Luna Cake：月亮芝味

同屋企人晌荃灣嘅「至尊重慶雞煲」食完飯，估唔到老婆仲預備咗個生日蛋糕，喺Luna（意大利文「月亮」之意）嘅出品「開心果芝士蛋糕」。返到屋企，一齊嘆一嘆依個飯後甜品！之前未曾接觸過依個品牌，只知佢所有原材料嚟自北海道，跟足北海道富良野做法，標榜當地風格嘅芝士蛋糕。好老實，小弟未去過北海道，真喺唔知咩叫富良野風格，只喺用番個人對芝士蛋糕嘅品評感覺。

咪睇個蛋糕細細盒，非常墜手，而打開包裝嘅牛油紙，喺一個毫無裝飾，只糝上糖霜（即喺成份中嘅糖粉）嘅芝士蛋糕，可以講喺質量喺其賣點。

包裝盒邊有兩個建議食法，由冰箱改放晌下層，攤佢2-3小時先享用，口感會如芝士雪糕般，若攤足5-6小時，會嚐到細膩濃厚嘅芝士香味。前者無法証實喺咪咁正，因為我哋揀後者，攤佢5-6個小時，食完雞煲先返屋企食個芝士蛋糕。

除咗以北海道原材料作為亮點外，據說以獨創嘅方法將兩種芝士（忌廉芝士及馬士卡邦芝士）融合，做成芝士二重奏亦喺另一賣點。不過，以兩種芝士嚟做餅，個人真喺唔覺得喺咩賣點，因為，都曾經見過有啲凍餅，何止用上兩種芝士。

將蛋糕切開後，先明顯少少見到上下兩層唔同嘅「芝士」，上層應該喺以馬士卡邦芝士加開心果仁做嘅芝士蛋糕（註：馬士卡邦芝士Mascarpone，我個人較喜歡譯為馬卡風），因為基本上唔會太有芝士味，以開心果味掛帥，但開心果味亦非好突出，只喺慢慢滲出嚟，然而質感都幾滑幾挺身；而下層應該以忌廉芝士做，因為質感同味道都猶如食緊紐約芝士餅，帶有濃郁嘅芝士味。

如果喜歡芝士蛋糕嘅朋友，Luna嘅出品算屬中上，但個人而言，覺得喺水準不俗，只喺驚喜欠奉。

個人評分
味道：7/10
環境：-/10
服務：-/10
抵食：-/10
平均每人消費：HK$0（太太送贈）

餐廳資料：
Luna Cake
尖沙咀河內道18號K11購物藝術館B2樓
8100 9696