2015年1月4日星期日

蛋卷皇后 Eggroll Queen:守后多時

除咗收到老婆個Luna Cake作為生日禮物之外,有個相熟食友都贈小弟一盒「蛋卷皇后」嘅家鄉鮮雞蛋卷,讓小弟又認識多一個專賣蛋卷嘅品牌小店。
從店家單張嘅簡介所見,原來店主陳氏夫婦上世紀70年代已經開始先晌屋企,繼而自設工場胼手胝足咁烘焙蛋卷,數十年嚟都以傳統手藝製作,以一級新鮮原材料,無添加,堅持香港製造。雖然,依家兩位都退下火線,正所謂守候多時,由第二代接手,重新包裝,並改名為「蛋卷皇后」(據知前身稱為「立洲食品」),更開設自家門市。
產品方面,除主打家鄉鮮雞蛋卷,仲有鮮牛油雞蛋卷、鮮椰汁雞蛋卷、椰子鳳凰卷及紫菜肉鬆鳳凰卷,有1磅裝及2磅裝可供選擇,單色鋁罐包裝,用色洗脫老字號味道,感覺較年輕。
打開包裝,長長嘅蛋卷上下兩層排列,排得密密,每條長短不一,足見人手所做。每條蛋卷呈蜂巢狀,入口非常鬆化脆口,蛋香味亦不俗,不過,牛油香味欠奉,味道較清。再細看成份,原來用上起酥油,所以不單做出蜂巢狀,口感更喺好酥脆,亦因此唔會食到咩牛油香味。如果,想食得既有蛋香,又有牛油味,相信要試試另一款口味「鮮牛油雞蛋卷」至知嘞。
作為一間本地小店,喺值得繼續支持一下,況且,晌依家鋪租、人工、材料成本,堅持香港製造著實不易。再次多謝食友嘅禮物!

個人評分
味道:6/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
蛋卷皇后 Eggroll Queen
銅鑼灣堅拿道西24-25A號地下D舖
2219 6818

沒有留言:

發佈留言