣，包括：藍莓芝士餅、綠茶越曼莓冰皮卷、芒果慕絲餅、法式焦糖燉蛋、蜜桃批、斑蘭葉蛋糕、豆腐慕絲餅、朱古力班尼斯、意大利芝士餅、香梨批、開心果奶凍，好難個別品評，因為好多款都好好食，亦為小弟對今個自助晚餐拉番唔少分，而印象較深刻，喺個香梨批及開心果奶凍，前者香梨批非常清甜，又少甜，唔太膩，推介咗俾同事食都話讚好，而後者開心果奶凍做得質感夠挺，堅重開心果味。

最後班戟就真喺食唔落，食多兩球Haagen-Dazs雪糕作結就已經算喺超額完成，填滿晒個肚。雪糕每晚都會提供6款口味，是晚有朱古力、士多啤梨、雲呢嗱、冧酒提子、咖啡及芒果雪葩，小弟要咗冧酒提子及芒果雪葩，加點朱古力漿及杏仁片，可謂簡單味美，尤其芒果雪葩，冰涼清爽，吃罷感覺涼快。

整個自助餐亮點唔太多，較突出喺個自選烚海鮮及少部份熱盤，除非你好喜歡食甜品，否則，晌缺少貴價嘅食材或回本菜式之下，以一位成人正價收$608 +10%（星期五）計，雖另有八折優惠，可能未至於話失望，但收得咁嘅價跟期望可能確喺有啲落差。

個人評分

味道：8/10
環境：7/10
服務：8/10
抵食：8/10
平均每人消費：HK$550

餐廳資料：
雅苑座 The Greenery
尖沙咀麼地道69號帝苑酒店3樓
2733 2030