2014年12月2日星期二

Foxtail & Broomcorn:味遊亞洲‧玲瓏8麵

麵食之大,真喺無處不在,唔好講話全世界,單單亞洲區,每個國家、每個城市都有其本土特色麵食。想一次過試到多款亞洲地區嘅麵食,又唔一定要環遊亞洲嘅,最近到訪上環嘅Foxtail & Broomcorn,就喺主打亞洲麵食,揉合傳統與新派,注入一啲創意,務求讓人對麵食有新體驗。
因為店子走新派路線,所以,店內裝修以型格先行。湖水綠襯白,加上適當嘅射燈,吧位用上高腳櫈,都喺醒目耀眼。由於鋪位窄而修長,入門左側以大玻璃鏡作為牆身一部份,目的都喺想增加空間感。
小店貴精不貴多,雖有小食、沙律、甜品,但每類別都只喺有三數款,而特色嘅亞洲麵食,一共有8款,全部均用上亞洲唔同嘅地方命題,以唔同嘅麵條配搭不同食材,果真八面玲瓏,包括台北(陽春麵)、關西(新鮮烏冬)、杭州(陽春麵)、東京(拉麵)、廈門(米粉)、長崎(冷素麵)、葛尼(油麵夾米粉)及會安(凍魔芋絲),每碗定價於$68-$98。
枱上除放置青檸清水,更備有3小罌麵食配料:蔥花、辣椒碎 及炸蒜片,可按個人喜好再稍作調味。
bowl涼拌香辣豬肉小黄瓜 $35
菜名旁有兩隻辣椒公仔,可想而知有幾辣。豬肉跟青瓜都切成條形,前者肉質軟腍,後者清涼爽脆,但辣度果然唔講得笑,夠刺激。
bowl台北 $68
以陽春麵掛帥,淋上台灣汁,味道醇厚帶甜,似加入咗玉桂、八角嘅肉燥汁咁,由於個醬汁做得厚身,所以啲麵好掛汁。配料有五香豬肉、香菇,豬肉滷得香,又夠軟腍,而當中嘅青瓜絲,令香濃嘅醬汁加添一份清爽。 
bowl關西 $68
以新鮮烏冬配香菇清湯,配料仲有咗一小撮木耳絲,另分開碟上兩件煎豆腐餅。烏冬入口滑溜咬口,清湯散發濃濃菌香,而豆腐餅混入咗菌粒,做得鬆軟,煎得香口,伴埋冬菇片、木耳絲,好適合素食人士,亦喺8個麵款唯一一款全素麵食。
bowl葛尼 $88
麵底喺採用咗馬來西亞常食到嘅「摻摻」,即喺油麵搭米粉,同一時間兩種口感,而餸料亦喺眾麵款中較多,以森巴醬做嘅豬肉、鮮蝦、豆卜、銀芽、白菜仔,好豐富,湯底亦都濃郁鮮香,甚具馬來風味。
bowl自家果茶 $20
飲品選擇來來去去都喺汽水,亦有啤酒,不過自家果茶喺咪更健康呢?一大杯果茶以紅茶混和西柚、蘋果及熱情果,茶味唔算好濃,入口較為清淡、少甜,感覺清新怡人。
雖然喺一間麵店,但經營手法都較西式,亦喜知客人愛以甜品作結,故此,店家亦提供3款甜品:椰絲卷、檸檬蛋糕及合桃蛋糕配焦糖,份量大,定價亦唔算貴,值得一試。

bowl椰絲卷 $30
曾經晌其他馬來西亞食店試過,亦都好喜歡依款椰絲卷。以班戟捲住大量黑糖椰絲,青綠嘅班戟皮加入班蘭葉汁所做,滲出淡淡嘅班蘭味,喺略嫌個皮有點兒韌,黑糖椰絲亦都略甜,減低少少個甜度就更合小弟口味。
bowl合桃蛋糕配焦糖 $45
蛋糕底內藏有好多合桃,合桃落得一啲都無手軟,有相為證呀,最緊要喺夠香脆嘛;蛋糕入口濕潤,質感比較粗疏,有少少原始風味,淋晌面層嘅海鹽焦糖漿,令件蛋糕提升甜品層次。
從餐牌中店家嘅概念一欄,標榜原味、健康,又支持社區內小商戶,部入食材購自附近街市,而且,難得小店唔收加一服務費,俾人一種無賺到盡嘅感覺,亦有份對社區嘅關愛。
以上幾款麵食都喺小弟曾去過嘅地方,下一站會喺杭州定東京呢?廈門、長崎都未去過,一樣好有興趣。

個人評分
味道:8/10
環境:7/10
服務:8/10
抵食:7/10
平均每人消費:HK$125

餐廳資料:
Foxtail & Broomcorn
上環蘇杭街84號地下
2415 2555

沒有留言:

發佈留言